ARYNews.tv | Urdu – Har Lamha Bakhabar

Tag: ٹک ٹاک

  • سیلابی موسم : ٹک ٹاک نے پاکستانی صارفین کے لئے نیا فیچر متعارف کرادیا

    سیلابی موسم : ٹک ٹاک نے پاکستانی صارفین کے لئے نیا فیچر متعارف کرادیا

    کراچی (29 جولائی 2025) : ٹک ٹاک نے پاکستان میں مون سون کے سیلابی موسم کے دوران غلط معلومات سے نمٹنے کے لیے نیا سرچ فیچر متعارف کرادیا۔

    تفصیلات کے مطابق ٹِک ٹاک نے پاکستان میں جاری مون سون کے سیلابی موسم کے دوران صارفین کو مستند اور تازہ ترین معلومات تک رسائی فراہم کرنے کی غرض سے ایک نئی سرچ گائیڈ متعارف کرائی ہے۔

    یہ اقدام پلیٹ فارم پر تحفظ اور حقائق پر مبنی آگاہی کو فروغ دینےکے لیے ٹِک ٹاک کی مسلسل کوششوں کا حصہ ہے، جس کے تحت قدرتی آفات سے متعلق غلط معلومات کے رجحانات کا مقابلہ کرنے کے لیے تصدیق شدہ معلومات فراہم کی جائیں گی۔

    ٹِک ٹاک پر جب صارفین سیلاب سے متعلق معلومات تلاش کریں گے، تو اُنہیں ایک بینر نمایاں طور پر نظر آئے گا جو معتبر ذرائع سے معلومات کی تصدیق کرنے کی ترغیب دے گا۔

    یہ گائیڈ صارفین کو براہِ راست نیشنل ڈیزاسٹر مینجمنٹ اتھارٹی تک رسائی دیتی ہے، جہاں سے پاکستان میں قدرتی آفات سے متعلق تصدیق شدہ معلومات حاصل کی جا سکتی ہیں۔

    اس گائیڈ میں ٹِک ٹاک کے سیفٹی سینٹر پردستیاب وسائل کا بھی لنک شامل ہے اور اسی کے ساتھ ٹِک ٹاک کے ”ٹریجک ایونٹ سپورٹ“ گائیڈ کا براہِ راست لنک بھی فراہم کیا گیا ہے، جو پریشان کن واقعات سے متاثرہ افراد کے لیے عملی مدد فراہم کرتا ہے۔

    ٹِک ٹاک کی یہ گائیڈ یہ بھی واضح کرتی ہے کہ ”سانحہ“ کس قسم کے واقعات کو کہا جاتا ہے ، جن میں قدرتی آفات سے لے کر ذاتی نقصانات تک شامل ہیں۔ یہ گائیڈ صارفین کو ذہنی صحت کی معاونت حاصل کرنے کے طریقوں سے متعلق معلومات بھی فراہم کرتی ہے، اور ایسے واقعات سے متعلق کانٹنٹ کو ذمہ داری سے شیئر کرنے یا رپورٹ کرنے کے اُصول بھی بتاتی ہے۔

    پاکستان میں ٹک ٹاک کے پبلک پالیسی اینڈ گورنمنٹ ریلیشنز کے سربراہ فہد محمد خان نیازی نے کہا:”ہم سمجھتے ہیں کہ بحران کے موقع بروقت اور درست معلومات تک رسائی انتہائی اہم ہوتی ہے۔ہم ان اداروں کے ساتھ شراکت داری کے ذریعے، جو براہِ راست آفات سے نمٹنے کے عمل سے وابستہ ہیں، اور اُن وسائل کو اپنی کمیونٹی کے لیے زیادہ نمایاں بنا کر، باخبر فیصلے کرنے میں مدد فراہم کرنا چاہتے ہیں اور صارفین کی حفاظت کو یقینی بنانا ہمارا مقصد ہے۔“

    اس گائیڈ کو ٹِک ٹاک کے وسیع تر اہداف کی بنیاد پر متعارف کرایا گیا ہے، جن میں معتبر معلومات کو فروغ دینا اور اپنی کمیونٹی کے لیے ایک محفوظ ڈیجیٹل ماحول تخلیق کرنا شامل ہے۔

    ان ٹولز کو براہِ راست صارف کے تجربے میں شامل کر کے، ٹِک ٹاک اپنی کمیونٹی کو بامعنی معاونت اور قابلِ اعتماد معلومات فراہم کرنے کا سلسلہ جاری رکھے ہوئے ہے۔

    یہ پلیٹ فارم ایک ایسے ماحول کو فروغ دینے کے لیے پرعزم ہے جہاں لوگ باخبر رہ سکیں، اپنی فلاح و بہبود کا خیال رکھ سکیں، اور اہم لمحات میں ذمہ داری سے مشغول ہو سکیں۔

  • مقبول سوشل میڈیا ایپ نے پاکستان میں مزید ڈھائی کروڑ سے زائد ویڈیوز ڈیلیٹ کر دیں

    مقبول سوشل میڈیا ایپ نے پاکستان میں مزید ڈھائی کروڑ سے زائد ویڈیوز ڈیلیٹ کر دیں

    سوشل میڈیا کی مقبول ترین ایپس میں سے ایک ایپ نے پاکستان میں مزید 2 کروڑ 54 لاکھ سے زائد ویڈیوز کو ڈیلیٹ کر دیا ہے۔

    چین کی سوشل میڈیا سائٹ ٹک ٹاک کا شمار دنیا کی مقبول ترین ایپس میں سے ہوتا ہے۔ جہاں دنیا بھر سے صارفین اپنی شارٹ ویڈیوز اپ لوڈ کرتے اور مقبولیت حاصل کرتے ہیں۔ تاہم ٹک ٹاک نے سوشل میڈیا پر اپ لوڈ کی جانے والی ویڈیوز کے لیے کچھ گائیڈ لائنز طے کی ہوئی ہیں۔

    اے آر وائی نیوز کے مطابق ٹک ٹاک نے کمیونٹی گائیڈ لائنز کی خلاف ورزیوں پر عالمی سطح پر 211 ملین ویڈیوز ڈیلیٹ کیں۔ پاکستان میں مزید 2 کروڑ 54 لاکھ سے زائد ویڈیوز ڈیلیٹ کر دی گئیں۔

    ٹک ٹاک کی رواں سال کی پہلی سہ ماہی رپورٹ کے مطابق پاکستان میں پیشگی طور پر ویڈیوز کو حذف کرنے کی شرح 99.4 فیصد رہی، جو انتہائی بلند ہے۔ ان میں سے 95.8 فیصد ویڈیوز صرف 24 گھنٹوں کے اندر ہٹا دی گئیں۔

    چینی سوشل میڈیا سائٹ نے عالمی سطح پر 211 ملین ویڈیوز ڈیلیٹ کیں۔ ان میں 31.1 فیصد بالغ یا حساس مواد، 45 فیصد غلط معلومات اور 13 فیصد مصنوعی ذہانت سے تیار کردہ ویڈیوز شامل تھیں۔

    اس سے قبل مارچ 2025 میں، TikTok نے مغربی افریقہ میں خفیہ کارروائیوں سے منسلک 129 اکاؤنٹس کو بھی ہٹا دیا تھا۔

    ٹک ٹاک انتظامیہ کا کہنا ہے کہ پلیٹ فارم پر تحفظ، شائستگی، پرائیویسی اور سیکیورٹی کی پالیسیوں پر سختی سے عملدرآمد کیا جا رہا ہے تاکہ صارفین کو محفوظ اور بااعتماد تجربہ فراہم کیا جا سکے۔

  • ٹک ٹاک کی خریداری، ٹرمپ نے چینی صدر شی سے متعلق بڑی پیشگوئی کر دی

    ٹک ٹاک کی خریداری، ٹرمپ نے چینی صدر شی سے متعلق بڑی پیشگوئی کر دی

    واشنگٹن: امریکی صدر ڈونلڈ ٹرمپ نے ملک میں ٹک ٹاک کی ملکیت کے معاملے پر پیش رفت کے حوالے سے بتایا ہے کہ اسے خریدنے کے لیے ایک گروپ تیار ہے۔

    اتوار کو امریکی صدر ڈونلڈ ٹرمپ نے فوکس نیوز کو انٹرویو دیتے ہوئے کہا ’’ہمارے پاس ٹک ٹاک کا ایک خریدار موجود ہے، یہ امیر لوگوں کا ایک گروپ ہے جو ٹک ٹاک خریدنا چاہتا ہے، میں 2 ہفتوں میں بتاؤں گا کہ ٹک ٹاک خریدنے والے کون ہیں۔‘‘

    صدر ٹرمپ نے یہ بھی کہا کہ جو ڈیل تیار کر رہے ہیں اسے آگے بڑھانے کے لیے چین کی منظوری درکار ہوگی، انھوں نے پیش گوئی کرتے ہوئے کہا کہ چینی صدر شی جن پنگ اس ڈیل کی منظوری دے دیں گے۔

    یاد رہے کہ امریکی صدر نے رواں ماہ کے شروع میں چینی کمپنی بائٹ ڈانس کو ٹک ٹاک کے امریکی اثاثے چھوڑنے کے لیے ڈیڈ لائن 17 ستمبر تک بڑھا دی تھی، حالاں کہ قانون کے مطابق کسی اہم پیشرفت کے بغیر یا تو اثاثے فروخت کیے جانے تھے یا کمپنی شٹ ڈاؤن کی جانی تھی۔

    خفیہ معلومات افشا کرنے والے صحافی اپنے ذرائع بتائیں ورنہ ۔۔۔ ٹرمپ کی دھمکی

    ٹرمپ انتظامیہ ایک معاہدے پر کام کر رہی تھی جس کے تحت TikTok کے امریکی آپریشنز کو ایک نئی امریکی فرم میں تبدیل کیا جانا تھا، جو امریکی سرمایہ کاروں کے زیر انتظام ہوتی، لیکن اسے اس وقت روک دیا گیا جب چین نے اشارہ دیا کہ وہ اسے منظور نہیں کرے گا۔

    خیال رہے کہ صدر ٹرمپ ٹک ٹاک ایپ کی آخری تاریخ میں تین بار توسیع کر چکے ہیں، وہ گزشتہ نومبر کے صدارتی انتخابات میں نوجوان ووٹروں میں اپنی حمایت بڑھانے کا سہرا بھی اسی ایپ کو دیتے ہیں۔

  • ٹک ٹاک ڈیڈ لائن، ٹرمپ نے اہم فیصلہ کر لیا

    ٹک ٹاک ڈیڈ لائن، ٹرمپ نے اہم فیصلہ کر لیا

    واشنگٹن: وائٹ ہاؤس نے کہا ہے کہ صدر ٹرمپ نے ٹک ٹاک کی آخری تاریخ میں مزید 90 دن کی توسیع کا فیصلہ کیا ہے، اور اس سلسلے میں وہ حکم نامے پر دستخط کریں گے۔

    سی بی ایس نیوز کے مطابق وہ دو طرفہ قانون جو امریکا میں ٹک ٹاک پر مؤثر طریقے سے پابندی لگائے گا، ایک بار پھر تاخیر کا شکار ہو گیا ہے، اور ٹِک ٹِک کو اس کی چین میں مقیم پیرنٹ کمپنی بائٹ ڈانس سے الگ کرنے کی ڈیل اب بھی ابہام کا شکار ہے۔

    وائٹ ہاؤس کی پریس سیکریٹری کیرولین لیویٹ نے منگل کو کہا کہ صدر اس ہفتے تازہ ترین ایگزیکٹو آرڈر پر دستخط کریں گے، جس میں قانون کے نفاذ کو 90 دنوں کے لیے مؤخر کیا جائے گا۔ چینی کمپنی پر قومی سلامتی کے خدشات کی وجہ سے جنوری میں عائد کردہ پابندی کو یہ تیسری بار مؤخر کیا جا رہا ہے۔

    کیرولین لیویٹ نے کہا صدر ٹرمپ کئی بار کہہ چکے ہیں کہ وہ ٹک ٹاک کو بند نہیں کرنا چاہتے، یہ توسیع 90 دن تک رہے گی، اور انتظامیہ اس ڈیل کو یقینی بنانے کے لیے کام کرے گی، تاکہ امریکی عوام اس یقین دہانی کے ساتھ ٹک ٹاک کا استعمال جاری رکھ سکیں کہ ان کا ڈیٹا سلامت اور محفوظ ہے۔ خیال رہے کہ موجودہ توسیع جمعرات کو ختم ہو رہی ہے۔

    کیا موبائل فون کی بیٹری کو 100 فیصد چارج کرنا ٹھیک ہے؟

    امریکی محکمہ انصاف کو بھی ہدایت کی گئی ہے کہ وہ ایپل اور گوگل جیسی کمپنیوں کے خلاف اپنے پلیٹ فارمز سے اس ویڈیو شیئرنگ ایپ (ٹک ٹاک) کو ہٹانے میں ناکامی پر کارروائی نہ کرے اور نہ ہی ان پر جرمانے عائد کرے۔

    یاد رہے کہ جب ٹرمپ نے اپریل کے شروع میں آخری توسیع کا اعلان کیا تھا، تو ان کی انتظامیہ ایک ڈیل پر پہنچ گئی تھی، جس کے تحت امریکا میں ٹک ٹاک کے آپریشنز کو ایک نئی کمپنی میں تبدیل کیا جانا تھا، جس کی ملکیت امریکی سرمایہ کاروں کی اکثریت کے پاس ہوتی، لیکن پھر ٹرمپ ٹیرف کا اعلان کیا،تو چینی کمپنی بائٹ ڈانس نے وائٹ ہاؤس کو بتایا کہ جب تک کہ تجارت اور ٹیرف سے متعلق مسائل حل نہیں ہو جاتے، چین اس معاہدے کی مزید منظوری نہیں دے گا۔

  • ٹک ٹاک پر لائیو اسٹریم کے دوران بیوٹی انفلوئنسر کو قتل کردیا گیا

    ٹک ٹاک پر لائیو اسٹریم کے دوران بیوٹی انفلوئنسر کو قتل کردیا گیا

    میکسیکو کی 23 سالہ سوشل میڈیا بیوٹی انفلوئنسر کو ٹک ٹاک پر لائیو اسٹریمنگ کے دوران فائرنگ کر کے قتل کر دیا گیا ہے۔

    غیر ملکی خبر ایجنسی کے مطابق میکسیکو کے شہر زاپوپان میں 23 سالہ ولیریا مارکیز اپنے بیوٹی سلون سے ٹک ٹاک پر لائیو اسٹریم کر رہی تھیں اس دوارن کسی نے فائرنگ کردی۔

    میڈیا رپورٹ کے مطابق ٹک ٹاکر ولیریا کے انسٹاگرام اور ٹک ٹاک پر تقریباً 2 لاکھ سے زائد فالوورز تھے، انہوں نے لائیو اسٹریم کے دوران ایک پارسل وصول کیا اور کیمرے کے سامنے واپس آئیں مگر چند لمحوں بعد وہ اپنی کرسی پر خون میں لت پت گر گئیں اور لائیو ویڈیو جاری رہی۔

    20 سالہ لڑکی ٹک ٹاک ویڈیو بنانے پر بھائیوں کے ہاتھوں قتل

    دوسری جانب ریاستی پراسیکیوٹر نے کہا کہ ہم اس واقعے کے بعد ملزم فرار ہوچکا ہے لیکن یہ واقعہ ایک مشتبہ فیمیسائیڈ (Femicide) ہے، یعنی کسی خاتون کو صنفی بنیاد پر قتل کرنا ہے۔

    واضح رہے کہ میکسیکو میں صنفی بنیاد پر تشدد یا قتل کرنا بہت عام ہے، اقوام متحدہ کی رپورٹ کے مطابق ہر روز 10 خواتین یا لڑکیوں کو پارٹنرز یا کنبہ کے افراد کے ہاتھوں قتل کیا جاتا ہے۔

    غیر ملکی میڈیا کے مطابق خواتین پر بڑھتے ہوئے تشدد اور قتل کی وارداتوں نے ایک بار پھر میکسیکو کے نظام انصاف پر سوالیہ نشان کھڑا کردیا ہے۔

  • ٹک ٹاک کی جانب سے والدین کیلیے کارآمد فیچر متعارف

    ٹک ٹاک کی جانب سے والدین کیلیے کارآمد فیچر متعارف

    معروف سوشل میڈیا ایپلی کیشن ٹک ٹاک کی انتظامیہ ایک ایسا نیا فیچر متعارف کرا رہی ہے جس کے ذریعے والدین اپنے بچوں کی سرگرمیوں پر بہتر طریقے سے نظر رکھ سکیں گے۔

    اس فیچر کی بدولت نوجوانوں میں صحت مند ڈیجیٹل عادات کو فروغ دینے میں نہ صرف مدد ملے گی بلکہ والدین کے کنٹرول اور فلاح و بہبود کے ٹولز میں مزید اضافہ ہوگا۔

    رپورٹ کے مطابق یہ نئے کنٹرولز اور ویلنیس ٹولز ٹک ٹاک کے آن لائن سیفٹی اور اسکرین ٹائم کی ذمہ دارانہ حدود کے عزم کو مضبوط کرتے ہیں۔

    یہ اپ ڈیٹس ٹک ٹاک کے نئے کنٹرولز اور ویلنیس ٹولز اور آن لائن سیفٹی کے عزم کا حصہ ہیں، جو والدین کو بہتر نگرانی فراہم کرتے ہوئے ان کی فیملی پیئرنگ کی خصوصیت کو مزید بہتر بناتے ہیں۔

    1) ٹائم اَوے شیڈولنگ : اس فیچر کے ذریعے والدین اب خاص اوقات جیسے کہ اسکول کے اوقات، سونے کا وقت یا ویک اینڈز کے دوران بچوں کے ٹک ٹاک کے استعمال پر پابندی لگا سکتے ہیں۔ بچے ان سے اضافی وقت کی درخواست کر سکتے ہیں لیکن حتمی منظوری والدین کے پاس ہی ہوگی۔

    2) ٹین نیٹ ورک ویزیبلٹی : اب والدین یہ دیکھ سکتے ہیں کہ ان کا بچہ کس کو فالو کر رہا ہے یا کون اسے فالو کر رہا ہے، اور کن اکاؤنٹس کو بلاک کیا گیا ہے؟ اس طرح یہ آن لائن معاملات کے بارے میں کھلے مکالمے  ہوسکیں۔

    3) فعال رپورٹنگ الرٹس : اگر کوئی نو عمر صارف ایسا مواد رپورٹ کرتا ہے جو ٹک ٹاک کی گائیڈ لائنز کی خلاف ورزی کرتا ہو، تو وہ ایک قابل اعتماد شخص کو مطلع کر سکتا ہے، چاہے وہ فیملی پیرنگ فیچر آن بھی نہ ہو۔

    ٹک ٹاک نے 16 سال سے کم عمر صارفین کے لیے ونڈ ڈاؤن فیچر متعارف کرایا ہے تاکہ رات گئے تک مسلسل اسکرولنگ کی حوصلہ شکنی کی جا سکے۔

    رات 10 بجے کے بعد، "For You” فیڈ میں سکون بخش موسیقی اور نوٹسز دکھائے جائیں گے جو نوجوانوں کو لاگ آؤٹ کرنے کی ترغیب دیں گے۔ اگر وہ دیکھتے رہیں، تو بار بار یاد دہانیاں ظاہر ہوں گی، تاکہ سوچ سمجھ کر اسکرین استعمال ان کی عادت بنے۔

    انتطامیہ کا کہنا ہے کہ مستقبل میں اس میں گائیڈڈ میڈیٹیشن ایکسرسائزز بھی شامل کی جائیں گی، جو نیند کے بہتر معیار سے متعلق تحقیق کی بنیاد پر تیار کی جائیں گی۔

  • تخلیقی صلاحیت والے ٹک ٹاکرز کے لیے بڑا اعلان

    تخلیقی صلاحیت والے ٹک ٹاکرز کے لیے بڑا اعلان

    کراچی: ٹک ٹاک نے کری ایٹرز ایوارڈز 2024 کے لیے نامزدگیوں کا اعلان کر دیا۔

    سوشل میڈیا ایپ ٹک ٹاک کا یہ ایسا ایونٹ ہے جس کا شدت سے انتظار کیا جاتا ہے، اور جس میں ٹک ٹاک کمیونٹی کی تخلیقی صلاحیتوں، ٹیلنٹ اور جذبے کا جشن منایا تا ہے، اور ٹک ٹاک اس ایونٹ کے ذریعے بہترین کری ایکٹرز کو سامنے لاتا ہے۔

    پاکستانی صارفین ٹک ٹاک پر اپنے پسندیدہ نامزد کری ایٹرز کو ووٹ دے سکتے ہیں، اس میں حصہ لینے کے لیے صارفین ٹک ٹاک پر مخصوص ووٹنگ ہب تک رسائی حاصل کر سکتے ہیں، جہاں وہ ہر کیٹگری میں اپنے پسندیدہ نامزد کری ایٹر کا انتخاب کر سکیں گے اور اس کے حق میں اپنا ووٹ رجسٹر کروا سکیں گے۔

    شرکت کرنے والے صارفین ووٹنگ کے بعد اپنے پسندیدہ کری ایٹر کے لیے شیئرنگ کے ذریعے زیادہ سے زیادہ حمایت بھی حاصل کر سکتے ہیں، ووٹنگ کی مدت 10 فروری 2025 کو رات 11 بجکر 59 منٹ پر ختم ہوگی۔

    ٹک ٹاک ایوارڈز 2024 میں مختلف کیٹگریز میں غیر معمولی کانٹنٹ تخلیق کرنے والوں کو اعزازات سے نوازا جائے گا۔ اس سال کے نامزد افراد کا انتخاب اُن کی تخلیقی صلاحیتوں، کانٹنٹ کے اصل ہونے اور ٹک ٹاک کمیونٹی پر اس کے اثرات کی بنیاد پر کیا گیا ہے۔کیٹگریز اور نامزد افراد درج ذیل ہیں:

    کری ایٹر آف دی ایئر: دانیال کنول (@daniyakanwal)، عدیل چودھری (@adeelchaudry1)، مسٹر بیٹری (@mr_battery)، کین ڈول (@ken_doll_dubai)، آرزو فاطمہ (@arzufatima1)۔

    ایمرجنگ کری ایٹر آف دی ایئر: عباس بخاری (@abbasbukhari)، میران علی خان (@meeranalikhan)، محمد دانیال (@m1danial)، مینی ٹیک (@meenitech)، نور (@noor)۔

    لانگ فارم/1ایم ایم+ کنٹنٹ کری ایٹر آف دی ایئر: اسامہ خان (@techusama)، بلال منیر (@bilalmunir1995)، دانیال شیخ (@daniyal.sheikh1)، چودھری ولید رؤف (@chwaleedrauf) اور حافظ احمد (@hafizahmedpk) ۔

    فوڈ کری ایٹر آف دی ایئر: سمیع ایکس اسٹریٹ (@samixstreets)، خدیجہ ملک (@khadjia_malik)، آمنہ اشرف (@amnaashrafff)، چودھری دانش (@chdanishofficial)، قاسم خان(@i_am_qasim_khan)۔

    انٹرٹینمنٹ کری ایٹر آف دی ایئر: عبید (@ubed_sk007)، ردا نقاش (@ridakaghar)، تمکنت منصور (@tamkenatm)، سلمان نعمان (@salmannomanofficial)، اٹز برادرز وی لاگ (@itsbrothersvlog)۔

    بیوٹی اینڈ فیشن کری ایٹر آف دی ایئر: چودھری عبدالرحمٰن (@chaudhry_abdulrehman)، اعزاز حشتگمی /ہیش ٹیگ می (@aizazhashtagmi)، ذکیہ نور (@doctor_zakk)، ہمنہ زاہد (@samosiiii)، کائنات فیصل (@kainat_faisal)۔

    ٹریول کری ایٹر آف دی ایئر: آصف عاشور (@asif_ashoor)، ابرار حسن (@wildlensbyabrar)، زُنیر کمبوہ (@zunairkamboh)، زینتھ عرفان (@zenith.irfan)، لیئق عباس (@withlaeeq)۔

    سوشل امپیکٹ کری ایٹر آف دی ایئر: قاضی اکبر (@kaziakber)، بلال حسن (@)، آزاد چائے والا (@azadchaiwalaofficial)، حشام سرور (@hishamsarwar172)، حذیفہ علی (@hozyali)۔

    او جی کری ایٹر آف دی ایئر: ذوالقرنین سکندر (@ch.Zulqarnain)، جنت مرزا (@jannamirza)، اریکا حق (@areeka__haq)، سڈ ریپر (@sidmr.rapper4)، حارث علی (@harrisali_01)۔

    ٹک ٹاک آفیشل کے مطابق اس سال کے ایوارڈز میں پاکستان سے تعلق رکھنے والے ٹک ٹاک کری ایٹرز کے متنوع اور متحرک ٹیلنٹ کا جشن منایا جائے گا، جو لاکھوں افراد کے لیے متاثر کن کانٹنٹ تیار کرنے کی غرض سے اُن کی وابستگی کا اعتراف کرے گا۔

  • 15 سالہ ٹک ٹاکر لڑکی کا قتل ، قاتل کون نکلا؟

    15 سالہ ٹک ٹاکر لڑکی کا قتل ، قاتل کون نکلا؟

    کوئٹہ : سوشل میڈیا کے لیے ویڈیو بنانے پر 15 سال کی لڑکی کو قتل کردیا گیا، حرا کے قتل کا منصوبہ اس کے والد اور ماموں نے ملکر بنایا تھا۔

    تفصیلات کے مطابق کوئٹہ میں منع کرنے کے باوجود ویڈیو بنانے پر15 سالہ لڑکی حرا کو باپ اور ماموں نے قتل کردیا، بلوچی اسٹریٹ کے رہائشی انوار الحق نے بیٹی کو ماموں سےفائرنگ کرواکر قتل کیا۔

    پولیس نے لڑکی کے باپ اور ماموں کو گرفتار کرلیا اور دوران تفتیش ملزمان نے اعتراف جرم کرلیا ہے۔

    پولیس نے ملزمان کے خلاف مقدمہ درج کرکے کیس سیریس کرائم انویسٹگیشن وونگ کے حوالے کردیا ہے۔

    پولیس کا کہنا تھا کہ انوار الحق اپنے بیوی بچوں کے ہمراہ امریکہ شفٹ ہو گیا تھاچند روز قبل کوئٹہ آیا تھا، باپ نے اپنے سالے طیب علی کے ساتھ ملکر بیٹی کو قتل کرنے کا منصوبہ بنایا تھا۔

    حکام نے بتایا کہ ملزم اپنی بیٹی حرا کو گھر کے باہر لے گیا اور خود گھر کے اندر آیا، جس کے بعد لڑکی کے ماموں اور باپ نے فائرنگ کرکے اسے قتل کردیا،

    پولیس کا مزید کہنا تھا کہ ملزم نے بیٹی کو سوشل میڈیا پر ویڈیوز بنانے اور طرززندگی پرطیش میں آکرقتل کیا، 15سالہ مقتولہ حرا دوہری شہریت رکھتی تھی جبکہ مقتولہ کی والدہ اور 2 بہنیں امریکا میں مقیم ہیں۔

  • ٹک ٹاک انسٹال شدہ فون کی قیمت لاکھوں ڈالر ہونے کی وجہ کیا ہے؟

    ٹک ٹاک انسٹال شدہ فون کی قیمت لاکھوں ڈالر ہونے کی وجہ کیا ہے؟

    امریکا میں ٹک ٹاک ایپلی کیشن کی بحالی کے باوجود یہ ایپ اسٹورز پر دستیاب نہیں ہے، جس کی وجہ سے ٹک ٹاک انسٹال کیے ہوئے فونز مہنگے داموں بکنے لگے ہیں۔

    سی این این کے مطابق ہزاروں افراد نے ای کامرس کی ویب سائٹ ’ای بے‘ پر ٹک ٹاک انسٹال کیے ہوئے فونز ہوشربا قیمتوں پر فروخت کے لیے ویب سائٹ پر لسٹ کر دیے ہیں۔

    واضح رہے کہ امریکا میں ٹک ٹاک پر پابندی لگائے جانے کے بعد اسے موبائل ایپ اسٹورز سے بھی ہٹا لیا گیا تھا، تاہم تقریباً 12 گھنٹے بعد یہ پابندی تو ہٹ گئی لیکن ایپ اسٹورز پر یہ واپس نہیں آ سکا۔

    پابندی کے بعد جن افراد نے ایپ کو ڈیلیٹ کر دیا تھا یا کبھی انسٹال نہیں کیا تھا، وہ اب اسے دوبارہ ڈاؤن لوڈ نہیں کر سکتے، یہ بھی واضح نہیں ہے کہ ٹک ٹاک کی ایپ اسٹور پر واپسی کب ہوگی۔

    نیوز ویب سائٹ ’وائرڈ‘ کے مطابق ای بے پر ہزاروں اشتہارات سامنے آئے ہیں، جن میں ایپ انسٹال کیے ہوئے فونز فروخت کیے جا رہے ہیں، ان میں متعدد فونز ہزاروں ڈالر کی قیمت پر فروخت کے لیے لگائے گئے ہیں، یہاں تک کہ کچھ لوگ ایسے فونز کو 10 لاکھ ڈالر میں فروخت کرتے بھی دیکھے گئے۔

    ای بے پر موجود ایک اشتہار کے مطابق ٹک ٹاک انسٹال شدہ ایک فون 21 ہزار ڈالر کا فروخت ہوا۔ دل چسپ بات یہ ہے کہ جمعرات تک ٹک ٹاک والے فونز کے لیے ای بے پر 27 ہزار سے زائد سرچز بھی سامنے آئی ہیں، جس سے ان فونز کی مانگ میں اضافے کا اندازہ لگایا جا سکتا ہے۔