Tag: ٹیسٹ میچز

بابراعظم سے ٹیسٹ ٹیم کی کپتانی کیا چھنی ان سے فارم بھی روٹھ چکی ہے اور وہ پانچ روزہ میچز میں متواتر بری طرح ناکام نظر آرہے ہیں۔

بنگلہ دیش نے راولپندی میں ہونے والے پہلے ٹیسٹ میچ میں میزبان پاکستان کو 10 وکٹوں کی ہزیمت سے دوچار کیا تھا، میچ کی پہلی اننگز میں بابر صرف دو بالز کھیل کر صفر کی ہزیمت سے دوچار ہوئے تھے جو کہ ٹیسٹ میں ان کا آٹھواں ’ڈک‘ تھا۔

دوسری اننگز میں بھی پاکستان کے سابق ٹیسٹ کپتان بابر اعظم کوئی تاثر چھوڑنے میں ناکام رہے تھے اور محض 22 رنز ہی اسکور کرپائے تھے۔

اپنے ٹیسٹ کیریئر میں آٹھویں بار ’ڈک‘ حاصل کرنے والے بابراعظم پہلی بار بین الاقوامی ریڈ بال کرکٹ میں ہوم گراؤنڈ پر بغیر کوئی رن بنائے آؤٹ ہوئے۔

اس سے اندازہ لگایا جاسکتا ہے کہ اسٹار بیٹر اس وقت کتنی بری فارم کا شکار ہیں جو کہ پاکستان ٹیم کے لیے بھی تشویشناک بات ہے، بابر نے 2019 سے دسمبر 2022 کے درمیان کافی عمدہ پرفارمنس دی تھی اور ٹیسٹ میں ان کی اوسط 58.67 رہی تھی۔

اس عرصے میں بابر اعظم نے نہ صرف ہوم گراؤنڈ پر بلکہ پوری دنیا میں رنز کے ڈھیر لگائے، انھوں نے آسٹریلیا میں 50 سے زائد، انگلینڈ اور ویسٹ انڈیز میں تقریباً 50، سری لنکا میں تقریباً 70 اور پاکستان میں 80 سے زائد کی اوسط سے رنز بنائے۔

اس کے بعد سے ان کی اوسط گرنا شروع ہوئی اور 37.41 تک جاپہنچی، بابر نے آخری 9 ٹیسٹ میچز میں صرف ایک سو اور تین نصف سنچریاں اسکور کی ہیں۔

ریڈ بال کرکٹ میں ان کی خراب فارم دیگر فارمیٹس میں بھی ان کی کارکردگی پر اثر انداز ہورہی ہے 2023 کے ون ڈے ورلڈ کپ اور 2024 کے ٹی ٹوئنٹی ورلڈ کپ میں ان کی کارکردگی نہایت واجبی رہی تھی۔

آسٹریلیا کی باؤنسی پچز پر کسی بھی بیٹر کے لیے کھیلنا کافی مشکل ہوتا ہے، دنیا کے چند نامور بلے باز بھی کینگروز کے دیس میں کوئی تاثر چھوڑنے میں ناکام رہے۔

ٹیسٹ کرکٹ مقابلوں کا آغاز آج سے تقریباً ڈیڑھ سو سال قبل 1877 میں ہوا تھا۔ اس کے بعد سے اب تک آسٹریلیا کی باؤنسی پچز بیٹرز کو مشکلات میں ڈالنے کے لیے مشہور ہیں۔ اس دوران کئی عظیم بیٹرز آئے اور نہ صرف آسٹریلیا بلکہ دنیا بھر کی پچز پر اپنی عمدہ بیٹنگ سے دھاک بٹھائی۔

تاہم ماضی قریب اور دور حاضر کے تین عظیم بیٹرز ایسے ہیں جو آسٹریلیا میں ٹیسٹ سیریز کے دوران کوئی خاص تاثر چھوڑنے میں ناکام رہے اور باؤنسی پچز پر اکثر ناکامی ہی ان کے ہاتھ آئی۔

سچن ٹنڈولکر، کمار سنگاکارا، الیسٹر کک اور ویرات کوہلی سمیت بہت سے عظیم بلے بازوں نے آسٹریلیا کی مشکل کنڈیشنز میں اپنی بیٹنگ کا لوہا منوایا ہے۔

تاہم، کچھ ایسے بیٹرز بھی موجود ہیں جن کی صلاحیت کو عالمی سطح پر تسلیم کیا جاتا ہے، مگر آسٹریلیا میں کبھی بھی اپنی صلاحیتوں کے حساب سے نہیں کھیل پائے اور اچھی بیٹنگ کرنے سے قاصر رہے۔

اگر حالیہ سیریز کی بات کریں تو پاکستان کے ٹاپ بیٹر بابر اعظم اس کی بہترین مثال نظر آتے ہیں، تین میچوں کی ٹیسٹ سیریز کے لیے دورہ آسٹریلیا پر موجود بابر اب تک صرف 103 رنز ہی اسکور کرپائے ہیں جبکہ ان کی اوسط 20.60 ہے۔

حال ہی میں ٹیسٹ کرکٹ سے ریٹائر ہونے والے جنوبی افریقہ کے ڈین ایلگر نے اپنے کیریئر میں یوں تو 5347 رنز اسکور کیے مگر وہ آسٹریلیا میں بری طرح ناکام رہے۔ یہاں انھوں نے 13 ٹیسٹ اننگز میں 16.69 کی اوسط سے صرف اور صرف 217 رنز اسکور کیے۔

دنیائے کرکٹ کے جارح مزاج بیٹرز میں سے ایک نیوزی لینڈ کے برینڈن میک کولم بھی کینگروز کے دیس میں ناکامی سے دوچار رہے۔ سابق کیوی کپتان نے 17 ٹیسٹ اننگز میں 24.13 کی اوسط سے محض 389 رنز اپنے نام کے آگے درج کرائے۔

اس فہرست میں تیسرا نام بھارت کے لیجنڈ کپتان مہندر سنگھ دھونی کا ہے۔ وہ بھی آسٹریلیا میں ہمیشہ ناکامی سے دوچار نظر آئے۔ انھوں نے آسٹریلیا میں کھیلی جانے والی 18 اننگز میں 19.43 کی کم ترین اوسط سے صرف 311 رنز اسکور کیے۔

ٹیسٹ میچز کو کرکٹ کا سب سے مشکل فارمیٹ قرار دیا جاتا ہے، جہاں کسی بھی کرکٹر کے حوصلے اور ہمت کا امتحان ہوتا ہے۔ ان ہی بیٹرز اور بولرز کو عظیم گردانا جاتا ہے جن کی کاکردگی ٹیسٹ میچز میں عمدہ ہوتی ہے۔