واشنگٹن (13 اگست 2025): ترجمان امریکی محکمہ خارجہ ٹیمی بروس نے کہا ہے کہ غزہ میں ہلاک ہونے والے صحافیوں کے لیے انھیں افسوس ہے۔
گزشتہ روز پریس بریفنگ میں ٹیمی بروس نے کہا کہ غزہ میں جو صحافی پیشہ ورانہ خدمات انجم دے رہے ہیں ان کی ہم قدر کرتے ہیں تاہم حماس کے جنگ جو بھی صحافیوں کا روپ دھار کر عام لوگوں میں شامل ہو گئے ہیں۔
انھوں نے کہا غزہ میں صحافیوں کی ہلاکت پر افسوس ہے، غزہ میں جنگ بندی کی کوششیں کر رہے ہیں۔
ٹیمی بروس نے پاکستان امریکا اور بھارت کے تعلقات کی اہمیت پر سوال پر کہا ہمارا پاکستان اور بھارت کے ساتھ ایک تجربہ رہا ہے، پاکستان بھارت میں ایک تنازع تھا جو کسی انتہائی خوف ناک صورت حال میں بدل سکتا تھا، لیکن یہ ہمارے لیے فخر کا لمحہ تھا اور ایک بہترین مثال تھی کہ کس طرح ہم نے معاملے کو سنبھالا۔
’یوکرین ہار گیا، روس نے جنگ جیت لی‘
انھوں نے مزید کہا کہ اس معاملے کو وزیر خارجہ مارکو روبیو اور نائب صدر نے سنبھالا تھا، امریکا کی اعلیٰ قیادت نے ایک ممکنہ تباہی کو روکنے میں کردار ادا کیا، امریکی سفارت کار دونوں ممالک کے لیے پرعزم ہیں۔
ٹیمی بروس نے بتایا کہ پاکستان اور امریکا کے درمیان انسدادِ دہشت گردی کے حوالے سے مذاکرات ہورہے ہیں، اسلام آباد میں امریکا اور پاکستان نے دہشت گردی کے خلاف مشترکہ وابستگی کی تصدیق کی ہے، پاکستان امریکا نے دہشت گرد خطرات کا مقابلہ کرنے کے لیے تعاون بڑھانے کے طریقوں پر بات چیت کی، خطے اور دنیا کے لیے یہ اچھی خبر ہے کہ امریکا دونوں ممالک کے ساتھ کام کر رہا ہے، اور یہ ایک بہتر مستقبل کو فروغ دے گا۔
ان کا کہنا تھا کہ صدر ٹرمپ پوری دنیا میں تنازعات کا خاتمہ اور امن چاہتے ہیں، وزیر خارجہ مارکو روبیو اور روسی وزیر خارجہ کی بات ہوئی ہے، امریکی روسی وزرائے خارجہ میں صدر ٹرمپ اور صدر پیوٹن کی ملاقات کی تیاریوں کے حوالے سے بات چیت ہوئی،
آرمینیا اور آذربائیجان کے درمیان معاہدہ ثابت کرتا ہے کہ صدر ٹرمپ امن کے صدر ہیں، وہ کہہ چکے ہیں کہ روس یوکرین کی جنگ کا خاتمہ چاہتے ہیں۔
