Tag: ٹیم تشکیل

لاہور : ایون فیلڈ ریفرنس کے مرکزی مجرموں نواز شریف اور مریم نواز کی وطن واپسی کے موقع پر نیب نے ان کی گرفتاری کیلئے ٹیم تشکیل دے دی، ٹیم میں نیب کےنو افسران سمیت دیگر پولیس افسران شامل ہوں گے۔

تفصیلات کے مطابق نیب نے سابق وزیراعظم نوازشریف اور مریم نواز کی وطن واپسی پر گرفتاری کی حکمت عملی اور تیاریاں مکمل کر لیں، بڑی کرپشن کے بڑے مجرموں کی گرفتاری کیلئے نیب نے ٹیم تشکیل دے دی۔

ذرائع کا کہنا ہے کہ نیب کی16رکنی ٹیم کی سربراہی ڈائریکٹر امجد علی اولکھ کریں گے، ٹیم میں نیب کے نو افسران سمیت دیگر پولیس افسران شامل ہونگے، نیب ٹیم نواز شریف اور مریم نواز کو لاہور ائیر پورٹ سے گرفتار کرے گی۔

مجرمان کی اسلام آباد منتقلی کیلئے ہیلی کاپٹر کے انتظامات بھی مکمل کر لیے گئے ہیں جبکہ جج احتساب عدالت کو 13 جولائی بروز جمعہ اڈیالہ جیل پہنچنے کیلئے خط ارسال کر دیا گیا ہے۔

ڈی جی نیب لاہور شہزاد سلیم تمام کارروائی کی خود نگرانی کریں گے، ذرائع کے مطابق نیب دفترمیں سیکیورٹی اہلکاروں کوالرٹ رہنےکی ہدایات جاری کردی گئی ہیں، اس کے علاوہ نیب افسران کوبھی13جولائی کو نیب آفس میں رہنےکی ہدایت کی گئی ہے۔

نگراں وزیر داخلہ پنجاب نے کہا ہے کہ اس سلسلے میں بڑی تعداد میں کنٹینر منگوالیے گئے ہیں، لیگی کارکنوں نے گڑبڑ کی تو رینجرز ایکشن میں آئے گی۔

دوسری جانب ن لیگ نے بھی اپنے قائد کے استقبال کیلئے تیاریاں مکمل کرلیں ہیں۔ حمزہ شہباز کا کہنا ہے کہ پوری قوم نوازشریف اور مریم نواز کے استقبال کیلئے گھروں سے باہر نکلے گی۔

خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔