ورلڈکپ کے لیے ٹیم کے انتخاب میں مفادات کے ٹکراؤ کے حوالے سے الزامات سامنے آنے کے بعد پی سی بی نے تحقیقات کے لیے کمیٹی بنا دی۔
پاکستان کرکٹ بورڈ کے آفیشل ٹوئٹر اکاؤنٹ پر جاری اعلامیے کے مطابق آئی سی سی ایونٹ کے لیے ٹیم کو منتخب کرنے کے حوالے سے مفادات کے ٹکراؤ کی خبریں ذرائع ابلاغ کی زینت بننے کے بعد بورڈ نے تحقیقات کرنے کا حتمی فیصلہ کرلیا ہے۔
سوشل میڈیا پلیٹ فارم ایکس پر جاری بیان میں کہا گیا کہ ’پاکستان کرکٹ بورڈ نے ٹیم کے انتخاب کے عمل سے متعلق میڈیا میں رپورٹ ہونے والے مفادات کے ٹکراؤ کے حوالے سے الزامات کی تحقیقات کے لیے پانچ رکنی تحقیقاتی کمیٹی تشکیل کی ہے۔
پی سی بی کے بیان میں مزید کہا گیا کہ ’کمیٹی اپنی رپورٹ اور سفارشات پی سی بی کی انتظامیہ کو جلد پیش کرے گی۔‘
پاکستان کرکٹ بورڈ نےٹیم کے انتخاب کے عمل سے متعلق میڈیا میں رپورٹ ہونے والے مفادات کے ٹکراؤ کے حوالے سے الزامات کی تحقیقات کے لیے پانچ رکنی تحقیقاتی کمیٹی تشکیل کی ہے۔
کمیٹی اپنی رپورٹ اور سفارشات پی سی بی کی انتظامیہ کو جلد پیش کرے گی۔
— PCB Media (@TheRealPCBMedia) October 30, 2023
واضح رہے کہ مفادات کے ٹکراؤ کی خبریں سامنے آنے کے بعد قومی ٹیم کے چیف سلیکٹر انضمام الحق نے عہدے سے استعفیٰ دے دیا ہے۔
اے آر وائی نیوز کے مطابق قومی ٹیم کے چیف سلیکٹر انضمام الحق چیئرمین پی سی بی ذکا اشرف سے ملاقات کے لیے آئے تھے لیکن ان کی ملاقات نہ ہوسکی۔
ذرائع کا کہنا ہے کہ انضمام الحق نے دلبرداشتہ ہوکر اپنا استعفیٰ ذکا اشرف کو بھجوا دیا۔ انضمام کہا کہ مجھ پر سوال اٹھے گا تو بہتر ہے ایک طرف ہوجاؤں، پی سی بی انکوائری کرنا چاہتا ہے تو دستیاب ہوں۔