Tag: ٹیچر

ایمن آباد: پنجاب کے شہر گجرانوالہ میں سرکاری اسکول ٹیچر نے آٹھویں جماعت کے طالب علم پر وحشیانہ تشدد کرکے بازو توڑ دیا، اہلخانہ نے انتظامیہ سے نوٹس لینے کا مطالبہ کیا ہے۔

تفصیلات کے مطابق گجرانوالہ کے علاقے ایمن آباد میں سرکاری اسکول ٹیچر نے آٹھویں جماعت کے طالب علم کو وحشیانہ تشدد کا نشانہ بنایا جس سے طالب علم اصغر کا بازو ٹوٹ گیا۔

متاثرہ طالب علم اصغر کا کہنا ہے کہ وہ ٹیچر جنید سے پوچھ کر بخار کی وجہ سے دوائی لینے گیا لیکن جب وہ واپس آیا تو پریڈ تبدیل ہو چکا تھا اور ٹیچر شفیق سبحانی بچوں کو پڑھا رہے تھے، مجھے دیکھتے ہی وہ آگ بگولہ ہوگئے اور خوب تشدد کا نشانہ بنایا۔

طالب علم نے بتایا کہ جب وہ کلا س میں داخل ہوا تو ٹیچر شفیق سبحانی نے تھپڑوں، مکوں اور ڈنڈوں سے بدترین تشدد کا نشانہ بنانا شروع کر دیا جس سے اس کے بائیں بازو کی ہڈی ٹوٹ گئی۔

سرگودھا: ٹیچر کا 8 سالہ طالبہ پر تشدد، سر کے بال کاٹ دیے

علی اصغر کے مطابق وہ کلاس ٹیچر شفیق سبحانی کو کہتا رہا کہ اس کا بازو ٹوٹ گیا ہے لیکن اس کے باوجود وہ اسے تشدد کا نشانہ بناتے رہے، بچوں کے اہلخانہ نے محکمہ ایجوکیشن سے واقعے کا نوٹس لینے کا مطالبہ کیا ہے۔

خیال رہے کہ اساتذہ کا طالب علموں پر تشدد کوئی نئی بات نہیں اس سے قبل بھی ملک کے مختلف شہروں میں اس طرح کے واقعات پیش آچکے ہیں، رواں سال اپریل میں صوبہ پنجاب کے شہر سرگودھا میں اسکول ٹیچر نے تیسری جماعت کی 8 سالہ طالبہ کو تشدد کا نشانہ بناتے ہوئے اس کے بال کاٹ دیے تھے۔

سرگودھا: صوبہ پنجاب کے شہر سرگودھا میں اسکول ٹیچر نے تیسری جماعت کی 8 سالہ طالبہ کو تشدد کا نشانہ بناتے ہوئے اس کے بال کاٹ دیے، محکمے کے افسران نے والد کی شکایت سننے سے انکار کر دیا۔

تفصیلات کے مطابق افسوسناک واقعہ سرگودھا کے علاقے شاہ پور میں پیش آیا، جہاں گرلز اسکول میں ٹیچر نے تیسری جماعت کی طالبہ کو تشدد کا نشانہ بناتے ہوئے بچی کے بال کاٹ دیے۔

ذرائع کے مطابق متاثرہ بچی کی عمر 8 سال ہے جو نواحی گاؤں بھاگڑ پنڈی کے رہائشی سکندر حیات کی بیٹی ہے۔ عائشہ کو ٹیچر نے تشدد کا نشانہ بنایا اور استفسار پر ٹیچر نے بچی پر دوبارہ تشدد کرتے ہوئے اس کے بال بھی کاٹ دیے۔

والد کی جانب سے شکایت پر ہیڈ ماسٹر نے انہیں دھمکیاں دیں جبکہ ڈپٹی ڈسٹرکٹ آفیسر زنانہ نے معاملہ کی تحریری درخواست پر بھی کوئی نوٹس نہیں لیا۔ طالبہ کے والد سکندر حیات نے ضلعی انتظامیہ اور اعلیٰ حکام سے واقعہ کی تحقیقات کر کے ذمہ داران کے خلاف کاروائی کا مطالبہ کیا ہے۔

خیال رہے کہ طلبا پر تشدد کا یہ پہلا واقعہ نہیں، پاکستان میں‌ طلبا پر تشدد قانوناً جرم ہے اس کے باوجود اس نوع کے واقعات میں کمی واقع نہیں ہوئی۔

گزشتہ ماہ لاہور میں رائیونڈ گورنمنٹ ایلمنٹری اسکول دربار بابا رحمت شاہ میں بھی ایک ٹیچر نے بچی پر بہیمانہ تشدد کرتے ہوئے اس کے سر پر ڈنڈا دے مارا تھا، جس سے طالبہ بے ہوش ہوگئی۔

حالت غیر ہونے پر اساتذہ نے 9 سال کی سحرش کو فوری طورپر مقامی اسپتال منتقل کر دیا تھا، والدین کے اسپتال پہنچنے پر اسکول انتظامیہ بچی کو چھوڑ کر چلی گئی تھی۔