ARYNews.tv | Urdu – Har Lamha Bakhabar

Tag: ٹیکساس

  • ٹیکساس: اسکول میں مسلح نوجوان کی فائرنگ سے بچوں سمیت 20 ہلاک

    ٹیکساس: اسکول میں مسلح نوجوان کی فائرنگ سے بچوں سمیت 20 ہلاک

    ٹیکساس: امریکی ریاست ٹیکساس کے شہر یوالڈے کے ایک اسکول میں فائرنگ سے 18 بچوں سمیت 20 افراد ہلاک ہو گئے۔

    تفصیلات کے مطابق ایک مسلح نوجوان نے منگل کے روز جنوبی ٹیکساس کے ایک ایلیمنٹری اسکول میں فائرنگ کر دی، جس سے کم از کم 18 بچے اور ایک بالغ ہلاک ہو گیا، جوابی فائرنگ میں حملہ آور بھی ہلاک ہو گیا۔

    یہ امریکا میں اجتماعی قتل کا ایک اور بڑا واقعہ ہے، ریاست ہائے متحدہ امریکا ایک وبائی مسلح تشدد کی لپیٹ میں ہے۔

    ٹیکساس کے گورنر گریگ ایبٹ نے کہا کہ مشتبہ حملہ آور کو، جس کی شناخت 18 سالہ سلواڈور راموس کے نام سے ہوئی ہے، پولیس اہل کاروں نے جائے وقوعہ پر جوابی کارروائی کرتے ہوئے ہلاک کر دیا، جب کہ گولیاں لگنے سے 2 اہل کار بھی زخمی ہو گئے ہیں۔

    حکام کے مطابق حملہ آور اکیلا تھا اور فوری طور پر قتل عام کے محرکات معلوم نہیں ہو سکے، جب کہ قاتل کی فائرنگ سے مرنے والے طلبہ کی عمریں 7 سے 10 کے درمیان تھیں۔ رپورٹس کے مطابق حملہ آور طالب علم نے اسکول آنے سے پہلے اپنی دادی پر بھی گولیاں چلائیں تھیں۔

    سان انتونیو کے مغرب میں تقریباً 80 میل کے فاصلے پر ٹیکساس کے شہر اوولڈے میں واقع روب ایلیمنٹری اسکول میں صبح سویرے ہونے والی فائرنگ کے حالات کے بارے میں سرکاری تفصیلات تاحال نامکمل ہیں۔

    محض 10 دن قبل نیویارک کے علاقے بفیلو میں ایک نسل پرست کی فائرنگ سے 10 سیاہ فام ہلاک ہوئے تھے، اس کیس میں حکام نے ایک 18 سالہ شخص پر فرد جرم عائد کی ہے جو سینکڑوں میل کا سفر طے کر کے بفیلو پہنچا تھا اور ایک گروسری اسٹور پر اسالٹ طرز کی رائفل سے فائرنگ کی تھی۔

    گورنر ایبٹ کا کہنا ہے کہ مشتبہ شخص کے بارے میں خیال کیا جاتا ہے کہ وہ فائرنگ کرنے سے پہلے اپنی گاڑی چھوڑ کر ہینڈگن اور ممکنہ طور پر رائفل سے لیس اسکول میں داخل ہوا تھا۔

    ٹیکساس کے پبلک سیفٹی ڈپارٹمنٹ کے سارجنٹ ایرک ایسٹراڈا نے سی این این پر ایک انٹرویو کے لیے پیش ہوتے ہوئے کہا کہ پولیس نے مشتبہ شخص کو ایک کار سے نکلتے ہوئے دیکھا جسے اس نے اسکول کے قریب کریش کر دیا تھا، اس کے پاس ایک رائفل اور ایک بیگ تھا، وہ جنوب کی جانب سے اسکول میں داخل ہوا اور فائرنگ شروع کردی، ایسٹراڈا کے مطابق حملہ آور نے باڈی آرمر پہنا ہوا تھا۔

    امریکی میڈیا کا کہنا ہے کہ تفتیش کاروں کا خیال ہے کہ راموس نے اسکول جانے سے پہلے اپنی دادی کو گولی مار کر ہلاک کر دیا تھا۔

    واضح رہے کہ قتل عام کے پے در پے واقعات کے بعد امریکا میں گن کنٹرول کے لیے سخت قانون سازی کا مطالبہ زور پکڑنے لگا ہے۔

  • 2 سالہ بیٹے کو موبائل فون دینا خاتون کو نہایت مہنگا پڑ گیا

    2 سالہ بیٹے کو موبائل فون دینا خاتون کو نہایت مہنگا پڑ گیا

    ٹیکساس: اپنے دو سالہ بیٹے کو موبائل فون دینا خاتون کو نہایت مہنگا پڑ گیا، بچے نے 31 چیز برگر آرڈر کروالیے۔

    تفصیلات کے مطابق امریکی ریاست ٹیکساس کے شہر کنگزویل میں ایک 2 سالہ بچے نے ماں کے علم کے بغیر ڈور ڈیش کے ذریعے مقامی میکڈونلڈز سے 31 چیز برگر منگوا لیے۔

    بچے کی ماں کیلسے برخالٹر گولڈن نے اس حوالے سے فیس بک پر ایک پوسٹ کی ہے جس میں دی ہوئی تصویر میں دو سالہ بچہ بہت سارے برگرز کے ساتھ ایک میز پر بیٹھا ہوا ہے۔

    خاتون گولڈن نے بتایا کہ ان کے بیٹے بیرٹ نے اس کا فون لیا اور اس کے علم میں لائے بغیر DoorDash پر آرڈر دے دیا، گولڈن نے کہا میرا بیٹا فون سے کھیل رہا تھا، میں نے سوچا کہ وہ تصویریں لے رہا ہے لیکن جب میں نے اس پر نظر ڈالی تو یہ پتا چلا کہ اس نے فون سے کھیل کھیل میں آرڈر دے دیا ہے۔

    اگرچہ کچھ والدین اس صورت حال پر پریشان ہو سکتے ہیں، تاہم گولڈن نے فراخ دلی کا مظاہرہ کیا، اور فیس بک پر جا کر برگر کی پیش کر دی کہ اگر کوئی کھانا چاہتا ہے تو وہ آ کر لے جا سکتا ہے۔

    تاہم بچے کی ماں اب اس بات کو بھی یقینی بنانے کے لیے احتیاطی تدابیر اختیار کرنے لگی ہیں کہ یہ صورت حال دوبارہ کبھی پیش نہ آئے، گولڈن نے کہا میرا اندازہ ہے کہ مجھے ایپ چھپانے کی ضرورت ہے کیوں کہ یہ محفوظ نہیں ہے۔

  • امریکی بحریہ کا لڑاکا طیارہ گھر پر گر کر تباہ

    امریکی بحریہ کا لڑاکا طیارہ گھر پر گر کر تباہ

    ٹیکساس: امریکی بحریہ کا ایک لڑاکا طیارہ ٹیکساس میں ایک گھر پر گر کر تباہ ہو گیا۔

    تفصیلات کے مطابق امریکی ریاست ٹیکساس کے شہر لیک ورتھ میں امریکی بحریہ کا لڑاکا طیارہ گر کر تباہ ہو گیا۔

    رپورٹ کے مطابق بحریہ کا ٹی 45 گوشاک طیارہ تربیتی مشن پر تھا کہ ٹیکساس کے شہر لیک ورتھ میں گر کر تباہ ہو گیا۔

    یہ واقعہ اتوار کی صبح کو پیش آیا، طیارے میں موجود دونوں فوجی پائلٹس شمالی ٹیکساس کے ایک گھر کے پچھلے حصے میں طیارے کے گرنے سے قبل ہنگامی طور پر نکل آئے تھے، تاہم وہ گر کر شدید زخمی ہو گئے۔

    طیارہ حادثے کی وجہ سے تین گھروں کو شدید نقصان پہنچا، مقامی حکام نے پریس کانفرنس میں بتایا کہ حادثے میں کوئی شہری زخمی نہیں ہوا، تاہم ایک پائلٹ کا پیراشوٹ بجلی کی لائن میں پھنس گیا، جب کہ دوسرا بھی قریب ہی ملا، پولیس حکام کے مطابق ایک پائلٹ کی حالت تشویش ناک ہے۔

    رپورٹس کے مطابق دونوں پائلٹس میں ایک انسٹرکٹر تھا جب کہ دوسرا ان کا زیر تربیت طالب علم تھا، امریکی حکام کا کہنا ہے کہ طیارہ تباہ ہونے کی وجہ جاننے کے لیے تحقیقات کا آغاز کر دیا گیا ہے۔

  • ہیلی کاپٹر حادثے کے وقت پائلٹ پُر سکون رہا، حیران کن ویڈیو

    ہیلی کاپٹر حادثے کے وقت پائلٹ پُر سکون رہا، حیران کن ویڈیو

    ٹیکساس: امریکا میں ایک ہیلی کاپٹر حادثے کے وقت پائلٹ کا پُر سکون انداز اس وقت سوشل میڈیا پر بے حد مقبول ہو گیا جب اس حادثے کی ویڈیو سامنے آئی، پائلٹ نے ہیلی کاپٹر کریش ہونے کے بعد کہا ’اس کے لیے معذرت دوستو!‘۔

    تفصیلات کے مطابق امریکی ریاست ٹیکساس میں ایک پائلٹ نے نہایت پُر سکون انداز میں ہیلی کاپٹر کریش کر کے لوگوں کو حیران کر دیا، ویڈیو دیکھ کر لوگوں نے پائلٹ کی بے حد پذیرائی کی۔

    یو ٹیوب پر پوسٹ ہونے والی تین منٹ کی ویڈیو میں دیکھا جا سکتا ہے کہ 9 جنوری کو البانے، ٹیکساس میں پیش آئے واقعے میں ماہر پائلٹ کس طرح بے حد پُر سکون طریقے سے رابنسن R44 ہیلی کاپٹر کریش کو سنبھالتا ہے۔

    وائرل ہونے والی ویڈیو میں دیکھا جا سکتا ہے کہ پائلٹ نے ایک ہوائی پٹی سے ہیلی کاپٹر اڑایا، سب کچھ ٹھیک لگ رہا تھا، کہ اچانک اس نے بائیں جانب کی طرف رخ کر لیا، اور پھر بیپنگ کا شور ہوا، چند ہی سیکنڈز بعد اس کی بلندی میں تیزی سے کمی آنے لگی اور پائلٹ اسے کنٹرول کرنے کی کوشش کرنے لگا، لیکن آخر کار ہیلی کاپٹر خشک گھاس والی زمین پر گر گیا۔

    کریش ہونے کے باوجود ہیلی کاپٹر نے آگ نہیں پکڑی، اور وہ سیدھا ہی زمین پر پڑا رہا، حادثے میں ہیلی کاپٹر کو کافی نقصان پہنچا، تاہم اس میں موجود ایک پائلٹ اور دو سوار بالکل محفوظ رہے۔ حادثے کے بعد ایک آواز نے پوچھا، سب لوگ ٹھیک ہیں؟ سب نے خیریت سے مطلع کیا تو پائلٹ نے کہا ’اس کے لیے معذرت دوستو!‘

    پائلٹ نے بعد میں ایوی ایشن سیفٹی نیٹ ورک کو رپورٹ کرتے ہوئے کہا کہ یہ اس ہیلی کاپٹر کی دن میں تیسری پرواز تھی، لیکن یہ اڑان ناخوش گوار رہی، زمین سے تقریباً 120 فٹ اونچائی پر انجن سے آوازیں آنے لگیں اور پھر وہ مکمل طور پر فیل ہو گیا۔

  • دو امریکی ریاستوں میں کرونا پابندیاں ختم کرنے کا اعلان، سی ڈی سی کا اظہار تشویش

    دو امریکی ریاستوں میں کرونا پابندیاں ختم کرنے کا اعلان، سی ڈی سی کا اظہار تشویش

    ٹیکساس: امریکا نے دو ریاستوں میں کرونا وبا کی پابندیاں ختم کرنے کا اعلان کر دیا۔

    تفصیلات کے مطابق امریکا کی ریاست ٹیکساس اور مسی سپی میں کرونا پابندیاں ختم کرنے کا اعلان کر دیا گیا۔

    امریکی میڈیا کا کہنا ہے کہ ٹیکساس میں کاروبار اگلے ہفتے مکمل بحال کر دیا جائے گا، جب کہ ریاست مسی سپی میں کل سے تمام کاروبار کھول دیا جائے گا۔

    تاہم سینٹر فار ڈیزیز کنٹرول (سی ڈی سی) کی ڈائریکٹر ڈاکٹر روشیل والسنکی نے ان ریاستوں میں کرونا وبا سے متعلق اقدامات واپس لینے پر تشویش کا اظہار کیا ہے۔

    انھوں نے کہا کہ سخت محنت کے بعد کرونا وائرس پر قابو پانے میں جو کامیابی حاصل کی گئی ہے، اسے کھونے کا خدشہ ہے، انھوں نے ریاستوں سے کہا ہے کہ پابندیاں ہٹانے میں جلد بازی نہ کی جائے۔

    انھوں نے وائٹ ہاؤس میں نیوز بریفنگ کے دوران کہا جنوری سے کو وِڈ 19 کے کیسز میں ہم جو کمی دیکھ رہے تھے، اب وہ پھر سے روزانہ 70 ہزار نئے کیسز میں تبدیل ہو چکی ہے۔

    دوسری جانب امریکی صدر جو بائیڈن نے کہا ہے کہ زندگی اگلے سال سے پہلے نارمل نہیں ہو سکے گی۔

    واضح رہے کہ امریکا میں کرونا وائرس کے مجموعی کیسز کی تعداد اب 2 کروڑ 93 لاکھ، 84 ہزار ہو چکی ہے، جب کہ اموات کی تعداد بڑھ کر 5 لاکھ 29 ہزار 500 ہو گئی ہے۔

    گزشتہ روز امریکا بھر میں کرونا سے ہونے والی نئی اموات کی تعداد 1,989 ہے، جب کہ 57 ہزار کے قریب کیسز سامنے آئے۔

  • رحم دلی بانٹنے والی مشہور اسکول ٹیچر کی موت نے لوگوں کو اداس کر دیا

    رحم دلی بانٹنے والی مشہور اسکول ٹیچر کی موت نے لوگوں کو اداس کر دیا

    ٹیکساس: ملکی سطح پر اپنے اسکول کے بچوں کی ایک ویڈیو سے مشہور ہونے والی ٹیچر نے کرونا انفیکشن سے لڑتے ہوئے جان ہار دی۔

    امریکی میڈیا کے مطابق ریاست ٹیکساس کے شہر الپاسو کی مشہور استانی کرونا کی وجہ سے جان ہار گئیں، انھوں نے 2018 میں اپنے اسکول کے بچوں کی ایک دل موہ لینے والی ویڈیو بنا کر سوشل میڈیا پر شیئر کی تھی، ویڈیو وائرل ہونے کی وجہ سے وہ امریکا بھر میں مشہور ہو گئی تھیں۔

    35 سالہ زیلین بلانکس نے دو سال قبل ایلمنٹری اسکول میں پہلی جماعت کے بچوں کی ایک ویڈیو بنائی، بچوں کو گڈ مارننگ یا گڈ بائی میں سے ایک کا انتخاب کر کے ایک دوسرے کے گلے لگنا تھا، یا ہاتھ ملانا تھا، یا تالی بجانی تھی یا مکے لڑانے تھے۔

    ٹویٹر پر یہ ویڈیو شیئر کرتے ہوئے زیلین بلاکس نے لکھا کہ ہفتے کے اختتام کا یہ کتنا خوب صورت طریقہ ہے، انھوں نے مقامی میڈیا کو بتایا تھا کہ وہ بچوں کو یہ محسوس کرانا چاہتی تھیں کہ وہ ایک محفوظ جگہ پر پڑھ رہے ہیں اور محفوظ ماحول میں سیکھ رہے ہیں۔

    دلوں کو موہ لینے والی اور بچوں کی اس پسندیدہ ٹیچر کا 20 اکتوبر کو کرونا وائرس کا ٹیسٹ مثبت آ گیا تھا، شروع میں ان کی طبیعت خراب ہوئی لیکن علاج سے سنبھل گئی، اور وہ اپنا خیال خود رکھنے لگیں لیکن پھر ان کی طبعیت اچانک بہت خراب ہو گئی اور انھیں آئی سی یو میں منتقل کرنا پڑا۔

    آخر کار 9 ہفتے آئی سی یو میں گزارنے اور دو ماہ کرونا وائرس سے لڑتے لڑتے انھوں نے پیر 28 دسمبر کو جان ہار دی۔

    اسکول کی پرنسپل کرسٹینا سانشے شاویرا نے میڈیا کو بتایا کہ وہ ہمیشہ رحم دلی بانٹتی تھی، وہ بہت زیادہ پیار کرنے والی شخصیت تھی، ان کے چھوٹے چھوٹے اقدامات نے بھی بہت سے لوگوں کو ان کا گرویدہ کر دیا تھا۔

    انھوں نے مزید بتایا کہ اسکول کے بچے ان کے ساتھ بہت مطمئن اور خوش رہتے تھے، یہ اس ویڈیو میں بھی دیکھا جا سکتا ہے۔

  • بیوی 41 برس سے شوہر کے لنچ سے ایک لقمہ کیوں کھاتی ہے، وجہ جان کر آپ حیران رہ جائیں گے

    بیوی 41 برس سے شوہر کے لنچ سے ایک لقمہ کیوں کھاتی ہے، وجہ جان کر آپ حیران رہ جائیں گے

    ٹیکساس: کبھی کبھی میاں بیوی کے پیار کے عجیب قصے سامنے آتے ہیں، امریکا میں بھی ایسے ہی ایک جوڑے کے درمیان پیار کا یہ حیران کن قصہ سامنے آیا ہے۔

    امریکی ریاست ٹیکساس میں ایک خاتون ٹریسی ہاویل 41 سالوں سے شوہر کو لنچ بھجوانے سے قبل اس میں سے ایک لقمہ کھا لیتی ہیں، جب لوگوں کو اس کی وجہ سے معلوم ہوئی تو وہ حیران رہ گئے۔

    یہ خاتون چار عشروں سے جب بھی اپنے شوہر  کلف فورڈ کے لیے لنچ پیک کرتی ہیں تو پہلے اس میں سے ایک لقمہ کھانا کبھی نہیں بھولتیں۔

    ٹریسی ہاویل نے اس سلسلے میں فیس بک پر ایک پوسٹ کی اور اپنی عجیب عادت کے بارے میں لوگوں کو بتایا، انھوں نے بتایا کہ وہ ٹیکساس میں رہائش پذیر ہیں، اور وہ اکتالیس برس سے اپنے میاں کے لیے لنچ پیک کرتے ہوئے اس میں سے ایک لقمہ ضرور لیتی ہیں۔

    اس پوسٹ کے ساتھ انھوں نے ایک تصویر بھی شیئر کی جس میں ایک برگر نظر آتا ہے جس کے ایک کونے سے ایک ٹکڑا کھایا گیا ہے، خاتون کا کہنا تھا کہ یہ دراصل ان کے شوہر کا لنچ ہے، ایک مرتبہ جب میں ان کے آفس گئی تھی تو میرے شوہر نے کہا تھا جس کے ساتھ آپ پیار کرتے ہیں اگر اس کے ساتھ لنچ شیئر کرو تو اس کا مزہ بڑھ جاتا ہے۔

    Clifford and I have been married almost 41 years and I have made his lunch every working day since day 1.
    On occasion I…

    Posted by Tracy Howell on Tuesday, December 1, 2020

    یہ پوسٹ اتنی دل چسپ تھی کہ بڑی تعداد میں لوگوں نے اسے پسند کیا، ٹریسی نے بتایا کہ وہ پہلے دن سے ہی شوہر کے لیے لنچ تیار کر کے بھیجتی ہیں، لیکن شوہر کی بات کے بعد ایک مرتبہ انھوں نے لنچ پیک کرتے وقت  برگر میں سے ایک لقمہ کھا کر بھیج دیا۔

    جب شوہر گھر آئے تو انھوں نے کہا کہ کسی نے ان کے لنچ میں سے لقمہ کھا لیا تھا، لیکن ٹریسی نے بتایا کہ وہ لقمہ انھوں نے ہی کھایا تھا کیوں کہ وہ انھیں جوائن نہیں کرپاتی، اور اس طرح لنچ شیئر کر لیا، اس کے بعد لقمہ کھایا ہوا لنچ بھیجنا انھوں نے اپنی عادت بنا لیا۔

  • اسکول سے غیر حاضر بچوں کے گھر جب پولیس پہنچی تو کیا دیکھا……..دل دہلادینے والی خبر

    اسکول سے غیر حاضر بچوں کے گھر جب پولیس پہنچی تو کیا دیکھا……..دل دہلادینے والی خبر

    ٹیکساس: امریکا کے شہر ٹالٹی میں ایک خاتون اچانک گھر میں گر کر مر گئیں، ان کے دو چھوٹے بچے یہ دیکھ کر ڈر گئے اور انھوں نے خود کو گھر میں بند کر لیا۔

    تفصیلات کے مطابق دو چھوٹے بچے گھر میں اپنی مردہ ماں کے پاس پائے گئے، معلوم ہوا کہ بچوں کی ماں کئی دن قبل فرش پر گر کر مر گئی تھیں۔

    یہ دل دوز واقعہ امریکی ریاست ٹیکساس کے شہر ٹالٹی میں پیش آیا، مقامی حکام کا کہنا تھا کہ بچے اسکول سے غائب تھے تو اساتذہ نے ان کی 71 سالہ ماں کونی ٹیلر سے رابطہ کرنے کی کوشش کی لیکن رابطہ نہ ہو سکا جس پر انھوں نے پولیس کو اطلاع کر دی۔

    جمعہ 25 ستمبر کو جب پولیس اہل کار بچوں کے گھر پہنچے تو دروازہ بچوں نے ہی کھولا جن کی عمریں 5 اور 7 سال ہیں، جب کہ ان کی ماں مر چکی تھیں اور فرش پر ان کی لاش پڑی تھی۔

    ٹالٹی کے پولیس چیف کا کہنا تھا کہ بچوں نے ماں کے موبائل فون سے پولیس کو فون کرنے کی کوشش کی تھی لیکن انھیں موبائل کو ان لاک کرنے کا پاس ورڈ معلوم نہیں تھا۔

    پولیس کے مطابق بچے اس واقعے سے بہت خوف زدہ ہو گئے تھے، اس لیے وہ باہر ہی نہیں نکلے، وہ اپنے پڑوسیوں کو بھی نہیں جانتے تھے، چناں چہ وہ گھر ہی پر رہے اور جو کچھ فریج اور کچن میں موجود تھا، وہ کھاتے رہے۔

    پولیس کا کہنا تھا کہ جب وہ گھر پر پہنچے تو بچے صحت مند دکھائی دے رہے تھے جب کہ ماں طبعی طور پر مر گئی تھیں، یہ بھی معلوم ہوا کہ دونوں بچے خاتون کے اپنے نہیں تھے بلکہ لے پالک تھے، اور حال ہی میں خاتون نے انھیں گود لیا تھا۔

    بعد ازاں، بچوں کو واپس چائلڈ پروٹیکٹو سروسز بھیج دیا گیا، مقامی ایجوکیشن حکام نے اساتذہ کا شکریہ ادا کیا جو بچوں کے والدین کے ساتھ بھی روابط جوڑے رکھتے ہیں۔

  • لاپتا بیٹے کی لاش کچرے کے ڈبے سے ملنے پر ماں گرفتار

    لاپتا بیٹے کی لاش کچرے کے ڈبے سے ملنے پر ماں گرفتار

    ٹیکساس: امریکا میں ایک ماں کو اس کے لاپتا بیٹے کی لاش کچرے کے ڈبے سے ملنے پر گرفتار کر لیا گیا۔

    غیر ملکی میڈیا کے مطابق امریکی ریاست ٹیکساس کے علاقے واکو سے ایک خاتون کو گرفتار کر لیا گیا ہے جس نے 4 دن قبل پولیس کو رپورٹ درج کرائی تھی کہ اس کا بیٹا لاپتا ہو گیا ہے، آج اس کی لاش کچرے کے ڈبے سے ملی۔

    پولیس کا کہنا تھا کہ خاتون لارا سانچز نے چند دن قبل اپنے 2 سالہ بیٹے فرینکی گونزلز کی واکو کے کیمرون پارک سے گم شدگی کی رپورٹ درج کرائی تھی، پولیس کو تلاش کے باوجود بچہ نہیں مل سکا، پولیس سارجنٹ کا کہنا تھا کہ خاتون نے جھوٹ بھی بولا کہ بچے نے اپنے بڑے بھائی کے ساتھ ویک اینڈ گزارا تھا۔

    بعد ازاں منگل کو خاتون لارا سانچز کے بھائی نے کال کر کے پولیس کو بتایا کہ ان کی بہن لارا سانچز نے بچے کی موت کا اعتراف کر لیا ہے۔ پولیس انٹرویو کے دوران خاتون نے قبول کر لیا کہ مئی 28 کو ہی بچہ مر گیا تھا اور صرف وہ ہی بچے کی دیکھ بھال کرتی تھی۔

    خاتون نے بتایا کہ اس نے بچے کی لاش 30 مئی تک گھر میں رکھی، اس کے بعد اٹھا کر کچرے کے ڈبے میں ڈال دی، پولیس نے فوری طور پر لارا سانچز پر فرسٹ ڈگری چوٹ کا الزام لگا کر اسے جیل بھیج دیا، واکو پولیس کا کہنا تھا کہ مزید چارجز بھی جلد لگ سکتے ہیں۔

    پولیس کے مطابق جب خاتون نے انھیں کال کر کے کہا تھا کہ اس کا بیٹا پارک میں سپلیش پیڈ (پانی کا پلاسٹک سے بنا پُول) سے اچانک غائب ہو گیا ہے، تو اس کا مقصد دراصل پولیس کو اصل معاملے سے گمراہ کرنا تھا، جب کہ بچہ اس دن پارک میں لایا ہی نہیں گیا تھا۔

    پولیس کا یہ بھی کہنا تھا کہ ابھی تک بچے کی موت کی اصل وجہ معلوم نہیں ہو سکی ہے۔

  • بچے کو آئس کا نشہ کرانے والے والدین گرفتار

    بچے کو آئس کا نشہ کرانے والے والدین گرفتار

    ٹیکساس: امریکی ریاست ٹیکساس میں والدین نے اپنے ہی دس سالہ بچے کو آئس نشے کا عادی بنا دیا، پولیس نے دونوں کو گرفتار کر لیا۔

    غیر ملکی میڈیا کے مطابق پولیس نے ٹیکساس میں ایسے والدین کو گرفتار کیا ہے جو اپنے دس سالہ بچے کو آئس نشہ کرا رہے تھے، پولیس کا کہنا تھا کہ بچے کا نشے کا ٹیسٹ کیا گیا تو مثبت آ گیا، جس پر اس کے والدین کو گرفتار کر لیا گیا۔

    رپورٹس کے مطابق گزشتہ برس ستمبر میں ایک کیس کے سلسلے میں شروع ہونے والی تحقیقات کے نتیجے میں ابھی یہ بات سامنے آئی ہے کہ 39 سالہ جوڑے کوڈی اسٹون اور کیتھرین کراؤچ نے اپنے ہی بیٹے کو آئس نشہ کرایا۔

    پیر کے دن پولیس نے دونوں کے خلاف اپنے بچے کی زندگی خطرے میں ڈالنے کے الزام کے تحت مقدمہ درج کر کے انھیں گرفتار کر لیا۔

    معروف یوٹیوبر چوری کرتے پکڑے گئے

    عدالتی کاغذات میں کہا گیا تھا کہ چائلڈ پرٹیکٹو سروسز کے عملے نے پولیس سے رابطہ کر کے اطلاع دی تھی کہ مذکورہ والدین کے ساتھ ان کے دس سالہ بچے کا منشیات ٹیسٹ بھی مثبت آ گیا ہے۔

    بعد ازاں، دونوں میاں بیوی کو 15 ہزار ڈالر کی ضمانت کے بعد جیل سے رہا کر دیا گیا۔