کراچی : ٹیکس نادہندگان گاڑیوں سے ٹیکس وصولی کی مہم 5 جون سے شروع ہوگی، ٹیکس نادہندہ ناخوشگوار صورتحال سے بچنے کے لئے ٹیکسز فوری جمع کرائیں۔
صوبائی وزیرمکیش کمار چاؤلہ کی جانب سے بیان میں کہا گیا ہے کہ کراچی میں ٹیکس نادہندگان گاڑیوں سے ٹیکس وصولی کی مہم پانچ جون سے شروع ہوگی اور یہ مہم 16 جون تک جاری رہے گی۔
مکیش کمار چاؤلہ کا کہنا تھا کہ مہم کا مقصد ٹیکس نادہندہ گان گاڑیوں سے ٹیکس کی وصولی ہے تاہم کراچی میں روڈ چیکنگ مہم کے لئے 9 ٹیمیں تشکیل دے دی گئی ہیں۔
صوبائی وزیر نے بتایا کہ ٹیمیں کراچی میں 37 مختلف مقامات پر چیکنگ کریں گی، مقامات میں کورنگی انڈسٹریل ایریا، بروک چورنگی، سنگر چورنگی، ڈی ایچ اے قبرستان ،سن سیٹ بولیوارڈ روڈ، سائٹ ، منگھو پیر روڈ، بنارس چورنگی شامل ہیں۔
اس کے علاوہ حب ریور روڈ، شاہراہِ قائدین، مسلم آباد،کھارا در، کیماڑی، کوئینز روڈ ، کلفٹن باتھ آئی لینڈ ، شاہین کمپلیکس، پی آئی ڈی سی، مائی کولاچی بائی پاس، ملیر کنٹونمنٹ ، لانڈھی انڈسٹریل ایریا ، سعود آباد، کھوکھراپار ، پی آئی بی کالونی، تین ہٹی بھی شامل ہیں۔
مکیش کمار چاؤلہ نے کہا کہ سولجر بازار، لسبیلہ، جوہر چورنگی، میٹرو کیش اینڈ کیری، ٹائم اسکوائر، پہلوان گوٹھ ، ایف بی ایریا، ناظم آباد، نارتھ ناظم آباد اور نارتھ کراچی بھی مقامات میں شامل ہیں۔
صوبائی وزیر نے خبردار کیا کہ ٹیکس نادہندہ گاڑیوں ناخوشگوار صورتحال سےبچنے کے لئے ٹیکسز فوری جمع کرائیں۔