لاہور : پنجاب حکومت نے منکی پاکس پر ٹیکنیکل کمیٹی تشکیل دے دی ، کمیٹی وائرس کی روک تھام، تشخیص پر کام کرے گی۔
تفصیلات کے مطابق پنجاب میں منکی پوکس کے پھیلاو کے خطرے کے پیش نظر پنجاب حکومت نے ٹیکنیکل کمیٹی تشکیل دے دی اور سابق نگران وزیر صحت ڈاکٹر جاوید اکرم کمیٹی کا سربراہ مقرر کردیا۔
ٹیکنیکل کمیٹی میں شعبہ صحت سے 20 سنئیر افراد شامل ہیں ، کمیٹی مونکی پوکس کی روک تھام، تشخیص پر کام کرے گی اور مریضوں کے علاج کا طریقہ کار وضع کرے گی۔
وائرس کی ویکسین منگوا کر کس کو لگائی جائے گی یہ بھی کمیٹی طے کرے گی جبکہ طبی عملے اور ائیرپورٹ عملے کی مشتبہ مریضوں کے علاج کی ٹریننگ پر کام کرے گی۔
کمیٹی میں بارڈر ہیلتھ سروسز، یونیسیف، عالمی ادارہ صحت کے ارکان شامل ہیں ، جلد، میڈیسن، مائیکروبیالوجی کے سنئیر پروفیسرز کمیٹی کا حصہ ہوں گے۔
ڈی جی ہیلتھ پنجاب اور ریسکیو 1122 کے رکن بھی ٹیکنیکل کمیٹی کا حصہ ہوں گے۔
