اسلام آباد: پانامہ لیکس کی تحقیقات کیلئے ٹی او آرز پر اسپیکر قومی اسمبلی کی دعوت کے بعد اپوزیشن نے منگل کو اپنا مشاورتی اجلاس طلب کرلیا۔
تفصیلات کے مطابق ٹی او آرز پر ڈیڈ لاک تاحال برقرار ہے، اعتزاز احسن نے اپوزیشن جماعتوں کا باضابطہ اجلاس طلب کر لیا۔ اپوزیشن جماعتوں کا مشاورتی اجلاس نو اگست کو دوپہر دو بجے اسلام آباد میں اعتزاز احسن کے چیمبر میں ہو گا۔ ٹی او آرز کے معاملے پر اسپیکر کی دعوت اور حکومت کی جانب سے پارلیمانی کمیٹی کا اجلاس بلانے کے معاملات کا جائزہ لیا جائے گا۔
اپوزیشن جماعتیں ٹی او آرز کے معاملات پر اپنی حتمی پالیسی کا بھی اجلاس میں جائزہ لیں گی۔
اس حوالے سے شاہ محمود قریشی نے کہا ہے کہ اسپیکر ایاز صادق سے ملاقات سے پہلے اپوزیشن اراکین اپنے پوائنٹس پر آپس میں مشاورت کریں گے۔
اس اجلاس میں تحریک انصاف سمیت حزب اختلاف کی جماعتوں کے اراکین بھی شامل ہوں گے۔
