ARYNews.tv | Urdu – Har Lamha Bakhabar

Tag: ٹی ٹوئنٹی

  • قومی اسکواڈ کا پرتھ اسٹیڈیم میں ٹریننگ سیشن

    قومی اسکواڈ کا پرتھ اسٹیڈیم میں ٹریننگ سیشن

    پرتھ: آئی سی سی ٹی ٹوئنٹی ورلڈکپ کے دوسرے مقابلے کے لیے قومی ٹیم  کا پرتھ  کے آپٹس اسٹیڈیم میں آپشنل ٹریننگ سیشن جاری ہے۔

    تفصیلات کے مطابق پاکستان کرکٹ ٹیم کے 8 کھلاڑی پریکٹس سیشن  کے لیے موجود ہیں جن میں بابر اعظم، محمد رضوان،  شاہنواز دھانی، فخر زمان، عثمان قادر،  محمد حارث، محمد حسنین اور خوشدل شاہ شریک ہیں۔

    ٹریننگ سیشن میں ہیڈ کوچ ثقلین مشتاق،  بولنگ کوچ شان ٹیٹ اور بیٹنگ کوچ محمد یوسف  بھی موجود ہیں۔

    پاکستان ٹیم کا آپشنل نیٹ سیشن ڈیڑھ گھنٹہ جاری رہے گا جس کے بعد قومی ٹیم رات کو ایک بار پھر آپٹس اسٹیڈیم میں ہی فیلڈنگ پریکٹس کرے گی۔

    واضح رہے کہ پاکستان ٹیم  زمبابوے کیخلاف  ٹی ٹوئنٹی ورلڈکپ  کا اپنا دوسرا میچ  کل  پرتھ میں کھیلے گی۔

  • ’ایشیا کپ بھارت کے بغیر بھی ہوسکتا ہے‘

    ’ایشیا کپ بھارت کے بغیر بھی ہوسکتا ہے‘

    قومی کرکٹ ٹیم کے سابق کپتان یونس خان نے ایشیا کپ 2023 سے متعلق جے شاہ کے بیان پر ردِ عمل دیا ہے۔

    سابق کپتان نے اے آر وائی نیوز کے پروگرام ہر لمحہ پُرجوش میں جے شاہ کے بیان پر ردِ عمل دیتے ہوئے کہا کہ پاکستان کو اپنے مؤقف پر ڈٹ جانا چاہیے، ایشیا کپ 2023 بھارت کےبغیر بھی ہوسکتا ہے۔

    پروگرام میں گفتگو کرتے ہوئے یونس خان نے پاکستان ٹیم مینجمنٹ کو مشورہ دیا کہ اگر ایشیا کپ کا مقام تبدیل کیا جاتا ہے تو پاکستان کو خود اس ٹورنامنٹ میں کھیلنے سے انکار کردینا چاہیے۔

    ان کا کہنا تھا کہ اگر بھارتی ٹیم پاکستان نہیں آنا چاہتی ہے تو یہ ان کی اپنی مرضی ہے۔

    یونس خان نے کہا کہ آئندہ سال ورلڈ کپ بھارت میں ہونا ہے لہٰذا درمیانی راستہ کوئی نہیں ہے صرف کھیلنا ہے۔

    انہوں نے کہا کہ اس مسئلے پر صرف بھارتی بورڈ کو ہی نہیں بلکہ ایشین کرکٹ کونسل اور آئی سی سی کو بھی اپنا کردار ادا کرنا چاہیے۔

    سابق کپتان یونس خان کا کہنا تھا کہ اگر بھارت پاکستان نہیں آتا اور آئی سی سی ایشیا کپ کا مقام تبدیل کرتی ہے تو پاکستان کو ڈٹ جانا چاہیے، اور کسی دوسرے ملک میں جاکر کھیلنے سے انکار کردینا چاہیے۔

  • ورلڈکپ میں شاندار کارکردگی دکھانے والا عمانی کھلاڑی فیاض بٹ کون ہے؟

    ورلڈکپ میں شاندار کارکردگی دکھانے والا عمانی کھلاڑی فیاض بٹ کون ہے؟

    کوالیفائنگ راؤنڈ میں عمان میں کیلئے بنگلا دیش کے تین کھلاڑیوں کو آؤٹ کرنے والے فیاض بٹ انڈر 19 ورلڈ کپ میں پاکستان کی نمائندگی بھی کرچکے ہیں۔

    فاسٹ بولر فیاض بٹ نے 2010 میں انڈر 19 ورلڈ کپ میں پاکستان کی نمائندگی کی تھی اور اس دوران قومی ٹیم کے کپتان بابر اعظم بھی انڈر 19 ٹیم کا حصّہ تھے۔

    انڈر 19 ورلڈ کپ میں فیاض بٹ نے کوارٹر فائنل میں بھارت کے چار بہترین کھلاڑیوں کو پویلین بھیجا تھا جس میں بھارت ٹیم کے اوپنر بیٹسمین لوکیش راہول بھی شامل ہیں۔

    فیاض بٹ کی گیند پر لوکیش راہول بغیر کوئی کارکردگی دکھائے صفر پر آؤٹ ہوگئے تھے، بھارت کے خلاف شاندار کھیل پیش کرنے پر فیاض بٹ کو پلیئر آف دی میچ کا ایوارڈ دیا گیا تھا۔

    واضح رہے کہ انٹرنیشنل کرکٹ کاؤنسل کا ٹی ٹوئنٹی ورلڈ کپ کا ساتواں ایڈیشن متحدہ عرب امارات اور عمان میں جاری ہے۔

  • ویرات کوہلی نے اوپننگ کرنے سے انکار کردیا، وجہ کیا بنی؟

    ویرات کوہلی نے اوپننگ کرنے سے انکار کردیا، وجہ کیا بنی؟

    بھارتی کپتان ویرات کوہلی نے ٹی ٹوئنٹی ورلڈ کپ میں اوپننگ سے انکار کرتے ہوئے تیسرے نمبر پر بیٹنگ کرنے کا اشارہ دیا ہے۔

    انگلینڈ کے خلاف وارم اپ میچ میں ٹاس کے دوران غیر ملکی میڈیا سے گفتگو کرتے ہوئے ویرات کوہلی نے کہا کہ آئی پی ایل سے قبل صورتحال مختلف تھی لیکن آئی پی ایل کے دوران لوکیش راہول نے اچھی کارکردگی کا مظاہرہ کیا ہے۔

    راہول کی کارکردگی نے مجھے تیسرے نمبر پر کھیلنے پر مجبور کردیا ہے اب اوپننگ دوبارہ لوکیش راہول کریں گے۔

    بھارتی کپتان نے کہا کہ روہت کے بارے میں بھی نہیں سوچ سکتا۔ وہ ایک عالمی معیار کے کھلاڑی ہیں اور ہمارے لیے وہ سب سے اوپر آئیں گے اس لیے میں اب تیسرے نمبر پر بیٹنگ کروں گا۔

    میڈیا رپورٹس کے مطابق راہول نے 2018 کے بعد سے آئی پی ایل میں سب سے زیادہ 2548 رنز بنائے ہیں اور 2020 میں اورنج کیپ جیتنے والے کھلاڑی تھے۔

  • انٹر میڈیا ٹی 20 ٹورنامنٹ، اے آر وائی نیوز نے ٹائٹل جیت لیا

    انٹر میڈیا ٹی 20 ٹورنامنٹ، اے آر وائی نیوز نے ٹائٹل جیت لیا

    کراچی: اے آر وائی نیوز نے انٹر میڈیا ٹی 20 ٹورنامنٹ ٹائٹل جیت لیا۔

    تفصیلات کے مطابق اے آر وائی نیوز نے کراچی میں ہونے والا انٹر میڈیا ٹی ٹوینٹی ٹورنامنٹ جیت لیا، فائنل میں اے آر وائی نیوز نے آج نیوز کو 88 رنز سے شکست دی۔

    اے آر وائی نیوز نے پہلے کھیلتے ہوئے 215 رنز بنائے تھے، بدر عابدی نے شان دار نصف سنچری اسکور کرتے ہوئے 67 رنز بنائے، بابر خان اور عتیق احمد نے 38-38 رنز بنائے۔

    جواب میں اے آر وائی نیوز کی تباہ کن بولنگ کے آگے مخالف ٹیم زیادہ مزاحمت نہ کر سکی، بولرز نے نپی تلی بولنگ سے آج ٹی وی کو 215 رنز کے تعاقب میں صرف 127 رنز تک ہی محدود کر دیا۔

    اے آر وائی کی جانب سے بہترین بولنگ کا مظاہرہ کرتے ہوئے بابر خان، عامر شیخ اور عدنان خان نے 2-2 وکٹیں حاصل کیں۔

    اے آر وائی نیوز نے جیونیوز کو ہرا دیا

    میچ کے اختتام پر قومی کرکٹ ٹیم کے سابق چیف سلیکٹر اقبال قاسم نے کھلاڑیوں میں انعامات تقسیم کیے۔

    واضح رہے کہ یہ ایونٹ حکومت سندھ کے محکمہ اسپورٹس اینڈ یوتھ افیئرز کے اشتراک سے کھیلا گیا، 27 نومبر کو اے آر وائی نیوز نے سیمی فائنل میں جیو نیوز کو 9 وکٹوں سے ہرایا تھا، اے آر وائی نیوز کی ٹیم نے 141 رنز کا ہدف ایک وکٹ پر 10 اوورز میں ہی پورا کر لیا تھا۔

  • پاکستان نے زمبابوے کو شکست دے کر ٹی 20 سیریز جیت لی

    پاکستان نے زمبابوے کو شکست دے کر ٹی 20 سیریز جیت لی

    راولپنڈی: پاکستان نے دوسرے ٹی 20 میچ میں زمبابوے کو 8 وکٹوں سے شکست دے کر سیریزمیں 2-0 کی فیصلہ کن برتری حاصل کرلی۔

    اے آر وائی نیوز کی رپورٹ کے مطابق راولپنڈی میں کھیلے جانے والے دوسرے ٹی 20 میچ میں پاکستان نے زمبابوے کی جانب سے دیا جانے والا 135 رنز کا ہدف 15.1 اوورز میں دو وکٹوں کے نقصان پر حاصل کرلیا۔

    اوپنر فخر زمان ایک بار پھر ناکام ہوئے اور صرف 5 رنز بنا کر پویلین لوٹ گئے، کپتان بابر اعظم نے 51 رنز کی ذمہ دارانہ اننگز کھیلی۔

    نوجوان بیٹسمین حیدر علی 66 رنز بنا کر ناٹ آؤٹ رہے، خوشدل نے 11 رنز کی اننگز کھیلی۔

    زمبابوے کی جانب سے دونوں وکٹیں فاسٹ بولر مزرابانی نے حاصل کیں۔

    قبل ازیں راولپنڈی میں کھیلے جانے والے دوسرے ٹی 20 میچ میں زمبابوے نے مقررہ اوورز میں 7 وکٹوں کے نقصان پر 134 رنز بنائے اور پاکستان کو جیت کے لیے 135 رنز کا ہدف دیا۔

    زمبابوے کی پہلی وکٹ 5 رنز پر گری جب برینڈن ٹیلر 3 رنز بنا کر حارث رؤف کی گیند پر محمد رضوان کو کیچ دے بیٹھے، چبھابھا 15 رنز بنا کر آؤٹ ہوئے۔

    سین ولیمز 13 رنز بناسکے، مادھویری 24 رنز بنا کر عثمان قادر کا نشانہ بنے، آر پی بوری نے 32 رنز کی ناقابل شکست اننگز کھیلی۔

    پاکستان کی جانب سے عثمان قادر اور فاسٹ بولر حارث رؤف نے تین، تین وکٹیں حاصل کیں۔

    اس سے قبل  پاکستان نے دوسرے ٹی ٹوینٹی میچ میں ٹاس جیت کر زمبابوے کو بیٹنگ کرنے کی دعوت دے دی، پاکستان کو سیریز میں 0-1 کی برتری حاصل ہے، جب کہ زمبابوے کو سیریز بچانے کے چیلنج کا سامنا ہے۔

    دوسرے ٹی ٹوینٹی کے لیے قومی ٹیم میں کوئی تبدیلی نہیں کی گئی، کپتان بابر اعظم نے ٹاس جیت کر کہا کہ ہمارے بولرز اچھی کارکردگی دکھا رہے ہیں۔

    ون ڈے سیریز اور اب پہلے ٹی 20 میچ میں پاکستان ٹیم کی شان دار کارکردگی کے پیش نظر اس میچ میں بھی پاکستان کو جیت کے لیے فیورٹ قرار دیا جا رہا ہے۔

    پہلا ٹی 20، پاکستان نے زمبابوے کو 6 وکٹوں سے شکست دے دی

    واضح رہے کہ آج پاکستان اور زمبابوے کی ٹیموں نے راولپنڈی کرکٹ اسٹیڈیم میں پریکٹس سیشن میں حصہ لیا تھا۔

    خیال رہے کہ زمبابوے کے خلاف پہلے ٹی ٹوئنٹی میں وکٹ کیپر محمد رضوان نے ایک شان دار کیچ بھی لیا تھا، وہاب ریاض کی گیند پر کیچ اچھلا، گیند رضوان سے دور تھی، لیکن چیتے کی طرح چھلانگ لگا کر رضوان نے سکندر رضا کا کیچ دبوچ لیا، اس کیچ کی ویڈیو بھی وائرل ہو گئی ہے۔

    اسٹار بلے باز بابر اعظم کی جانب سے بھی ٹی ٹوئنٹی میں ٹاپ فارم جاری ہے، پہلے ٹی 20 میچ میں 82 رنز کی اننگز کھیلنے کے ساتھ بابر نے رواں سال ٹی ٹوئنٹی میں 1 ہزار رنز مکمل کر لیے ہیں، بابر مسلسل 2 سال میں ایک ہزار رنز بنانے والے پاکستان کے پہلے کھلاڑی ہیں، بابر نےگزشتہ سال ٹی ٹوئنٹی میں 1607 رنز بنائے تھے۔

    زمبابوے اسکواڈ

    برینڈن ٹیلر (وکٹ کیپر)، چمو چی بھابھا (کپتان)، شین ولیمز، ویزلے مدھیور، سکندر رضا، ریان برل، ایلٹن چگمبورا، ٹنڈائی چسورو، ڈونلڈ ٹریپانو، بلیسنگ مزربانی، رچرڈ این گراوا۔

    پاکستان الیون

    فخر زمان، بابر اعظم (کپتان)، حیدر علی، محمد حفیظ، محمد رضوان (وکٹ کیپر)، خوشدل شاہ، فہیم اشرف، وہاب ریاض، عثمان قادر، حارف رؤف، محمد حسنین

  • ڈی کک نے تیز ترین نصف سنچری بنا ڈالی

    ڈی کک نے تیز ترین نصف سنچری بنا ڈالی

    ڈربن: کوئنٹین ڈی کک نے ٹی ٹوئنٹی میں تیز ترین نصف سنچری بنانے والے جنوبی افریقی پلیئر کا اعزاز حاصل کر لیا۔

    موجودہ کپتان نے انگلینڈ کے خلاف جارحانہ بیٹنگ کرتے ہوئے 17 گیندوں پر ففٹی بنا کر سابق کپتان اے بی ڈیویلیئرز کا ریکارڈ توڑ ڈیا۔

    ڈربن میں کھیلے گئے میچ میں ڈی کک نے شاندار اننگز کھیلی اور پروٹیز کی جانب سے تیز ترین ففٹی بنانے کا ریکارڈ اپنے نام کیا۔

    https://www.youtube.com/watch?v=puvYFCLW174

    اس سے قبل اے بی ڈیویلیئرز 21 گیندوں پر نصف سنچری بنانے کا ریکارڈ رکھتے تھے، ڈیویلیئرز نے بھی انگلینڈ کے خلاف تیز ترین ففٹی اسکور کی تھی۔

    جنوبی افریقا کی جانب سے تیز ترین نصف سنچریاں بنانے والے ڈی کک اور اے بی ڈیویلیئرز ہی ہیں، تیسری تیز ترین نصف سنچری کا ریکارڈ ڈی کک اور چوتھی فاسٹس ففٹی کا ریکارڈ ڈیلویلیئرز کے پاس ہے۔

  • پاکستان کی نمبر ون رینکنگ خطرے میں

    پاکستان کی نمبر ون رینکنگ خطرے میں

    لاہور: قومی کرکٹ ٹیم کی عالمی ٹی ٹوئنٹی نمبر ون ریکنگ خطرے میں پڑ گئی۔

    سری لنکا اور آسٹریلیا سے پے در پے شکستوں سے چور پاکستان ٹیم کی عالمی نمبر ون پوزیشن کو زبردست جھٹکا لگا ہے اور اب صرف ایک شکست کی صورت میں پہلی پوزیشن چھن سکتی ہے۔

    پاکستان ٹیم اس وقت 270 پوائنٹس کے ساتھ سرفہرست ہے جب کہ آسٹریلیا ایک پوائنٹ کی کمی سے دوسرے نمبر پر ہے، جنوبی افریقا 262 پوائنٹس کے ساتھ تیسرے نمبر پر براجمان ہے۔

    پاکستان کو بنگلادیش کے خلاف ہوم سیریز پر نہ صرف فتح کا جمود توڑنے کا چیلنج درکار ہو گا بلکہ گرین شرٹس نمبر ون رینکنگ کی بقا کی جنگ بھی لڑیں گے۔

    قومی ٹیم کو پہلی پوزیشن برقرار رکھنے کے لیے بنگلادیش کے خلاف سیریز میں کلین سوئپ کرنا ضروری ہے وگرنہ ایک شکست سے بھی گرین شرٹس عالمی نمبر ون رینکنگ کھو بیٹھے گی۔

    یاد رہے کہ بنگلا دیشی ٹیم12سال بعد 22 جنوری کو پاکستان آئے گی۔ دونوں ٹیموں کے درمیان پہلا ٹی 20 میچ 24 جنوری کو لاہور کے قذافی اسٹیڈیم میں کھیلا جائے گا۔

    بنگلا دیش کے خلاف ٹی ٹوینٹی سیریز کے لیے پاکستان کے 15 رکنی اسکواڈ کا اعلان کیا جاچکا ہے، شعیب ملک اور محمد حفیظ کی قومی ٹیم میں واپسی ہوئی ہے۔

    ہیڈکوچ مصباح الحق نے قومی ٹیم کا اعلان کرتے ہوئے کہا کہ بابراعظم ٹیم کے کپتان ہوں جبکہ دیگر کھلاڑیوں میں شعیب ملک، محمد حفیظ، عماد بٹ، احسان علی، حارث رؤف، افتخار احمد، عماد وسیم، خوشدل شاہ، شعیب ملک، محمد حسنین، موسیٰ خان، محمد رضوان، شاداب خان، عثمان قادر اور شاہین شاہ آفریدی شامل ہیں۔

  • تیسرا ٹی ٹوئنٹی ، آسٹریلیا نے پاکستان کو10 وکٹوں سے ہرادیا

    تیسرا ٹی ٹوئنٹی ، آسٹریلیا نے پاکستان کو10 وکٹوں سے ہرادیا

    پرتھ: تیسرے ٹی ٹوئنٹی میچ میں  آسٹریلیا نے دس وکٹو ں سے پاکستان کو شکست دے دی  اور  3میچوں کی سیریز0-2سےجیت لی ، قومی ٹیم کی بیٹنگ اوربولنگ مکمل طورپرناکام رہی ۔ 

    تفصیلات کے مطابق پرتھ کے میدان میں پاکستان اور آسٹریلیا کی ٹیمیں مدمقابل ہیں، پاکستان کی پہلی وکٹ 15رنز پر گری، بابراعظم 6رنز بنا کر آؤٹ ہوئے، تیسرے ٹی ٹوئنٹی میچ میں کپتان کا بلا نہ چل سکا۔

    میچ میں قومی ٹیم کے بلے باز ایک بار پھر مشکلات سے دو چار ہوگئے، کپتان بابر اعظم چھ اور محمد رضوان صفر رنز پر مچل اسٹارک کا شکار بنے، جبکہ امام الحق چودہ رنز پر پویلین لوٹ گئے، حارث سہیل مسلسل تیسرے میچ میں بھی فیل ہوگئے، صرف آٹھ رنز بنا کر ایشٹن ایگر کی گیند پر کیچ آؤٹ ہوئے۔

     ،آسٹریلیاکیخلاف خوش دل شاہ 8رنز اور عمادوسیم 6رنزبناکرآؤٹ ہوئے ،  پاکستان نے آسٹریلیا کو جیت کیلئے صرف ایک سو سات رنز کا ہدف دیا، پرتھ میں پاکستانی بلے بازوں کے بعد بولرز بھی کچھ نہ کرسکے۔

    آسٹریلیا کے اوپنرز نے پاکستانی بولرز کی دھنائی کی اور ہدف باآسانی حاصل کرلیا، پاکستان کو تیسری بار ٹی ٹوئنٹی میں دس وکٹوں سے شکست کا سامنا کرنا پڑا ،قومی ٹیم کی بیٹنگ اوربولنگ مکمل طورپرناکام رہی ، قومی بلےبازوں نے20اوورمیں61 ڈاٹ بالزکھیلیں۔

    پاکستان ٹیم میں 4تبدیلیاں کی گئ ہیں۔ فخرزمان، آصف علی، وہاب ریاض اور محمدعرفان کو ڈراپ کردیا گیا۔ جبکہ امام الحق، خوش دل شاہ، محمد حسنین اور موسیٰ خان کو ٹیم میں شامل کیا گیا ہے۔ اسی طرح آسٹریلیا کی ٹیم میں بھی تبدیلیاں کی گئی ہیں۔

    ایڈم زمپا اور پیٹ کمنز کی جگہ شان ایبٹ اور بلی اسٹین لیک کو ٹیم میں شامل کیا گیا ہے۔

    ٹاس کے بعد کمنٹیٹر سے گفتگو کرتے ہوئے کپتان بابراعظم کا کہنا تھا کہ دو کھلاڑی ڈیبیو کررہے ہیں، چاہتے ہیں وہ اس کا فائدہ اٹھائیں۔ انہوں نے بتایا کہ اگر ہم ٹاس جیت جاتے تو پہلے بولنگ کرتے۔ قومی ٹیم جیت کے لیے پرعزم ہے۔

    دوسری جانب آسٹریلو کپتان ایرون فنچ کا کہنا تھا کہ وکٹ پر نمی ہے اس سے فائدہ اٹھائیں گے، اس وکٹ پر ایک اسپنر بہت ہے۔

    کپتان بنتے ہی بابر اعظم غصے میں آگئے، ویڈیو وائرل

    واضح رہے کہ آسٹریلیا نے پاکستان کو دوسرے ٹی ٹوینٹی میچ میں 7 وکٹوں سے شکست دی تھی، اسٹیو اسمتھ کو میچ کا بہترین کھلاڑی قرار دیا گیا تھا، ٹی ٹوینٹی سیریز کا پہلا میچ بارش کے سبب بے نتیجہ رہا تھا۔

    دوسری جانب قومی کرکٹ ٹیم کے فاسٹ بولر وہاب ریاض کا اپنے ایک بیان میں کہنا تھا کہ سرفراز احمد اچھے کھلاڑی ہیں لیکن ان کی فارم اچھی نہیں ہے، ان کی بطورکپتان پاکستان کے لیے بہت خدمات ہیں، سرفراز کی خدمات کے سب معترف ہیں۔

  • چوتھا ٹی ٹوینٹی: نیوزی لینڈ اور انگلینڈ 8 نومبر کو ٹکرائیں گے

    چوتھا ٹی ٹوینٹی: نیوزی لینڈ اور انگلینڈ 8 نومبر کو ٹکرائیں گے

    نیپئر: نیوزی لینڈ اور انگلینڈ کے درمیان پانچ ٹی ٹوینٹی میچوں پر مشتمل سیریز کا چوتھا میچ 8 نومبر کو کھیلا جائے گا۔

    تفصیلات کے مطابق پانچ ٹی ٹوینٹی میچز پر مشتمل سیریز میں نیوزی لینڈ کو دو ایک کی برتری حاصل ہے، چوتھا ٹی ٹوینٹی میچ 8 نومبر کو نیپئر میں کھیلا جائے گا۔

    شیڈول کے مطابق دنوں ٹیموں کے درمیان پانچواں اور آخری ٹی ٹوینٹی میچ 10 نومبر کو آکلینڈ میں کھیلا جائے گا، نیوزی لینڈ نے سیریز اپنے نام کرنے کے عزم کا اظہار کیا ہے۔

    انگلینڈ کی ٹیم دو ٹیسٹ میچوں کی سیریز سے قبل ایک چار روزہ ٹور میچ کھیلے گی جس کے بعد دونوں ٹیموں کے درمیان پہلا ٹیسٹ میچ 21 سے 25 نومبر تک مونٹ مونگنوئی جب کہ دوسرا اور آخری ٹیسٹ میچ 29 نومبر سے 3 دسمبر تک ہملٹن میں کھیلا جائے گا۔

    تیسراٹی ٹوئنٹی: نیوزی لینڈ نے انگلینڈ کو شکست دے دی

    یاد رہے کہ انگلینڈ نے نیوزی لینڈ کو پہلے ٹی 20 میچ میں 7 وکٹوں سے شکست دے کر سیریز میں 1-0 کی برتری حاصل کرلی تھی تاہم دوسرا اور تیسرا میچ نیوزی لینڈ نے جیت کر سیریز 2-1کی برتری حاصل کرلی۔