تحریک طالبان افغانستان کے دہشت گرد یحییٰ کی ایک ویڈیو سامنے آ گئی ہے، جس سے افغان سرزمین دہشت گردی کے لیے استعمال ہونے کا ثبوت مل گیا ہے۔
ٹی ٹی اے کی پاک افغان سرحد پر فورسز کے حملوں سے متعلق ویڈیو میں ٹی ٹی اے دہشت گرد یحییٰ ساتھیوں کو حملوں کی ہدایت دے رہا ہے، کمانڈر دہشت گردوں کو بتا رہا ہے کہ ہم پاکستان سے بدلہ لینے کے لیے تیار ہیں، دہشت گردوں کو بتایا گیا کہ آپ کے ساتھ 6 راکٹ چلانے والے، 6 معاونین ہوں گے۔
ٹی ٹی اے کمانڈر یحییٰ نے کہا 2 لیزر والے، 2 ان کے معاونین جب کہ ایک اسنائپر والا بھی ہوگا، یہ سب مجاہدین امیر المومنین شیخ عباداللہ کے احکامات پر تیار ہیں۔
سامنے آنے والی ویڈیو میں خودکش بمبار کو بھی دیکھا جا سکتا ہے، ویڈیو میں دہشت گردوں کو پاکستان کے خلاف لڑنے پر رضامندی ظاہر کرتے دیکھا جا سکتا ہے، واضح رہے کہ ٹی ٹی اے پاک افغان سرحد سے سیکیورٹی فورسز پر حملوں کی منصوبہ بندی میں ملوث ہے۔
ایک طرف تحریک طالبان افغانستان دہشت گردوں کو پوری مدد فراہم کرنے میں مصروف ہے، جب کہ پاکستان کئی بار کہہ چکا افغان حکومت دہشت گردوں کو اپنی سرزمین استعمال نہ کرنے دے، دہشت گرد افغان سرزمین استعمال کر کے پاکستان پر حملے کرتے رہے ہیں، اب ویڈیو شواہد بھی آ گئے۔