نئی دہلی: مودی حکومت نے فاشسٹ ازم کی نئی مثال قائم کرتے ہوئے مقبوضہ کشمیر میں ’جموں و کشمیر نیشنل فرنٹ‘ پر پابندی عائد کر دی۔
تفصیلات کے مطابق مقبوضہ کشمیر پچھلے 76 سالوں سے بھارتی ظلم اور بربریت کا شکار رہا ہے، بی جے پی بھارت میں اقلیتوں، مسلمانوں کیخلاف ظلم وبربریت کے نت نئے ہتھکنڈے استعمال کرتی ہے۔
رپورٹ کے مطابق اب مقبوضہ کشمیر میں لوگوں کی آواز کو دبانے کیلئے بی جے پی نے نیشنل فرنٹ پارٹی پر پابندی عائد کی ہے، نیشنل فرنٹ پارٹی کے موجودہ لیڈر نعیم خان کو بھارتی حکومت نے اگست 2017 سے قید کیا ہواہے۔
رپورٹ کے مطابق مودی حکومت نے آج جموں و کشمیر نیشنل فرنٹ کو غیر قانونی تنظیم قرار دیا ہے، حریت جماعتوں پر پابندیوں کا مقصد کشمیریوں کی آزادی کیلئے آواز کو دبانا ہے۔
بھارتی حکومت کا اس حوالے سے کہنا ہے کہ جموں و کشمیر نیشنل فرنٹ آزادی پسند سرگرمیوں میں ملوث ہے، یہ بھارت کی سالمیت، خودمختاری اور سلامتی کے لیے خطرہ ہے۔
رپورٹ کے مطابق مودی حکومت نے پہلے ہی جماعت اسلامی مقبوضہ جموں و کشمیر پر پابندی عائد کر رکھی ہے، مودی حکومت نے مسلم لیگ، تحریک حریت، ڈیموکریٹک فریڈم پارٹی پر پہلے پابندی عائد کر رکھی ہے۔
مودی حکومت نے جموں و کشمیر لبریشن فرنٹ، دختران ملت اور مسلم کانفرنس پر پابندی عائد کر رکھی ہے، واضح رہے کہ عالمی سطح پر کشمیری عوام کیلئے اٹھائی جانیوالی آوازوں کے باوجود انتہا پسند مودی سرکار کی ہٹ دھرمی برقرار ہے۔
