اسلام آباد: پارلیمنٹ کا مشترکہ اجلاس آج دوبارہ شروع ہوگا، اجلاس میں ایک مرتبہ پھر پارلیمنٹ کے باہر ہو نیوالے دھرنے اراکین پارلیمنٹ کی تقاریر کا موضوع رہیں گی۔
پارلیمنٹ کا مشترکہ اجلاس آج دوبارہ شروع ہوگا، خیال ظاہر کیا جا رہا ہے کہ اجلاس میں پارلیمنٹ کے باہر ہونیوالے دھرنے پر تقاریر اجلاس کا اہم مو ضوع رہے گا۔
اس بات کے بھی امکانات ہیں کہ پارلیمنٹ کے حالیہ اجلاس میں ریڈ زون خالی کرانے کی قرارداد بھی منظور کی جائے گی۔
اجلاس جمعہ تک جا ری رہنے کا امکان ہے۔
کراچی: رابطہ کمیٹی نے ایم کیوایم کے لاپتہ کارکنوں کی بازیابی کے سلسلے میں قائم کی گئی مسنگ پرسن کمیٹی کے انچارج بابرانیس ولدانیس الرحمان اورکمیٹی کے رکن وصی احمدکی گرفتاری کی شدید مذمت کی ہے۔
متحدہ قومی موومنٹ کی رابطہ کمیٹی نے کہاکہ بابرانیس کے بھائی اورایم کیوایم کے کارکن گوہرانیس کوایم کیوایم کے خلاف جاری آپریشن کے دوران 20جون 1996ء کوناظم آبادسے پولیس اورقانون نافذ کرنے والے اداروں نے گرفتارکیاتھاجس کے بعد سے دیگرلاپتہ کارکنوں کی طرح آج تک گوہرانیس کاکوئی پتہ نہیں ہے کہ آیاوہ زندہ ہیں یاانہیں شہیدکردیاگیا۔
ایم کیوایم کے لاپتہ کارکنوں کی بازیابی اوران کے اہل خانہ سے کوآرڈی نیشن کیلئے یہ کمیٹی کئی سالوں سے کام کررہی ہے، بابرانیس ولدانیس الرحمن ایم کیوایم کی مسنگ پرسن کمیٹی کے انچارج ہیں جبکہ وصی احمداس کمیٹی کے رکن ہیں، ان دونوں کارکنوں کوآج صبح چھ بجے رینجرزنے فیڈرل بی ایریا میں ان کے گھروں پرچھاپہ مارکرگرفتارکرلیا اوران کے بارے میں کچھ نہیں بتایا جارہاہے کہ انہیں کہاں رکھاگیاہے ۔
رابطہ کمیٹی نے کہاکہ گزشتہ رات سے اب تک فیڈرل بی ایریا، نارتھ ناظم ا ٓباد، کورنگی، لیاری اوراسکیم 33کے علاقوں سے ایم کیوایم کے 13کارکنوں کوگرفتارکیاجاچکاہے جن کے بارے میں پولیس اوررینجرزکچھ بتانے کیلئے تیارنہیں ہیں،رابطہ کمیٹی نے مطالبہ کیاکہ مسنگ پرسن کمیٹی کے انچارج بابرانیس ، وصی احمداوردیگرگرفتارشدہ کارکنوں کوفی الفوررہاکیاجائے ۔
کراچی: ایم کیوایم کی ارم عظیم فاروقی نے سندھ اسمبلی کی رکنیت سےمستعفی ہونے کا اعلان کردیا۔
متحدہ قومی مومنٹ کی ارم عظیم فاروقی نے اپنےٹوئیٹ میں کہا کہ پارٹی میں موجودچند موقع پرستوں کےساتھ کام نہیں کرسکتی، الطاف بھائی نے عزت دی،ہمیشہ الطاف بھائی کی وفادار رہوں گی ۔
Just to let everyone know That I have finally resigned from my post and also leaving the party for good Enough of Paki Politics #JeayAltaf
— Irum Azeem Farooque (@Irumf) September 8, 2014
اے آر وائی نیوز کے نمائندے رافع حسین کے مطابق ارم عظیم فاروقی پارٹی کے چند لوگوں سے ناراض تھیں،جس سے دل برداشتہ ہوکے انہوں نے مستعفی ہونے کا فیصلہ کیا ہے، ارم عظیم فاروقی سندھ اسمبلی میں ایم کیو ایم کی طرف سے خواتین کی مخصوص نشست پر رکن بنی تھیں۔
لندن: الطاف حسین کہتے ہیں پارلیمینٹ کوطرزعمل ٹھیک کرنےکیلئے ایک ہفتہ دیتے ہیں ،طرزعمل ٹھیک نہ ہوا تواستعفے دیدیں گے،ایم کیوایم اراکین کو ڈپٹی کنوینئرکواستعفے جمع کرانے کی ہدایت کردی، ایم کیوایم کاجنرل ورکرزاجلاس کل شام چھ بجےتک ملتوی کردیا گیا۔
ایم کیو ایم کے قائد الطاف حسین کہتے ہیں کہ کئی دنوں سے دھرنوں کی صورتحال دیکھ رہے ہیں، ایم کیو ایم کرپٹ اور بوسیدہ سسٹم کا حصہ نہیں بن سکتی پارلیمنٹ کا مشترکہ اجلاس عوام کے ساتھ دھوکاہے، ذرائع کے مطابق الطاف حسین پارٹی کے ذمے داروں کے غیر ذمے دارانہ رویئے سے پریشان ہیں اور پارٹی کی قیادت سے سبکدوش ہونے کا فیصلہ کیا ہے، جس کے تفصیلات وہ جنرل ورکرز اجلاس میں پیش کریں گے ، ایم کیو ایم کا جنرل ورکرز اجلاس جمعے کی شام چھ بجے تک ملتوی کردیا گیا ہے۔
پی ٹی آئی کے رہنما شاہ محمود قریشی نے گورنر سندھ ڈاکٹر عشرت العباد خان سے رابطہ کیا اور ایم کیو ایم کے استعفوں سے متعلق تبادلہ خیال کیا، شاہ محمود قریشی کا کہنا تھا کہ ایم کیو ایم کے استعفوں سے بڑی پیش رفت ہوئی ہے۔
کراچی: متحدہ قومی موومنٹ کے قائد الطاف حسین نے خبردار کیا ہے کہ اگر پارلیمنٹ نے اپنےطورطریقے ایک ہفتے میں تبدیل نہ کئے تو ان کی پارٹی کے ممبران اپنےاستعفے جمع کرادیں گے۔
الطاف حسین نے لندن سے اے آر وائی نیوز سے خصوصی گفتگو کررہے تھے اور انہوں نے ایم کیو ایم سے تعلق رکھنے والے ممبران قومی اسمبلی کو ہدایت دیں کہ وہ اپنے استعفے آج ہی پارٹی کے ڈپٹی کنوینر ڈاکٹر نصرت کے پاس جمع کرادیں۔
ان کا کہنا تھا کہ پارلیمنٹ کا مشترکہ اجلاس محض دکھاوا ہےاورانہوں نے مزید کہا کہ ایم کیو ایم کرپٹ اور بوسیدہ سسٹم کا حصہ نہیں بن سکتی۔
الطاف حسین کہتے ہیں کہ انتخابات پر کروڑوں نہیں اربوں روپے خرچ کئے جاتے ہیں تو اسمبلیوں کا میلہ سجتا ہے لیکن یہاں موجود ستر فیصد لوگوں کو عوام کے مسائل کا ادراک نہیں۔
انکا کہنا تھا کہ کئی دنوں سے دھرنوں کی صورتحال دیکھ رہا ہوں،غریبوں کےمسائل بڑھتےجارہےہیں۔
انہوں نے مزید کہا کہ لوگوں کوبےوقوف بنایاجارہاہے مشترکہ اجلاس حکمرانوں نے خود کو درست اور جمہوریت کا چیمپئن ثابت کرنے کے لیے ہے تاکہ فوج جمہوریت کے قریب نہ آئے اور ساری دولت ہمارے جیب میں آئے۔
اسلام آباد: عوامی نیشنل پارٹی کےمرکزی رہنماء اور سینیٹر زاہد خان نے کہا ہے کہ وزیراعظم کسی صورت مستعفی نہ ہوں،ہم آئین اور جمہوریت کی خاطر آپ کے ساتھ ہیں،اگر وزیراعظم مستعفی ہوئے تو یہ پارلیمنٹ کی توہین ہوگی۔
زاہدخان پارلیمنٹ کے مشترکہ اجلاس سے خطاب کررہے تھے،پارلیمنٹ کا مشترکہ اجلاس اسپیکر ایاز صادق کی زیرصدارت منعقد ہوا، انہوں نے کہا کہ خیبر پختونخوا میں ہونے والے الیکشن بھی سلیکشن تھے،ہم جنازے اٹھاتے رہے اوروہ اپنی مہم چلاتے رہے۔
خیبر پختونخواہ کے وزیرِاعلیٰ کا مینڈیٹ بھی جعلی ہے، پرویز خٹک اپنا صوبہ چھوڑ کر اسلام آباد پر قبضے کیلئے آئے ہوئے ہیں،ان کا کہنا تھا کہ اسٹبلشمنٹ نے ہمیں کبھی دل سے تسلیم نہیں کیا،بیورو کریسی نے ملک کا بیڑہ غرق کر دیا ہے۔
زاہد خان نے کہا کہ ہم نے پی ٹی آئی کو بہت سمجھایا کہ مسائل صرف پارلیمنٹ میں ہی حل ہوتے ہیں،اور تمام معاملات کے حل کیلئے پارلیمنٹ ہی بہترین فورم ہے۔
آئین اور پارلیمنٹ کے خلاف بات کرنے والے جیل میں بیٹھے ہیں لیکن ایک شخص جس کا تعلق پنجاب سے ہے وہ آئین اور پارلیمنٹ کے خلاف مسلسل بول رہا ہے لیکن اسے کچھ نہیں کہا جارہا،صرف پنجاب پاکستان نہیں، انہوں نے کہا کہ قانون بناناپارلیمنٹ کا کام ہے اور اس پر اپنی رٹ قائم کرنا حکومت کی ذمہ داری ہے۔
اسلام آباد: ریڈزون میں انقلاب اورآزادی مارچ والوں کا دھرنا اورانیس روزسے شاہراہِ دستور کی سرگرمیاں متاثر ہورہی ہیں لہذاحکومت نےمظاہرین کا قبضہ چھڑانے کیلئے فوج سے مددلینےکے آپشن پرغور کرنا شروع کردیا ہے۔
ذرائع کے مطابق پارلیمنٹ کے مشترکہ اجلاس میں مقتدرایوان کی بھرپورحمایت کے بعداجلاس میں ریڈزون فوج کے ذریعے خالی کرانے کی قراردادمنظور کرائی جائے گی۔
قراردادمیں مطالبہ کیا جائے گاکہ ریڈزون خالی کرنے کے لئے آئینی راستہ اختیار کیاجائےجس کے بعد حکومت باقاعدہ احکامات جاری کرے گی۔
اس سے قبل جب ہفتے اور اتوار کی درمیانی شب مظاہرین نے وزیرِاعظم ہاوٗس کی جانب مارچ کیا تھا اس وقت بھی حکومت نے ان کو روکنے کے لئے پولیس کی مدد سے طاقت کا مظاہرہ کیا تھا جس کے نتیجے میں تین افراد جاں بحق اور متعددزخمی ہوگئے تھے۔
اسلام آباد: جمیعت العلمائے پاکستان (ف) کے سربراہ مولانا فضل الرحمٰن نے کہا ہے کہ پارلیمنٹ کی توہین پوری قوم کی توہین ہے، وزیر اعظم استعفیٰ نہیں دینگے اور نہ ہی چھٹی پر جائیں گے،ان خیالات کا اظہار انہوں نے پارلیمنٹ کے اجلاس سے خطاب کرتے ہوئے کیا۔
انہوں نے کہا کہ دھاندلی کا رونا رونے والے خود کے پی کے میں حکومت کررہے ہیں، اسلام آباد کو ان جتھوں سے پاک کرنا حکومت کی انتظامی ذمہ داری ہے، ان کا کہنا تھا کہ اگر صوفی محمد پر بغاوت کا مقدمہ چل سکتا ہے تو عمران خان اورطاہرالقادری پر بھی آرٹیکل چھ کے تحت مقدمہ درج کیا جائے۔
آج پاکستان کی جمہوریت اور پارلیمنٹ پر حملہ ہوا ہے، پارلیمنٹ اور جمہوریت کو ختم کرنے کی سازش کی جارہی تھی جسے ناکام بنا دیا گیا۔ انہوں نے کہا کہ اگر عمران خان اور طاہرالقادری میں ذرا سی بھی اخلاقی جرات ہے تو ان کو اپنی سیاسی موت کا اعتراف کرتے ہوئے دفن ہوجانا چاہئے ۔
پی ٹی وی پر قبضے سے پاکستان کی دنیا بھر میں بدنامی ہوئی کہ جب آرمی کے جوان پی ٹی وی کی عمارت میں پہنچے تو مظاہرین نے پاک فوج کے جوانوں کا پرتپاک استقبال کیا اور ان کے حق میں نعرے لگائے۔ یہ لوگ دنیا کو کیا پیغام یہ دینا چاہتے ہیں کہ پاکستانی فوج ایک ریاست کی حامی ہے اور پولیس دوسری ریاست کی ۔ یہ عناصر ملک کو تباہی کی جانب لے جانا چاہتے ہیں۔
انہوں نے کہا کہ پی ٹی وی سمیت کسی ٹی وی چینل نے ہماری ریلی کی کوریج نہیں کی جبکہ اس ریلی میں ایک لاکھ سے زائد لوگ شریک تھے۔
پوری قوم کا دھیان آئی ڈی پیز سے ہٹا دیا گیا، دس لاکھ کی افراد کی ذمہ داری حکومت پر ہے لہٰذا حکومت ان کا بھی خیال رکھے ، حالیہ واقعات کے باعث چین کے وزیراعظم نے اپنا دورہِ پاکستان ملتوی کردیا۔
مولانا فضل الرحمٰن نے اسپیکر سے گلہ کرتے ہوئے کہا کہ آپ نے اب تک تحریک انصاف کے ممبرانِ پارلیمنٹ ۔کے استعفے کیوں قبول نہیں کئے گئے؟
اسلام آباد: پاکستان پیپلزپارٹی رہنما چوہدری اعتزازاحسن نہ کہا ہے کہ دھرنے والوں کے الزامات میں صداقت ہے،اگرسانحہ ماڈل ٹاؤن کی ایف آئی آردرج ہوجا تی تو کونسی قیامت آجاتی،وہ پارلیمنٹ کےاجلاس سے خطاب کررہے تھے،انہوں نے کہا کہ یہ الزام بھی درست ہے کہ انتخابات میں دھاندلی ہوئی ہے، جس کے ثبوت بھی موجود ہیں.
ہم پارلیمنٹ کے ساتھ ہیں اور اپوزیشن کی جانب سے میں یقین دلاتا ہوں کہ ہم آئین، پارلیمنٹ اور جمہوریت کو بچانے کیلئے وزیراعظم کے ساتھ ہیں،انہوں نے اپنے خطاب میں ایک فرضی واقعہ سنایا کہ ایک ماں کو اس کا نافرمان بیٹا بہت زیادہ تنگ کرتا تھا،جس کے باعث اس بیوہ کو بہت تکلیف کا سامنا کرنا پڑتا تھا ، ایک دن اس کےبیٹے کو چوری کے الزام میں پولیس نے پکڑ لیا جب ماں کو پتہ چلاتو وہ بھاگی بھاگی تھانے پہنچی تو دیکھا کہ تھانیداراس کے بیٹے کو چارپائی سے باندھ کر پٹائی کررہا ہے، اور ہر بار چھتر لگنے پر اس کا بیٹا زور سے چلاتاکہ "ہائے ماں ” تو ماں نے کہا کہ” صدقے جاؤں تھانیدار تو نے میرے بیٹے کو ماں یاد دلا دی ” تو میں کہتا ہوں صدقے جاؤں عمران خان اورطاہرالقادری کہ تم دونوں نے وزیراعظم کو پارلیمنٹ یاد دلا دی۔
اعتزاز احسن نے کہا کہ پی پی کارکنان مجھ سے سوال کرتے ہیں کہ آپ حکومت کا ساتھ کیوں دے رہے ہیں تو میں کہتا ہوں کہ ہم جمہوریت اورآئین کے تقدس کے لئے پارلیمنٹ کے ساتھ کھڑے ہیں،لیکن ہمیں اندیشہ ہے کہ اگر حکومت اس بحران سے بچ نکلی تو ان کے وزراء کے تکبر اور رعونت میں مزید اضافہ ہوجائیگا۔
انہوں نے کہا کہ آپ ماڈل ٹاؤن میں چھوٹی چھوٹی رکاوٹیں ہٹانے چلے تھے،اس کے بدلے بڑی بڑی رکاوٹیں لگانی پڑگئیں، انہوں نے کہا کہ میڈیا کو تشدد کا نشانہ بنایا گیا جس کی ہم سب شدید مذمت کرتے ہیں۔،
کراچی: پاکستان تحریک انصاف کے چار ارکان سندھ اسمبلی نے اپنے استعفے سیکریٹری سندھ اسمبلی کوجمع کرادیے ہیں ۔
تحریک انصاف کے چار اراکین سندھ اسمبلی نے اپنےاستعفے سیکریٹری سندھ اسمبلی کو جمع کرادئیے، استعفا جمع کرانے والوں میں ثمر علی خان،حفیظ الدین ،ڈاکٹرسیما ضیاء اور خرم شیرزمان شامل تھے، سیکریٹری سندھ اسمبلی کا کہنا تھا کہ پی ٹی آئی کے رکن سندھ اسمبلی سید حفیظ الدین کا استعفٰی قانونی طور پر درست نہیں کیونکہ الیکشن کمیشن نے آٹھ اگست کو حفیظ الدین کی نااہلی کے بعد جماعت اسلامی کے عبدالرزاق کو رکن سندھ اسمبلی کے منتخب کیے جانے کا نوٹیفکیشن جاری کیاتھا،سید حفیظ الدین کی بحالی کا سندھ اسمبلی کو دوبارہ کوئی نوٹیفکیشن موصول نہیں ہوا۔لہذا تحریک انصاف کے تین ہی استعفے تصور کیے جائینگے۔