Tag: پارلیمنٹ

اسلام آباد :  ریڈ زون میں پولیس اور مظاہرین کے درمیان ایک بار پھر جھڑپ جاری ہے پولیس کی جانب سے شیلنگ جاری ہیں، جس کے باعث متعدد افراد ذخمی ہوگئے ہیں۔

اسلام آباد میں پاک سیکریٹریٹ کے قریب مارگلہ روڈ پرپولیس نے اچانک آگے بڑھتے ہوئے شیلنگ شروع کردی جس پر مظاہرین نے مزاحمت کرتے ہوئے پولیس کو روکنے کی کوشش کی ۔

اے آر وائی نیوز کے رپورٹر ذلقرنین حیدر کے مطابق جھڑپوں کے دوران پولیس کی طرف سے آنسو گیس کے شیل اور ربڑ کی گولیاں فائر کی گئیں، مظاہرین نے آنسو گیس کے شیل واپس اُٹھاکر پولیس کی طرف پھینکنا شروع کردیئے لیکن عوامی تحریک کے سٹیج سے کارکنان کو پارلیمنٹ ہاﺅس کی طرف واپس آنے کے اعلانات کیے جارہے ہیں ۔

تصادم کا یہ سلسلہ وقفے وقفے سے جاری ہے، مشتعل مظاہرین کی جانب سے پولیس اہلکاروں کے خلاف نعرے بازی جاری ہے، جب کہ مظاہرین کو روکنے اور منتشر کرنے کیلئے پولیس کی جانب سے ہوائی فائرنگ اور ربڑ کی گولیوں کا بھی استعمال کیا جا رہا ہے، جس کے باعث متعدد افراد زخمی ہوگئے،زخمیوں کو پیمز ہسپتال منتقل کردیا گیا ہے۔

اسلام آباد : عمران خان کا کہنا ہے کہ اب پورے پاکستان میں تحریک انصاف کے کارکن نکلیں گے، بتائیں گے عوامی طاقت کیا ہوتی ہے سارا ملک بند کر دیں گے۔

وزیراعظم ہاؤس جانے والے دھرنے کے شرکا پر شیلنگ کی مذمت کرتے ہوئے عمران خان کا کہنا تھا کہ دنیا بھر میں وزیراعظم ہاؤس کے سامنے احتجاج ہوتے ہیں لیکن ہمارے پاس انتشار کے سوا کوئی راستہ نہیں چھوڑا گیا، ہم ملک بھر میں احتجاج کریں گے کارکنان پورے پاکستان میں باہر نکل آئیں۔ انہوں نے کہا کہ حکومت نے جو کیا قانون کے خلاف کیا، نوازشریف ہمارا راستہ نہیں روک سکتے، کارکنان کسی صورت پیچھے نہ ہٹیں اور ڈٹ کر مقابلہ کریں ہم اپنے مقصد میں کامیاب ہوکر ہی جائیں گے۔

عمران خان نے کہا کہ ہم پولیس، رینجرز اور فوج کو پیغام دیتے ہیں کہ مظاہرین ان کے اپنے لوگ ہیں، ہم پر امن آئے تھے اور پر امن ہی جائیں گے ان پر کسی قسم کا کوئی تشدد نہ کیا جائے، ہم جمہوریت کو کبھی نقصان نہیں پہنچائیں گے لیکن اس حسنی مبارک جمہوریت کو صرف عوام کی طاقت ہی ہٹاسکتی ہے،پارلیمنٹ اور عدالتیں ان کا کچھ نہیں کرسکتیں، کارکنان میرا ساتھ نہ چھوڑیں میں ہمیشہ ان کے ساتھ رہوں گا۔

اسلام آباد: وفاقی پولیس کی جانب سے انقلاب مارچ کے مظاہرین پر آنسو گیس کے شیلنگ اور ربر کی گولیوں کا آزادانہ استعمال کیا جارہا ہے جس سے متعدد مظاہرین ذخمی ہوگئے ہیں۔

اےآر وائی نیوز کے اینکر اقرارالحسن نے شاہراہ ِ دستور سے براہ راست کوریج کرتے ہوئے بتایا کہ مظاہرین پر امن طریقے سے وزیراعظم  ہاؤس کی جانب بڑھ رہے تھے کہ پولیس نے ان پر دھاوا بول دیا۔

ذرائع کے مطابق شیلنگ اورربرکی گولیوں سے کئی مظاہرین زخمی ہوئے ہیں اور کئی خواتین بے ہوش ہوگئی ہیں اور گیس کی شدت کے باعث مظاہرین کی حالت تشویش ناک ہے جبکہ پولیس کی جانب سے ہوائی فائرنگ بھی کی جارہی ہے۔

اےآر وائی نیوز کے کیمرہ مین کو بھی اس وقت قانون نافذ کرنے والے اہلکاروں نے تشدد کا نشانہ بنایا جب وہ ایک شدید زخمی ہونے والے نوجوان کی کوریج کررہا تھا۔

پولیس نے مظاہرین کو پاک سیکریٹریٹ سے پیچھے دکھیل دیا ہے اور مقصد کے لئے پاک سیکریٹریٹ  سے مظاہرین پر بے تحاشہ شیلنگ کی گئی ہے۔

دوسری جانب ذرائع کے مطابق آئی جی اسلام آباد نے مظاہرین کی گرفتاری حکم بھی دے دیا ہے۔

وفاقی وزیر دفاع خواجہ آصف نے کہا ہے کہ پوری طاقت کے ساتھ ریاست کا دفاع کیا جائے گا وزیراعظم نوازشریف ملک کے آئینی وزیراعظم ہیں، ریڈ زون کو خالی کروانے کے لئے فوج کو بھی طلب کیا جاسکتا ہے۔

اسلام آباد : پاکستان تحریک انصاف کے سربراہ عمران خان نے بھی آزادی مارچ کووزیراعظم کے سامنے منتقل کرنے کا اعلان کردیا ہے۔

اس سے قبل پاکستان عوامی تحریک کے سربراہ ڈاکٹر طاہر القادری بھی انقلاب مارچ کے دھرنے کو وزیر ہاوٗس کے سامنے منتقل کرنے کا اعلان کرچکے ہیں۔

اسلام آباد میں انقلاب مارچ کے کے شرکاء سے خطاب میں پاکستان عوامی تحریک کے سربراہ ڈاکٹر علامہ طاہرالقادری کا کہنا تھا کہ جس طرح 17 دن سے پُرامن دھرناجاری ہے اسی طرح پُر امن دھرنا اب وزیر اعظم ہاوٗس کے سامنے منتقل کیا جارہا ہے۔

عمران خان کاکہنا تھا کہ نواز شریف تحقیقات تک ایک ماہ کے لئے استعفی دیدو لیکن نواز شریف ملک تباہ کرنے کیلئے تیار ہے کرسی چھوڑنے کیلئے نہیں، سانحہِ ماڈل ٹاؤن کی ایف آئی آر میں ابھی تک شہباز شریف کا نام نہیں دیا۔

ان کا مزید کہنا تھا امام خمینی کے انقلاب کے وقت پولیس ،فوج نے گولی نہیں چلائی تھی اور پولیس ، رینجرز سے کہنا چاہتا ہوں کہ پرامن مارچ پر تشدد نہیں کرنا۔

انہوں نے کہا پہلے میں اور تحریک انصاف کے ٹائیگر نکلے گے پھر خواتین اور بچے پہنچے گے۔ عمران خان نے تحریک انصاف کے رہنما جاوید ہاشمی کا نام لیتے ہوئے کہا ہاشمی صاحب آپ کو پتا ہونا چاہیے کہ عمران جہوریت کو کمزور نہیں بلکہ مضبوط کرے گا۔