اسلام آباد : چیئرمین تحریک انصاف عمران خان نے پارٹی رہنماؤں کا اجلاس طلب کرلیا، جس میں موجودہ صورتحال ،سپریم کورٹ میں سماعت پر مشاورت ہوگی۔
تفصیلات کے مطابق چیئرمین پی ٹی آئی عمران خان نے پارٹی رہنماؤں کا اجلاس طلب کرلیا ، اجلاس عدالتی کارروائی کے بعد بنی گالہ میں ہوگا۔
اجلاس میں موجودہ صورتحال ،سپریم کورٹ میں سماعت پر مشاورت ہوگی اور آئندہ کی سیاسی حکمت عملی پر بھی غور ہوگا۔
پارٹی رہنماؤں کے اجلاس میں قانونی اور آئینی ماہرین کو بھی طلب کیا گیا ہے۔
خیال رہے سپریم کورٹ میں ڈپٹی اسپیکر پنجاب اسمبلی کی رولنگ کیخلاف سماعت جاری ہے، چیف جسٹس پاکستان عمرعطا بندیال کا کہنا ہے کہ فل کورٹ کی تشکیل کا مطالبہ تاخیری حربےکےعلاوہ کچھ بھی نہیں، ہم گورننس اور بحران کے حل کیلئے جلدی کیس نمٹانا چاہتے ہیں۔
گذشتہ روز پاکستان تحریک انصاف کے چیئرمین اور سابق وزیراعظم عمران خان نے ن لیگ کی سپریم کورٹ کے خلاف جارحانہ بیان بازی پر ردعمل دیتے ہوئے کہا تھا کہ جن کو یہ خرید نہیں سکتے ہیں انہیں یہ ختم کردیتے ہیں۔
پی ٹی آئی چیئرمین نے اپنے اس ٹوئٹ میں 1997 میں ن لیگ کے سپریم کورٹ پر حملے کی ویڈیو بھی شیئر کرتے ہوئے لکھا کہ یہ ویڈیو شریف مافیا کی اصلیت ہے۔
