اسلام آباد: مسلم لیگ ن کے رہنما اور سابق وزیر خارجہ خواجہ آصف نے کہا ہے کہ پارٹی کی سیکنڈ لیڈر شپ قیادت سنبھال سکتی ہے، نواز شریف اور شہباز شریف خود سیکنڈ لیڈر شپ کو آگے لارہے ہیں۔
تفصیلات کے مطابق سابق وزیر خارجہ خواجہ آصف نے اے آر وائی نیوز کے پروگرام ’آف دی ریکارڈ‘ میں گفتگو کرتے ہوئے کہا کہ چیئرمین پی اے سی بڑی ذمہ داری کا کام ہے، میں نے معذرت کی تو پارٹی نے مجھے کہا آپ کو بننا پڑے گا، بڑے میاں صاحب سے جیل میں جاکر رانا تنویر کے لیے مشاورت کی تھی۔
انہوں نے کہا کہ مشاورتی عمل کے دوران شہباز شریف کے خلاف کیس بنے، چند ہفتے سے یہ بات اٹھ رہی تھی کہ ذمہ داریاں بانٹنی چاہئے، شہباز شریف کی غیرموجودگی میں پارلیمانی گروپ نے مشاورت کی، پارلیمانی گروپ نے بھی اتفاق کیا کہ میں چیئرمین پی اے سی نہیں بننا چاہتا، چئرمین پی اے سی کے لیے ماضی کی روایت کے مطابق اصولی موقف اپنایا۔
خواجہ آصف نے کہا کہ شہباز شریف نے دو عہدے ساتھیوں کو دئیے تو کوئی وجہ نہیں ڈھونڈنی چاہئے، اگلے ہفتے مزید پارٹی کے چہرے سامنے لائے جائیں گے، پچھلے چھ ماہ میں اٹھنے والے اعتراضات پر پارٹی کو ری جنریٹ کررہے ہیں۔
مسلم لیگ ن کے رہنما نے کہا کہ نواز شریف کو باہر جانے کی اجازت ملی تو یہ محض اتفاق ہوگا، شاہد خاقان عباسی نے بہت اچھے انداز میں پارٹی کو چلایا تھا، شاہد خاقان نے پارٹی چلا کر ثابت کیا کہ سیکنڈ لیڈر شپ اچھا پرفارم کرسکتی ہے ، سو فیصد کہتا ہوں شہباز شریف واپس آکر پارٹی کو دوبارہ لیڈ کریں گے۔
انہوں نے کہا کہ پرویز الٰہی کو ڈاکو کہا جاتا تھا مگر اب انہیں نیب نے کلیئر کردیا، ڈھیل اور ڈیل کی بات نہیں، سیاست میں لفظ آخر کچھ بھی نہیں ہوتا ہے، پنجاب کے اندر ہماری پوزیشن بہت اچھی ہے، ماضی کے مقابلے میں ہماری پوزیشن اس وقت بہتر ہے۔
خواجہ آصف کا کہنا تھا کہ ماضی کے مقابلے میں ہماری پوزیشن اس وقت بہتر ہے، شاہد خاقان نے پارٹی چلا کر ثابت کیا کہ سیکنڈ لیڈر شپ اچھا پرفارم کرسکتی ہے۔
سابق وزیر خارجہ نے کہا کہ پی ٹی آئی 22 سال سے ساتھ لوگوں کو نکال کر مصنوعی لوگ لے کر آئے، ہماری سیاسی پیدائش اسی جماعت سے ہوئی ہے، میاں صاحب باہر بھی نہیں بیٹھیں گے، نواز شریف بھی ملک سے باہر جاتے ہیں تو واپس آجائیں گے، نواز شریف، شہباز شریف کی قیادت میں ہی پارٹی چلائیں گے۔
انہوں نے کہا کہ رانا تنویر کو عارضی طور پر چیئرمین پی اے سی بنایا جارہا ہے، چیئرمین پی اے سی کے لیے رانا تنویر پر نواز شریف سے مشاورت کی، ثابت کرنا چاہتے ہیں پارٹی کی سیکنڈ لیڈر شپ قیادت سنبھال سکتی ہے، چیئرمین پی اے سی کی تبدیلی کا فیصلہ دسمبر اور جنوری میں ہوگیا تھا۔