کراچی : شہر قائد میں درجہ حرارت44 ڈگری سینٹی گریڈ تک پہنچ گیا ، محکمہ موسمیات نے کل سے گرمی میں کمی کا امکان ظاہر کیا ہے۔
تفصیلات کے مطابق کراچی میں قیامت خیز گرمی نے شہریوں کو برا حال کردیا ہے ، شہر میں ہیٹ ویو کے پانچویں روز شدید گرمی کے باعث درجہ حرارت 44 ڈگری سینٹی گریڈ ریکارڈ کیا گیا۔
محکمہ موسمیات کا کہنا ہے کہ شہر میں سمندری ہوائیں بند ہونے سے گرمی کی شدت میں اضافہ محسوس کیا جارہا ہے، تاہم رطوبیت کم ہونے کی وجہ سے ہیٹ ویو زیادہ خطرناک نہیں۔
محکمہ موسمیات نے کل سے گرمی میں کمی کی پیشگوئی کرتے ہوئے کہا ہے کہ درجہ حرارت 37 ڈگری تک رہنے کا امکان ہے۔
دوسری جانب ملک کےبیشترعلاقوں میں موسم آج بھی گرم اور خشک رہے گا، محکمہ موسمیات نےآئندہ چوبیس گھنٹے میں کوئٹہ،لاہور، اسلام آباد،پشاورسمیت ملک کے بیشترعلاقوں میں موسم گرم اور خشک رہنے کی پیشگوئی کی ہے۔
خیال رہے محکمہ موسمیات نے کراچی کے لیے ہیٹ الرٹ جاری کیا تھا ، جس میں کہا گیا تھا کہ آج سے 5 اپریل تک کراچی سمیت سندھ بھرمیں شدید گرمی ہوگی ، ہیٹ ویو کی وجہ سے ہفتہ تک درجہ حرارت میں 4 سے 6 ڈگری اضافہ متوقع ہے۔
ماہرین صحت کا کہنا ہے شہری ہیٹ ویو سے بچنے کے لیے احتیاطی تدابیر اختیار کریں اور بلاضرورت گھروں سے باہر نہ نکلیں۔
