اسلام آباد: ڈی جی پاسپورٹس نے پاسپورٹ بنوانے والے شہریوں کی بڑی مشکل آسان کردی، جس سے پاسپورٹ امور میں بہتری آئے گی اور شہریوں کو سہولت میسر ہوگی۔
تفصیلات کے مطابق ڈائریکٹر جنرل پاسپورٹس مصطفیٰ جمال قاضی کا شہریوں کی سہولت کے لیے بڑا اقدام سامنے آیا۔
شہریوں کو بہتر اور بروقت سہولت فراہم کرنے کے لیے ڈی جی پاسپورٹس نے پنجاب کے تمام زونز کی نئی انتظامی تقسیم کر دی ہے۔
اعلامیے میں کہا گیا کہ محکمہ پاسپورٹس نے پنجاب میں سینٹرل پنجاب اور جنوبی پنجاب کے تحت 4 سب زونز تشکیل دیے ہیں۔ سینٹرل پنجاب میں آر پی او لاہور اور آر پی او گوجرانوالہ کو نئے سب زونز کا درجہ دیا گیا ہے، جبکہ جنوبی پنجاب میں آر پی او ملتان اور آر پی او بہاولپور کو سب زونز بنایا گیا ہے۔
مصطفیٰ جمال قاضی نے کہا کہ اس فیصلے کا مقصد شہریوں کو پاسپورٹ کے اجراء میں مزید بہتری اور بروقت خدمات فراہم کرنا ہے۔
ان کا کہنا تھا کہ نئے سب زونز کے قیام سے صوبے بھر میں پاسپورٹ امور میں بہتری آئے گی اور شہریوں کو سہولت میسر ہوگی۔
انہوں نے مزید کہا کہ پاسپورٹس کے بروقت اجرا کے لیے محکمہ اپنے تمام وسائل بروئے کار لا رہا ہے تاکہ عوام کو کسی مشکل کا سامنا نہ ہو۔
پاسپورٹ سے متعلق تمام خبریں
خیال رہے پاکستانی پاسپورٹ ریاست پاکستان کے شہریوں کو بین الاقوامی سفر کیلیے جاری کیا جاتا ہے۔ یہ دستاویز آپ کی شناخت اور پاکستانی شہریت کی تصدیق کرتی ہے اور وزارت داخلہ کی شاخ ڈائریکٹریٹ جنرل آف امیگریشن اینڈ پاسپورٹ پاسپورٹ جاری کرنے کی ذمہ داری ادا کرتی ہے۔
عام طور پر عام اور سرکاری پاسپورٹس جاری کیے جاتے ہیں، ان کی میعاد 5 یا 10 سال ہوتی ہے اور 15 سال سے کم عمر بچوں کے لیے 5 سال کا جاری کیا جاتا ہے۔
مشین ریڈ ایبل پاسپورٹ زیادہ محفوظ اور جدید ہیں۔ پاسپورٹ کی درخواست آن لائن یا قونصل خانے میں کی جا سکتی ہے اور اس کے بغیر بین الاقوامی سفر ناممکن ہے۔
