شیخوپورہ (29 جولائی 2025) : پاسپورٹ آفس کے باہر شہریوں کو لوٹنے والا ایجنٹ مافیا بے نقاب ہو گیا، جعلساز ایجنٹس لوگوں کو تیز رفتار اور آسان پاسپورٹ کی جھوٹی یقین دہانی کرا کے بھاری رقوم وصول کر رہے تھے۔

تفصیلات کے مطابق وفاقی تحقیقاتی ادارے (ایف آئی اے) نے شیخوپورہ میں پاسپورٹ آفس پر کامیاب کارروائی کرتے ہوئے بدعنوانی میں ملوث ایک منظم نیٹ ورک کو بے نقاب کر دیا ہے۔

ترجمان ایف آئی اے نے بتایا کہ چھاپے کے دوران دفتر کے باہر غیرقانونی طور پر کام کرنے والے 8 ایجنٹس کو گرفتار کیا گیا ہے، جو شہریوں سے بھاری رقوم لے کر پاسپورٹ کے عمل کو "فوری اور آسان” بنانے کا جھانسہ دے رہے تھے۔

کارروائی کے دوران پاسپورٹ آفس کے دو سیکیورٹی گارڈز کو بھی حراست میں لے لیا گیا ہے، جن پر ایجنٹوں کو دفتر میں داخلے اور غیر قانونی سرگرمیوں میں معاونت فراہم کرنے کا الزام ہے۔

مزید پڑھیں : پاکستانی پاسپورٹ میں بڑی تبدیلی! پرانے پاسپورٹ رکھنے والے کیا کریں؟

ایف آئی اے حکام کے مطابق، پاسپورٹ آفس میں ایجنٹوں کے داخلے پر پہلے ہی پابندی عائد تھی، اس کے باوجود ایک منظم نیٹ ورک عرصہ دراز سے خفیہ طور پر سرگرم تھا۔

حکام نے شہریوں کو متنبہ کیا ہے کہ وہ ایجنٹوں سے پاسپورٹ کے سلسلے میں کسی بھی قسم کا لین دین نہ کریں اور سرکاری طریقہ کار پر عمل کرتے ہوئے خود رجوع کریں۔

ایف آئی اے کا کہنا ہے کہ مزید تفتیش جاری ہے اور کرپشن میں ملوث تمام افراد کو قانون کے کٹہرے میں لایا جائے گا۔

حیدرآباد: پاسپورٹ آفس کی ناقص کارکردگی عیاں ہوگئی، پریشانی کا شکار شہریوں نے تنگ آکر ویڈیو سوشل میڈیا پر وائرل کردی۔

تفصیلات کے مطابق سندھ کے شہر حیدرآباد میں پاسپورٹ آفس آنے والے شہریوں کو کافی مشکلات پیش آرہی ہیں، عملہ ڈیوٹی کے اوقات شروع ہونے کے کئی گھنٹوں بعد آفس آتا ہے، پاسپورٹ آفس کی حالت زارعوام کیلئے درد سر بن چکی ہے جبکہ شہریوں کو شدید پریشانی کا سامنا کرنا پڑتا ہے۔

پاسپورٹ آفس میں افسران اور عملہ 11 بجے تک ڈیوٹی سے غیرحاضر رہتا ہے، پاسپورٹ آفس کے معلوماتی کاؤنٹر پر بھی کوئی ذمہ دار موجود نہیں ہوتا۔

اس تمام صورتحال اور پاسپورٹ آفس کی بدترین حالت سے تنگ شہریوں نے حیدرآباد پاسپوٹ آفس کی ویڈیو بنا کر سوشل میڈیا پر وائرل کردی ہے۔

پاسپورٹ دفتر میں نہ صرف نظم و ضبط کا فقدان ہے بلکہ درخواست گزاروں کو سہولیات کی فراہمی کا کوئی انتظام نہیں ہے، عوام نے وفاقی وزیرداخلہ محسن نقوی سے فوری نوٹس لینے، پاسپورٹ آفس کے انتظامات بہتر کرنے کی اپیل کی ہے۔

اسلام آباد : پاسپورٹ بنوانے والوں کی بڑی مشکل آسان ہوگئی، جس سے شہریوں کی پریشانی میں کمی کا امکان ہے۔

تفصیلات کے مطابق ملک میں پاسپورٹ کی فراہمی کا سلسلہ التواء کا شکارہے۔ جس کے باعث نئے پاسپورٹ بنوانے اور پاسپورٹ کی تجدید کرانے والے شہری بری طرح پریشان ہیں۔

اس صورتحال میں پاسپورٹ بنوانے والوں کے لیے اچھی خبر آگئی، جس سے بڑی پریشانی حل ہوگئی۔

کراچی اور لاہورمیں 2 پاسپورٹ آفس 24 گھنٹے کھلے رکھنے کا نوٹیفکیشن جاری کردیا گیا، اس حوالے سے ڈی جی امیگریشن اینڈپاسپورٹس نے پاسپورٹ آفس سےمتعلق نوٹیفکیشن جاری کیا۔

وفاقی وزیرداخلہ نے لاہور،کراچی میں2پاسپورٹ آفس24گھنٹےکھولنےکاحکم دیاتھا اور کہا تھا کہ عوام کی سہولت کیلئے 2 پاسپورٹ آفس 24 گھنٹے کھلے رہیں گے، پوری کوشش ہے عوام کو پاسپورٹ بنوانے میں مشکلات پیش نہ آئیں۔

گذشتہ روز پاسپورٹ کی فاسٹ ٹریک پاسپورٹ فیس میں اضافہ کیا گیا تھا، 36 صفحات پر مشتمل 5 سالہ پاسپورٹ کی فاسٹ ٹریک فیس 12 ہزار 500 روپے مقرر کی گئی ہے۔

36 صفحات پر مشتمل 10 سالہ پاسپورٹ کی فیس 16 ہزار 200 روپے کی گئی ہے، 72 صفحات پر مشتمل 5 سالہ پاسپورٹ کی فیس 18 ہزار 500 روپے جبکہ 10 سالہ مدت کی فیس 25 ہزار 200 روپے کر دی گئی ہے۔

100 صفحات والے پاسپورٹ کی 10 سالہ مدت کی فاسٹ ٹریک فیس 32 ہزار روپے کر دی گئی ہے ۔

اسلام آباد : ملک بھر میں پاسپورٹ بنانے کا سسٹم بیٹھ گیا، سسٹم خراب ہونے کی وجہ سے آج کوئی پاسپورٹ پراسس نہیں ہوسکا۔

تفصیلات کے مطابق ملک بھر کی طرح کراچی میں بھی پاسپورٹ آفس کا سسٹم بیٹھ گیا، پاسپورٹ سسٹم جام ہونے کی وجہ کام بند ہیں۔

پاسپورٹ حکام کا کہنا ہے کہ سسٹم خراب ہونے کی وجہ سے کوئی پاسپورٹ پراسس نہیں ہوسکتا، جس کے بعد صبح دس بجے سے سینکٹروں شہری مایوس ہوکر گھر جانے پر مجبور ہیں۔

یاد رہے رواں ماہ ہی محکمہ امیگریشن و پاسپورٹ نے عوام کے لیے نادرا آفس سے پاسپورٹ بنوانے کی سہولت متعارف کرائی تھی۔

نادرا کے 30 شہروں کے دفاتر میں پاسپورٹ بنائے جانے کا فیصلہ ہوا تھا اور وزیر اعظم کی ہدایت پر باضابطہ نوٹیفکیشن بھی جاری کر دیا گیا تھا۔

جاری نوٹیفکیشن کے مطابق اب پاسپورٹ کا ایک کاؤنٹر بھی نادرا کے دفتر میں ہی موجود ہوگا، لاہور ریجن کے 12 چھوٹے شہروں اور کراچی کے 2 علاقوں میں نادرا سینٹر پر پاسپورٹ بن سکے گا، اسی طرح ملتان کے 6، سرگودھا کے 2، کے پی میں 4 اور اسلام آباد کے 2 نادرا سینٹرز پر بھی پاسپورٹ بنائے جا سکیں گے۔