ہالی وڈ کی تاریخ میں پال نیومین کو ان کی بے مثال اداکاری کے سبب ہمیشہ یاد رکھا جائے گا۔ انھیں اکثر دنیا کا غیر معمولی انسان بھی کہا گیا ہے جس کی وجہ اُن کی انسان دوستی اور جذبۂ خدمت ہے۔ پال نیومین نے 83 سال کی عمر پائی اور 2008ء میں آج ہی کے دن اس دنیا سے رخصت ہوگئے۔
اداکار پال نیومین نے فلم کی دنیا میں اپنے کرداروں میں حقیقت کا رنگ بھرتے ہوئے خوب شہرت کمائی اور شائقین میں مقبول ہوئے۔
پال نیومین اپنی آنکھوں کی رنگت کی وجہ سے بھی اسکرین پر اور ہر محفل مین سب سے الگ نظر آتے تھے۔ ان کی آنکھوں کا رنگ نیلا تھا۔ وہ ایک وجیہ صورت مرد تھے جس نے اسکرین پر اپنی شان دار اداکاری سے شائقین کو متاثر کیا اور آسکر ایوارڈ یافتہ فن کاروں کی صف میں شامل ہوئے۔ پال نیومین نے ہالی وڈ کی مشہور فلموں ’دی ہسلر‘، ’کیٹ آن اے ہاٹ ٹِن رُوف‘ اور ’دی کلر آف منی‘ میں بے مثال اداکاری کی اور اپنے دور کے کام یاب فن کاروں کے درمیان اپنی پہچان بنائی۔
پال نیومین کا فلمی سفر پانچ دہائیوں پر محیط رہا۔ اس عرصہ میں انھوں نے لگ بھگ ساٹھ فلموں میں کام کیا۔ بہترین پرفارمنس کی بنیاد پر 10 مرتبہ پال نیومین کا نام اکیڈمی ایوارڈ کے لیے فہرست میں شامل کیا گیا اور ’دی کلر آف منی‘ وہ فلم تھی جس میں اپنی شان دار اداکاری پر وہ یہ ایوارڈ حاصل کرنے میں کام یاب ہوگئے۔
پال نیومین نے 26 جنوری 1925ء کو امریکہ کے علاقے کلیولینڈ اوہائیو میں آنکھ کھولی۔ ان کے والد کھیلوں کے سامان کی خرید و فروخت کام کرتے تھے۔ نیومین نے ابتدا میں نیوی میں ملازمت کرنا چاہی، لیکن ان کی نیلی آنکھیں اس راستے میں رکاوٹ بن گئیں۔ دراصل نیومین بطور امیدوار ادارے کی جانب سے ایک ٹیسٹ کے دوران بعض رنگوں کی شناخت نہیں کر سکے تھے اور اسے اُن کا نقص کہہ کر ناکام قرار دے دیا گیا۔
اداکار پال نیومین ایک نہایت متحرک اور فعال شخص تھے جس نے ہمیشہ اپنے شوق کو اہمیت دی۔ وہ 70 کی دہائی میں فلمی دنیا سے صرف اس لیے دور ہوگئے تھے کہ انھیں گاڑیوں کی ریسں کا شوق پورا کرنا تھا۔ ایک ماہر ڈرائیور کی حیثیت سے پال نیومین نے ریس کے متعدد مقابلوں میں حصّہ لیا اور ایک کار ریس میں انھوں نے دوسری پوزیشن حاصل کی تھی۔
ہالی وڈ میں پال نیومین نے اپنی اداکاری کی بنیاد پر کُل تین آسکر ایوارڈ اپنے نام کیے تھے۔ انھوں نے اپنے فلمی سفر کے دوران شریکِ حیات کے طور پر جو این ووڈورڈ کا انتخاب کیا تھا جو خود بھی اداکارہ تھیں۔ وہ پانچ بیٹیوں کے والدین بنے۔
نیلی آنکھوں والے پال نیومین کینسر کے عارضے میں مبتلا تھے، لیکن وہ جب تک زندہ رہے دوسروں کے لیے جینے اور سب کے کام آنے کو اپنا مقصدِ حیات بنائے رکھا۔ پال نیومین نے اُن بچّوں کے لیے ’سمر کیمپ‘ قائم کیے تھے جو مہلک بیماریوں کا شکار تھے۔ اداکار کے بارے میں مشہور تھا کہ وہ جذبۂ خدمت کے تحت کئی خیراتی اداروں کی مالی امداد کرتے رہتے ہیں۔
