Tag: پاناما کیس

اسلام آباد : وزیر مملکت برائے اطلاعات و نشریات مریم اورنگزیب نے کہا ہے کہ الزامات کی سیاست کو چکوال کےعوام نے مسترد کردیا ہے اور عوام نےچکوال میں وزیراعظم پراعتماد کا فیصلہ سنادیا ہے عوام پاناما کا نہیں بلکہ ترقی کے منتظر ہیں جو وزیراعظم کی قیادت میں ہی ممکن ہے۔

مریم اورنگزیب نے میڈیا سے گفتگتو کرتے ہوئے کہا کہ مخالفین صرف باتیں بنا رہے ہیں اور قوم کو الجھائے رکھا ہے جب کہ دوسری جانب وزیراعظم نواز شریف نے آج بھی ایک پاور پروجیکٹ کا فیتہ کاٹ دیا۔

انہوں نے کہا کہ چکوال میں اپوزیشن جماعتوں کے مک مکا کے باوجود الیکشن ہارنے پرمبارک باد دیتی ہوں جہاں ایک طرف ساری جماعتوں کا اتحاد تھا تو دوسری طرف اکیلی جماعت مسلم لیگ (ن) تھی جس کے ساتھ صرف چکوال کے عوام ہوں گے اور عوام نے اپنا فیصلہ اپنے محبوب قائد کے حق میں دیا۔

مریم اورنگزیب نے کہا کہ عوام کو پاناما کیس کا نہیں بلکہ وزیراعظم کی قیادت میں ترقی کا انتظار ہے اور آج بھی وزیراعظم نے اپنے لوگوں کے لیے نئے پروجیکٹ کا افتتاح کیا اور روز کرتے رہیں گے۔

وزیر مملکت نے کہا کہ پہلے بھی نواز شریف کامیاب ہوئے اور تین بار قوم نے تمام سازشوں کو ناکام بناتے ہوئے انہیں اپنا وزیر اعظم منتخب کیا اور کل بھی وزیراعظم عدالت سے ہمیشہ کی طرح سرخرو ہوں گے کیوں کہ وزیراعظم کے پیچھےعوام کی خدمت، دعائیں اور اعتماد ہے۔

اسلام آباد : عوامی مسلم لیگ کے سربراہ شیخ رشید نے کہا ہے کہ پاناما کیس میں سپریم کورٹ کا ایسا فیصلہ آئے گا کہ لوگ مثالیں دیں گے۔

یہ بات انہوں نے اے آر وائی نیوز کے پروگرام پاور پلے میں اینکر پرسن ارشد شریف سے پاناما کیس میں اب تک ہونے والی پیشرفت کے حوالے سے گفتگو کرتے ہوئی کہی۔

انہوں نے کہا کہ قوم کوسپریم کورٹ سےبہترین فیصلےکی امید ہے کرپشن کیخلاف تاریخی فیصلہ نہ آیاتوعام آدمی کا دل ٹوٹ جائےگا اس لیے پوری امید ہے عدالت سے ایسا فیصلہ آئے گا جو سب کے لیے قابل قبول ہو۔

اس موقع پر شیخ رشید نے کہا ہے کہ میں نے ججز سےکہا ہے کہ تاریخی فیصلہ آنا چاہیے آنے والا وقت جس کی مثالیں دے اور اس کیس کو ہمیشہ یاد رکھا جائے۔

انہوں نے بتایا کہ میں نے کیس کے دوران اپنا موقف دیتے ہوئے کہا کہ سرکاری وکلا سے 371 سوال پوچھے لیکن کسی ایک کا بھی جواب نہیں آیا جب کہ ہیلی کاپٹرکیس میں بھی قطری آچکا ہے اسی طرح پاناماکیس میں بھی قطری شہزادے کی دلچسپی رہی ہے۔

عوامی مسلم لیگ کے سربراہ شیخ رشید نے کہا کہ شریف خاندان تسلیم کرچکاہےکہ تمام جائیدادیں ان کی ہیں لیکن بجائے اس کے کہ منی ٹریل بتائی جائے حیلے بہانے کیے جا رہے ہیں۔

انہوں نے کہا کہ وزیر اعظم کا عدالت میں استثنیٰ حاصل نہیں ہے انہیں جو استثنیٰ ملنی تھی وہ اسمبلی میں مل چکی ہے اس لیے عدالت میں استثنیٰ مانگنا درست نہیں اور یہ حربہ کامیاب نہیں ہو گا۔

مکمل انٹرویو: 

اسلام آباد : پاناما کیس میں وزیراعظم نواز شریف کے وکیل مخدوم علی خان نے سپریم کورٹ میں چھٹیوں کی درخواست جمع کرادی ہے جسے منظور کرلیا گیا ہے۔

تفصیلات کے مطابق پاناما کیس میں وزیراعظم نواز شریف کے وکیل مخدوم علی خان نے سپریم کورٹ میں 13 فروری سے 24 تک کے لیے چھٹیوں کی درخواست جمع کرادی ہے جسے منظور کرلیا گیا ہے۔

وزیراعظم کے وکیل نے درخواست میں موقف اپنایا کہ ذاتی مصروفیات کے باعث13 سے 24 فروری تک عدالت میں پیش نہیں ہو سکوں گا اور ویسے بھی میں پاناما کیس میں اپنے دلائل مکمل کر چکا ہوں اس لیے میری غیر موجودگی سے کیس بھی متاثر نہیں ہوگا۔

واضح رہے کہ پانامہ پیپرز میں وزیراعظم کے اہل خانہ کی آف شورز کمپنیوں کے انکشاف کے بعد سے اپوزیشن جماعتوں کے دباؤ اور احتجاجی تحریکوں کے بعد سپریم کورٹ میں پاناما کیس کی سماعت کا آغاز ہوا تھا جو تاحال جاری ہے۔

یاد رہے پاناما کیس کی سماعت جسٹس آصف سعید کھوسہ کی سربراہی میں 5 رکنی بینچ کر رہا ہے تاہم بینچ کے ایک رکن جسٹس عظمت سعید شیخ کی بیماری کے باعث گزشتہ ہفتے سے سماعت نہیں ہو سکی ہے۔

اسلام آباد: عوامی مسلم لیگ کے سربراہ شیخ رشید نے کہا ہے کہ پاناما کیس اللہ کا ازخود نوٹس ہے اب وزیراعظم کے پاس دو ہی راستے ہیں یا تو استعفیٰ دیں یا اسمبلی تحلیل کردیں۔

وہ قومی اسمبلی میں خطاب کر رہے تھے، انہوں نے اسپیکر کو مخاطب کرتے ہوئے کہا کہ آپ کہتے ہیں کہ عدالت میں جا کر بات کریں جب کہ وہ کہتے ہیں کہ عدالت میں استثنیٰ حاصل ہے اس لیے اسمبلی میں جا کر بات کریں کچھ کرلیں یہ معاملہ نہیں رکے گا۔

شیخ رشید نے کہا کہ قطری پہلے بھی ریسکیو ڈبل ون ڈبل ٹو بن کے آئے تھے اور اب دوبارہ آئے ہیں آخر وہ ہر بار شریف خاندان کو بچانے کیوں آتے ہیں؟ قطری اس بار اس لیے آیا ہے کہ سیف الرحمان کو پورٹ قاسم دی گئی ہے۔

انہوں نے کہا کہ قطری خط کے ڈرامے کے پیچھے چھپنا اتنا بھونڈا طریقہ ہے کہ میں اگر نواز شریف کے ہمراہ ہوتا تو قطری خط لکھوانے والے کو جوتے لگواتا لیکن وزیراعطم کو صرف خوشامدی لوگ ہی پسند ہیں جو ان کے نادان دوست ہونے کا کردار ادا کر رہے ہیں۔

شیخ رشید نے کہا کہ پرانےدوست کی حیثیت مشورہ دے رہا ہوں سپریم کورٹ کے فیصلے سے پہلے فیصلہ کرلیں کرپشن کے تابوت کے نکلنے کا وقت آگیا ہے ویسے بھی ن لیگ میں کافی اہل لوگ موجود ہیں کسی کو بھی وزیراعظم بنایا جا سکتا ہے۔

انہوں نے سوال کیا کہ کتنی افسوس ناک بات ہے کہ پاناما کیس مُردوں پر ڈال دیا گیا ہے، کیا اب قبروں کا ٹرائل چاہتے ہیں؟ میاں صاحب نے صرف ایک پوتے کو جائیداد کا وارث بنایا باقی شہباز شریف اور عباس شریف کے بھی بچے ہیں تو میاں صاحب نے اثاثے صرف حسین نواز ہی کو کیوں دیے؟

شیخ رشید نے وزیر اعظم کے خاندان کو ہدف تنقید بناتے ہوئے کہا کہ قوم کے بچوں کو ڈانٹتے اوراپنی اولادوں کو بانٹتے ہو آخر وہ زمین ہی کیوں سونا اگلنے لگتی ہے جو یہ خریدیں اور لاکھوں روپے مالیت کی گاڑی فروخت کرنے جائیں تو وہ کروڑوں میں کیوں بکتی ہے؟

اپنی تقریر کے دوران شیخ رشید نے دعویٰ کیا کہ وزیراعظم نواز شریف کو ڈیووس میں ہونے والے اجلاس میں کرپشن پر لیکچر دینے سے روک دیا گیا تھا اس لیے ایوان کو بتایا جائے کی ایسا کیوں کیا گیا اگر میرا دعویٰ غلط نکلا تو ایوان میں معافی مانگوں گا۔

انہوں نے بتایا کہ بی بی سی کی ایک اور اسٹوری سامنے آرہی ہے اور خود اسحاق ڈار نے ایک انٹرویو میں وزیراعظم کی مزید جائیداد کا اعتراف کیا، یہ مجسٹریٹ کے سامنے حلفیہ بیان دیتے ہیں اور پھر مکر جاتے ہیں اب اس اسٹوری میں کیے گئے منی لانڈرنگ کے اعتراف کی بھی عدالت میں جا کر نفی کر دیجیے گا۔