ARYNews.tv | Urdu – Har Lamha Bakhabar

Tag: پانامہ لیکس

  • اپوزیشن کا ٹی اوآرز ڈیڈ لاک کے حقائق قوم کے سامنے لانے کا اعلان

    اپوزیشن کا ٹی اوآرز ڈیڈ لاک کے حقائق قوم کے سامنے لانے کا اعلان

    اسلام آباد : پاناما لیکس کے حوالے سے ٹی او آرز پر حکومت اور اپوزیشن میں ڈیڈ لاک برقرار ہے ، اپوزیشن نے تمام حقائق قوم کے سامنے لانے کا اعلان کردیا۔

    تفصیلات کے مطابق ٹی او آرز پر اتفاق نہ ہونے اور حکومت کا اپوزیشن کے نقطہ نظر پر متفق نہ ہونے پر معاملہ بند گلی میں کیسے داخل ہوا اپوزیشن نے حقائق عوام کے سامنے لانے کا فیصلہ کرلیا۔

    قائد حزب اختلاف خورشید شاہ نے میڈیا سے گفتگو کرتے ہوئے کہا کہ پیر کے روز بیرسٹر اعتزاز احسن کی رہائش گاہ پر اپوزیشن کا اہم اجلاس ہے جس میں تمام دستاویزات کا بغور مطالعہ کرنے کے بعد آئندہ کے لائحہ عمل کا اعلان کیا جائے گا۔

    سینیٹر اعتزاز احسن نے کہا کہ ’’ جب وزیر اعظم میاں محمد نواز شریف ملزم نہیں تو انہیں کس بات کا ڈر ہے، حکومت ٹی او آرز پر پیش رفت سے کیوں گھبرا رہی ہے‘‘؟۔

    واضح رہے کہ سپریم کورٹ سے حکومتی ٹی او آرز مسترد ہونے کے بعد حکومت اور اپوزیشن کی جانب سے مشترکہ طور پر کمیٹی تشکیل دی گئی تھی جس میں حکومت اور اپوزیشن اراکین کو شامل کیا گیا تھا۔

    مزید پڑھیں : وزیر اعظم کے لیے بہتر ہے اپوزیشن کے ٹی او آرز تسلیم کرلیں، خورشید شاہ

     ٹی او آرز کمیٹی کو ایوان کی طرف سے 15 دن کا وقت دیا گیا تھا کہ ٹی او آر کو مشترکہ طور پر حتمی شکل دے کر ایوان میں پیش کرے تاہم مقررہ وقت گزرے بھی عرصہ گزر چکا ہے۔

    تحریک انصاف کے سینئرلیڈر شاہ محمود قریشی نے ناراضی کا اظہار کیا ہے جبکہ چیئرمین پیپلزپارٹی بلاول بھٹو نے اپنی جماعت کے اراکین کو ٹی او آرز کے حوالے سے حکومت کو کسی بھی قسم کی رعایت دینے سے گریز کرنے کی ہدایت جاری کی ہیں۔

  • پانامہ لیکس : قوم کرپشن کے بت کو پاش پاش کردے گی، سراج الحق

    پانامہ لیکس : قوم کرپشن کے بت کو پاش پاش کردے گی، سراج الحق

    لاہور : امیرجماعت اسلامی سینیٹر سراج الحق نے کہا ہے کہ کچھ لوگ نہیں چاہتے کہ پانامہ لیکس پر ٹی او آرز بنیں، قوم کرپشن کے بت کو پاش پاش کردے گی ۔

    ان خیالات کا اظہار انہوں نے منصورہ لاہور میں افطار ڈنر کے موقع پر خطاب کرتے ہوئے کیا، سراج الحق نے کہا کہ کچھ لوگوں کی خواہش ہے کہ پانامہ لیکس اور کرپشن کا معاملہ کسی منطقی انجام تک پہچے بغیر ان کے کے شوروغل میں دب جائے مگر ایسا نہیں ہوگا۔

    انہوں نے کہا کہ ملک میں احتساب کا مطالبہ پارٹیوں کا نہیں ،قوم کا ہے، لیکن اب تک کے حکومتی رویہ سے ظاہر ہوتا ہے کہ حکومت احتساب سے کترا رہی ہے، اگر حکومت نے اپنا رویہ نہ بدلا تو عوام کے اندر ایک پکنے والا لاوا پھٹ پڑے گا۔

    انہوں نے کہا کہ تمام سیاسی جماعتوں کو بھی اپنے اندر احتساب کی روایت کو زندہ کرنا چاہئے اور کالی بھیڑوں کو اپنے اندر چھپنے کا موقع نہیں دینا چاہئے ،اگر سیاسی جماعتیں تہیہ کرلیں کہ وہ کسی بدیانت اور کرپٹ کو اپنا نمائندہ نہیں بنائیں گی تو آئندہ انتخابات میں کسی لٹیرے کو عوام کی تقدیر سے کھیلنے کا موقع نہیں مل سکے گا۔

    سراج الحق کا کہنا تھا کہ بھارت امریکہ تعلقات کے باعث خطے میں طاقت کا توازن بگڑ جائے گا، پاکستان اور بھارت دونوں ایٹمی طاقتیں ہیں ،یہ نہیں ہوسکتا کہ ایک کو تھانیدار اور دوسرے کو غلام بنا کررکھا جائے۔

    امریکہ نے رویہ نہ بدلا تو خطہ جنگ کی طرف چل پڑے گا، اوباما کی طرف سے افغانستان میں امریکی افواج کی تعداد میں اضافہ کی منظوری خطے میں مستقل اور پائیدار امن کے لیے خطرناک ہو گی۔ جبکہ افغانستان میں دیر پا امن کےلیے وہاں سے نیٹو اور امریکی افواج کا انخلا نہایت ضروری ہے۔

    سراج الحق کا کہنا تھا کہ ڈراون حملے پاکستان کی سالمیت کے خلاف ہیں اور اس پر اب حکومت کو اپنی کچن کیبنٹ کے بجائے قومی اتفاق رائے پر مبنی پالیسی بنانی چاہئیے۔

     

  • پاناما لیکس : پارلیمانی کمیٹی کا اجلاس پھر بے نتیجہ ختم، ڈیڈ لاک برقرار

    پاناما لیکس : پارلیمانی کمیٹی کا اجلاس پھر بے نتیجہ ختم، ڈیڈ لاک برقرار

    اسلام آباد : پانامہ لیکس کی تحقیقات کیلئے قائم کمیشن کے ٹی آر اوز کا تعین تاحال نہ کیا جا سکا، اس حوالے سے حکومت اوراپوزیشن کا ایک اور اجلاس بے نتیجہ رہا۔

    تفصیلات کے مطابق پاناما لیکس کے معاملے پر حکومت اور اپوزیشن کی جانب سے ٹرمز آف ریفرنس تیار کرنے کے لئے پارلیمانی کمیٹی کے چھٹے اجلاس میں آج پھر ڈیڈ لاک برقرار رہا۔ اور اجلاس کے اراکین کسی نتیجے پر پہنچے بغیر ہی چلے گئے۔

    اب کمیٹی کا اگلا اجلاس جمعہ کے دن ساڑھے 11 بجے طلب کیا گیا ہے۔ اجلاس کے بعد پارلیمنٹ ہاؤس کے باہر میڈیا سے بات کرتے ہوئے سینیٹ میں قائد حزب اختلاف چوہدری اعتزاز احسن نے کہا کہ لگتا ہے حکومت کو ہماری ترامیم قبول نہیں ۔

    حکومت نے مشاورت کے لیے جمعہ تک وقت مانگا ہے۔ ہم نے حکومت کے 4 میں سے 3 ٹی او آرز تسلیم کرلیے ہیں اور ایک حکومتی ٹی او آر میں چھوٹی سی ترمیم کی ہے، ہم اس معاملے پر آگے بڑھانا چاہتے ہیں مگر صورتحال جوں کی توں ہے۔

    پاکستان تحریک انصاف کے مر کزی رہنما شاہ محمود قریشی نے کہا کہ اجلا س میں فنانس بل میں آرٹیکل بیس متعارف کرانا حکومت کی بدنیتی ظاہر کرتا ہے۔آرٹیکل بیس آف شور کمپنیاں قائم کرنے اورسرمایہ کاری کرنے کوجائز قرار دیتا ہے۔

    دوسری جانب حکومتی رکن اور وفاقی وزیر ریلوے خواجہ سعد رفیق نے کہا کہ اپوزیشن نے جو مسودہ پیش کیا وہ ایک شخص کے گرد گھومتا ہے۔

    انہوں نے کہا کہ ہماری تجاویز کے جواب میں جو ڈرافٹ دیا گیا اس پر افسوس سے کہنا پڑتا ہے کہ وہ اپوزیشن کے پہلے والے 15 سوال سے بھی آگے ہے جو پوری طرح افراد کے درمیان گھوم رہا ہے۔

    انہوں نے کہا کہ ہمیں نہیں لگتا کہ ارادہ بے لاگ احتساب کا ہے اگر بے لاگ احتساب کرنا ہے تو قانون اور ٹی او آرز ایسے بنائیں جو سب کا احاطہ کریں۔

    اس موقع پر وفاقی وزیر خزانہ اسحاق ڈار کا کہنا تھا کہ پارلیمانی کمیٹی کی مدت پندرہ دن نہیں تھی۔ پندرہ اجلاسوں کے بعد ٹائم ختم ہوگا۔

     

  • پانامہ لیکس سےمتعلق ٹھوس ثبوت ملنے پر نیب کارروائی کرے گا،چئیرمین نیب

    پانامہ لیکس سےمتعلق ٹھوس ثبوت ملنے پر نیب کارروائی کرے گا،چئیرمین نیب

    اسلام آباد: ایک سیمینارسےخطاب کرتے ہوئےچیئرمین نیب قمر زمان چوہدری نے کہا ہے کہ پانامہ لیکس پر واضع اور ٹھوس ثبوت آنے کے بعد بھرپور کارروائی کریں گے۔

    تفصیلات کے مطابق اسلام آباد میں ایک سیمینار سے خطاب کرتے ہوئے نیب کے چئیرمین قمر الزماں چوہدری نے کہا کہ سیاست دانوں کےعلاوہ دیگرافرادکیخلاف بھی تحقیقات کریں گے،پانامہ لیکس سمیت دیگر معاملات میں حکومتی طریقہ کارواضع ہونے کےمنتظرہیں۔

    نیب کے چئیرمین نے اپنے خطاب کے دوران بتایا کہ کہ "ڈی ایچ اے کیس” اور "ڈاکٹر عاصم حسین کیس” کے حوالے سے نیب پر کافی دباؤ ہے،تاہم نیب کسی قسم کے دباؤ کا شکار نہیں ہو گی اورکرپشن کو آہنی باتھوں سے روکےگی۔

    نیب چیئرمین قمر زماں نے اس عزم کا اظہار کیا کہ ’’چین پاکستان اقتصادی راہدری‘‘کےمعاملےمیں کرپشن برداشت نہیں کی جائیگی،شفافیت کو مدنظر رکھا جائے گا،اس سلسلے میں ہمیں چین کا تعاون بھی حاصل ہے۔

    قمرزمان چوہدری نےسیکریٹری خزانہ بلوچستان کیس میں پیش رفت سے آگاہ کرتےہوئے بتایا کہ مشتاق رئیسانی بڑا کیس ہے،جس کی تحقیقات جاری ہیں جس کے تحت ملزمان کی کوئٹہ،کراچی اوراسلام آباد میں جائیداد کا سراغ لگا کرنیب نے ملزمان کے بینک اکاؤنٹس منجمد کردیے ہیں،جب کہ جائیداد سے متعلق کاغذات اورگاڑیاں اپمی تحویل میں لے لی ہیں۔

  • وزیر اعظم کا ویڈیو لنک کے ذریعے خطاب غیر قانونی نہیں، یوسف رضا گیلانی

    وزیر اعظم کا ویڈیو لنک کے ذریعے خطاب غیر قانونی نہیں، یوسف رضا گیلانی

    ملتان : سابق وزیراعظم یوسف رضا گیلانی نے کہا ہے کہ وزیراعظم پاکستان کا بجٹ اجلاس میں ویڈیو لنک کے ذریعے خطاب غیرقانونی نہیں ہے، کیونکہ ملکی تاریخ میں پہلی بار کوئی موجودہ وزیراعظم اسپتال داخل ہے۔

    تفصیلات کے مطابق سابق وزیراعظم یوسف رضا گیلانی نے پریس کانفرنس کرتے ہوئے کہا کہ ملک کا سب سے بڑا مسئلہ دہشت گردی ہے، اس پر قابو پانے کے لیے دہشت گردوں کے خلاف بلا تفریق کارروائی کرنی ہوگی۔

    اس موقع پر یوسف رضا گیلانی نے مزید کہا کہ علی حیدر گیلانی کو اغواء کرنے کے بعد دہشت گردوں نے مجھے پیغام بھیجا کہ یہ انہوں نے سوات آپریشن کا بدلہ لیا ہے۔

    علی حیدر گیلانی کی کتاب کے حوالے سے تبصرہ کرتے ہوئے سابق وزیراعظم نے کہا کہ ’’یہ فیصلہ علی حیدر کو کرنا ہے کہ دورانِ اغوا پیش آنے والے واقعات کی کہانی کتابی صورت میں محفوظ کریں گے یا اُس کو اسکرپٹ کی صورت میں بالی ووڈ ہدایتکاروں کو ارسال کریں گے‘‘۔

    ایک سوال کے جواب میں سابق وزیر اعظم نے کہا کہ ’’ڈرون حملے ملکی سالمیت کے خلاف ہیں، اس حوالے سے آرمی چیف اور حکومت کا امریکہ سے احتجاج بالکل جائز ہے‘‘۔

    پانامہ لیکس کے حوالے سے پوچھے گئے سوال کے جواب میں یوسف رضا گیلانی کا کہنا تھا کہ حکومت اور اپوزیشن کے درمیان مذاکرات ہر صورت کامیاب ہونے چاہئیں ورنہ یہ معاملہ بند گلی میں داخل ہوجائے گا۔

    مزید پڑھیں : بلاول بھٹو بالکل اپنی ماں جیسے لگتے ہیں، ہیلری کلنٹن

    دوسری جانب انہوں نے بتایا کہ بلاول بھٹو زرداری کو دیکھ کر سابق امریکی خاتون اول ہلیری کلنٹن نے آج میرے موبائل پر پیغام بھیجا ہے کہ ’’ انہیں بلاول بھٹو زرداری میں محترمہ بے نظیر بھٹو کی جھلک دکھائی دی دیتی ہے، ساتھ ہی انہوں نے اس امید کا اظہار کیا کہ بلاول بھٹو سیاسی میدان میں اپنی والدہ کے نامکمل اہداف کو آسانی سے حاصل کرلیں گے‘‘۔

     

  • پانامہ لیکس کی پارلیمانی کمیٹی کا اجلاس، اراکین میں ڈیڈ لاک برقرار

    پانامہ لیکس کی پارلیمانی کمیٹی کا اجلاس، اراکین میں ڈیڈ لاک برقرار

    اسلام آباد : پانامہ لیکس پر بننے والی ٹی اوآرز پارلیمانی کمیٹی میں ڈیڈ لاک دور نہ ہو سکا۔ کمیٹی کا اجلاس بغیر کارروائی کے ہفتے کی شام 4 بجے تک ملتوی کر دیا گیا۔

    تفصیلات کے مطابق پارلیمنٹ ہاؤس اسلام آباد میں پاناما لیکس کی تحقیقات کے لیے ٹی او آر بنانے والی کمیٹی کا اجلاس ہوا۔

    اجلاس میں حکومت کی جانب سے اسحاق ڈار، زاہد حامد، خواجہ سعد رفیق، میرحاصل بزنجو،اکرم خان درانی اور انوشہ رحمان موجود تھے ۔

    اپوزیشن کی جانب سے اعتزازاحسن، شاہ محمود قریشی، صاحبزادہ طارق اللہ، طارق بشیرچیمہ اور بیرسٹر محمد علی سیف نے شرکت کی۔

    اجلاس میں ٹی او آر پر موجود ڈیڈ لاک کے خاتمے کے لیے حکومتی اور اپوزیشن ارکان کے درمیان تجاویز پر غور کیا گیا تاہم کوئی بھی فریق اپنے موقف میں نرمی لانے پر رضامند نہیں ہوا جس کے باعث اجلاس کسی قسم کی پیش رفت کے بغیر ہی ختم ہوگیا۔

    اپوزیشن اراکین کا کہنا تھا کہ ڈیڈ لاک کے خاتمے کے لیے حکومت کو اپنی حکمت عملی تبدیل کرنا ہو گی۔ ٹی او آرز کمیٹی کے اجلاس میں اپوزیشن نے بعض وفاقی وزراء کے سیاسی قائدین کے خلاف بیانات پر احتجاج کیا اور مؤقف اختیار کیا کہ اس طرح کے بیانات کمیٹی کا ماحول خراب کر رہے ہیں۔

    اجلاس میں وزیراعظم کا نام ٹی او آرز سے نکالنے سے متعلق اتفاق رائے نہ ہوسکا۔ اجلاس کے بعد میڈیا سے گفتگو کرتے ہوئے چوہدری اعتزاز احسن نے کہا کہ اپوزیشن کی نو جماعتیں 15 ٹی او آرز پر متفق ہیں کہ پانامہ لیکس پر تحقیقات کا آغاز وزیراعظم کے نام سے کیا جائے۔ لیکن حکومت شریف خاندان کو بچانا چاہتی ہے اور یہ سمجھتی ہے کہ اگر اپوزیشن کے ٹی او آر کو تسلیم کرلیا گیا تو سب کچھ صاف ہوجائے گا۔

    ان کا کہنا تھا کہ آج محسوس ہوا کہ حکومت مفلوج ہو چکی ہے۔ آج وہ کام بھی نہیں ہوا جو پہلے ہوجانا چاہیے تھا۔ انہوں نے کہا کہ حکومتی رویے سے شدید مایوسی ہوئی۔

    شاہ محمود قریشی نے کہا کہ حکومت کو یاد رکھنا ہو گا کہ ملک کا ایک بڑا طبقہ انتظار میں ہے کہ اونٹ کس کروٹ بیٹھتا ہے۔ حکومت بتائے کہ وہ معاملات سنوارنا چاہتی ہے یا بگاڑنا، ڈیڈ لاک کے خاتمے کے لیے حکومتی رویہ مثبت نہیں ہے۔

    صاحبزادہ طارق اللہ نے کہا کہ ہم چیونٹی کی رفتار سے آگے بڑھ رہے ہیں۔ انہوں نے کہا کہ حکومت کی جانب سے تاخیری حربے استعمال کیے جارہے ہیں۔ کمیٹی کا اگلا اجلاس 4 جون شام 4 بجے پارلیمنٹ میں ہو گا۔

     

  • کرپشن کے خلاف جماعت اسلامی کا ٹرین مارچ آج سے شروع ہوگا

    کرپشن کے خلاف جماعت اسلامی کا ٹرین مارچ آج سے شروع ہوگا

    پشاور: پامانہ لیکس کے معاملے پر جماعت اسلامی کی جانب سے ملک میں کرپشن کے خاتمے کے لیے ’’ پاکستان فری ٹرین مارچ آج 25 مئی سے شروع کیا جارہا ہے۔

    تفصیلات کے مطابق اس مارچ کی قیادت امیر جماعت اسلامی سراج الحق کریں گے، اس کا آغاز عوامی ایکسپریس ٹرین کے ذریعے پشاور سے کیا جائے گا۔

    پہلے مرحلے میں کرہپشن فری مارچ  کا قافلہ پشاور سے دوپہر ایک بجے راولپنڈی پہنچے گا جہاں سے جماعت اسلامی کے کارکنان کی بڑی تعداد اس قافلے میں شامل ہونگے۔

    پشاور سے شروع ہونے والا کرپشن فری پاکستان ٹرین مارچ  کا قافلہ 27 مئی کو کراچی پہنچ کر اختتام پذیر ہوگا۔

    واضح رہے پانامہ لیکس میں وزیر اعظم پاکستان کے صاحبزادوں کے آف شور کمپنیوں اور اثاثوں سے متعلق اپوزیشن اور حکومت نے ٹی او آرز کی حتمی تشکیل کے لیے کمیٹی قائم کی ہے۔جو کرپشن کی روک تھام اور پانامہ کے حوالے سے لگنے والے الزامات کی حتمی رپورٹ ایوان میں جمع کروائے گی۔

     

  • مولانا فضل الرحمان اور سابق صدر آصف علی زرداری سے لندن میں ملاقات

    مولانا فضل الرحمان اور سابق صدر آصف علی زرداری سے لندن میں ملاقات

    لندن: مولانا فضل الرحمان کی سابق صدر پاکستان آصف علی زرداری سے ملاقات ہوئی جس میں مفاہمتی پالیسی اور جمہوریت کو ڈی ریل ہونے سے بچانے پر اتفاق کیا گیا۔

    تفصیلات کے مطابق جمعیت علماء اسلام (ف) کےسربراہ مولانا فضل الرحمان اور سابق صدر پاکستان آصف علی زرداری کی ملاقات لندن میں سابق صدر کی رہائش گاہ پر ناشتے کے وقت کی گئی۔

    دونوں رہنماؤں نے ملاقات میں پانامہ لیکس کے بعد پیدا ہونے والی ملکی صورتحال پر تفصیلی تبادلہ خیال کیا اور کرپشن کے نام پر پیدا ہونے والی صورتحال حال پر مشاورت کر کے مفاہمتی پالیسی کو آگے بڑھانے پر اتفاق کیا گیا۔

    اس موقع پر فضل الرحمان نے موقف اختیار کیا کہ دونوں جماعتوں کے رہنماء ملاقات اور بات چیت کے ذریعے معاملات کو حل کرتے ہوئے ملک کو موجودہ بحران سے نکال سکتے ہیں۔

    سابق صدر آصف علی زرداری نے سربراہ جمعیت علماءاسلام کو یقین دہانی کروائی ہے کہ کرپشن کے نام پر جمہوریت کو ڈی ریل ہونے کی سازش کو ہر صورت ناکام بنا دیں گے۔

    مزید پڑھیں : وزیرِ اعظم میاں نوازشریف ایک بار پھر طبی معائنے کے لیے لندن روانہ

    اس ملاقات کے حوالے سے پیپلزپارٹی کے رہنماء قمر زمان قائرہ نے اے آر وائی سے خصوصی گفتگو کرتے ہوئے کہا ہے کہ ’’ پیپلزپارٹی نے پانامہ لیکس کے حوالے سے واضح موقف اختیار کیا ہوا ہے اگر آصف علی زرداری صاحب اور میاں نوازشریف کی ملاقات ہوئی تو اس سے پیپلزپارٹی کی ساخت بہت بری حد تک متاثر ہوگی۔

    واضح رہے وزیر اعظم پاکستان میاں محمد نوازشریف بھی طبی معائنے کے لیے لندن میں موجود ہیں۔

  • پرویز مشرف نے اپنے دور میں ڈرون حملوں کی اجازت دی، یوسف گیلانی

    پرویز مشرف نے اپنے دور میں ڈرون حملوں کی اجازت دی، یوسف گیلانی

    ملتان : سابق وزیراعظم یوسف رضا گیلانی نے کہا ہے کہ سابق صدر پرویز مشرف نے اپنے دور حکومت میں امریکہ کو ڈرون حملوں کی اجازت دے رکھی تھی اور ہوسکتا ہے کہ امریکہ نے اس ڈرون حملے سے قبل پاکستان حکومت کو آگا کیا ہو۔

    انہوں نے کہا کہ پانامہ لیکس کے ٹی او آرزپر بات کرنے کیلئے اسپیکر صاحب کل آئے تھے، ان سے کہا ہے کہ میرے لئے بھی ٹی او آرز بنائے جائیں کیونکہ مجھ پر بھی بہت الزام لگائے گئے ہیں۔

    یہ بات انہوں نے ملتان میں ایک پریس کانفرنس سے خطاب کرتے ہوئےکہی ۔ سابق وزیر اعطم یوسف رضا گیلانی کا کہنا تھا آئندہ بجٹ میں سرکاری ملازمین کی تنخواہوں میں اضافہ اور ٹیکس کم ہونے چاہئیں۔

    انہوں نے کہا کہ بجٹ میں غریب عوام کو ریلیف دیا جائے، جب ملک میں امن ہو گا تو سرمایہ کاری بھی آئے گی۔ انہوں نے کہا کہ افغانستان پاکستان کا ہمسایہ ملک ہے اور ہم دونوں نے ساری زندگی اکھٹے رہنا ہے۔

    انہوں نے کہا کہ افغانستان میں حالات کا ردعمل پاکستان میں ہوتا ہے، افغانستان میں قیام امن کیلئے طالبان کے ساتھ مذاکرات کا عمل جاری رہنا چاہیئے۔اگر وہاں امن ہوگا تو پاکستان میں بھی امن ہوگا۔

    ایک سوال کے جواب میں ان کا کہنا تھا کہ لاہور میں اتنی لوڈشیڈنگ پہلے کبھی نہیں دیکھی۔ ہم نے اپنی حکومت میں کئی میگاواٹ بجلی کا اضافہ کیا، مسلم لیگ ن لوڈشیڈنگ کے خاتمے کا کہہ کر اقتدار میں آئی تھی اور دعویٰ کیا تھا کہ 90 روز میں بجلی کا بحران ختم کر دیں گے۔

     

  • پیپلز پارٹی وزیرِاعظم کے خلاف نااہلی کا ریفرنس دائر کرے گی،لطیف کھوسہ

    پیپلز پارٹی وزیرِاعظم کے خلاف نااہلی کا ریفرنس دائر کرے گی،لطیف کھوسہ

    اسلام آباد: پاکستان پیپلز پارٹی کے رہنما لطیف کھوسہ نے کہا کہ پانامہ کے ذریعے وزیرِاعظم اور ان کے اہل خانہ کا جھوٹ سامنے آگیا ہے،جس پر پیپلز پارٹی وزیر اعظم کے خلاف نااہلی کا ریفرنس دائر کرے گی۔

    میڈیا سے بات کرتے ہوئے پیپلز پارٹی کے رہنما لطیف کھوسہ نے وزیر اعظم پاکستان محمد نواز شریف کے خلاف نا اہلی کا ریفرنس دائر کرنے کا عندیہ دے دیا،ان کا کہنا تھا کہ پانامہ لیک سے وزیر اعظم کا جھوٹ سامنے آیا ہے جس کے بعد وزیر اعظم آرٹیکل 62 اور 63 پر پورا نہیں اترتے۔

    تفصیلات کے مطابق سابق گورنر پنجاب لطیف کھوسہ نے بتایا کہ وزیر اعظم اور اُن کے اہلِ خانہ کی جانب سے اثاثہ جات چھپانے سے متعلق شواہد آنے کے بعد پیپلز پارٹی وزیرِ اعظم پاکستان نواز شریف سمیت اُن کے اہلِ خانہ بہ شمول بھائی شہباز شریف،سمدہی اسحاق ڈار، داماد کیپٹن صفدر،اور بھتیجے حمزہ شہباز کے خلاف نا اہلی کے ریفرنس تیار کر رہی ہے جو تکمیل کے آخری مرحلے میں ہے۔

    انہوں نے عندیہ دیا کہ چند ایک روز میں وزیر اعظم اور ان کے اہل خانہ کے خلاف نا اہلی کے ریفرنس الیکشن کمیشن میں جمع کرادیں گے،جس میں آرٹیکل 62 اور 63 کے تحت وزیرِاعظم پاکستان سمیت اراکین قومی اسمبلی اسحاق ڈاراور کیپٹن صفدر جب کہ پنجاب اسمبلی کے وزیراعلی شہباز شریف اور ان کے صاحبزادے حمزہ شہباز کو نا اہل قراد دینے کی درخواست کریں گے۔

    دوسری جانب الیکشن کمیشن نے آج وزیر اعظم اور اُن کے رشتہ دار ارکانِ اسمبلی کے اثاثہ جات کی تفصیلات پیپلز پارٹی کو دینے کی منظوری دے دی ہے،پیپلز پارٹی کے رنماؤں لطیف کھوسہ اور نئیر بخاری نے وزیر اعظم پاکستان سمیت شہباز شریف، اسحاق ڈار،حمزہ شہباز اور کیپٹن صفدر کے 1990 سے 2013 تک جمع کرائے گئے کاغزات نامزدگی میں درج اثاثہ جات اور سالانہ گوشواروں کی تفصیلات مانگی تھیں۔

    واضع رہے الیکشن کمیشن پہلے ہی وزیر اعظم کے داماد اور رکنَ اسمبلی کیپٹن صفدر کو ان کے اثاثہ جات کے حوالے متضاد اعداد و شمار پر تفصیلات مانگنے کے لیے طلب کر چکی ہے۔