لاہور: گزشتہ روز لاہور کے علاقے برکی کے پھلروان گاؤں میں دن دہاڑے قتل ہونے والے پانچ افراد کی نمازِ جنازہ پر مخالف گروپ نے فائرنگ کر دی، فائرنگ سے جنازہ گاہ میں بھگدڑ مچ گئی۔
تفصیلات کے مطابق برکی میں قتل ہونے والے پانچ افراد کی نمازِ جنازہ پر مخالفین نے فائرنگ کر دی، پولیس نے جنازے پر فائرنگ کی تردید کر دی ہے، ڈی آئی جی آپریشنز کا کہنا ہے کہ فائرنگ متاثرہ خاندان کی جانب سے مخالفین کے گھروں کے سامنے ہوئی۔
ڈی آئی جی آپریشنز نے کہا ’فائرنگ کرنے والے ملزمان کو گرفتار کیا جائے گا، تمام مقتولین کی نمازِ جنازہ ادا ہوچکی ہے، جنازے پر فائرنگ نہیں ہوئی۔‘
دریں اثنا قتل میں ملوث ملزمان کےنام ای سی ایل میں ڈالے جانے کا مراسلہ جاری کر دیا گیا، ڈی آئی جی انویسٹی گیشن نےڈی جی امیگریشن کو سفارش بھجوا دی۔
پولیس حکام نے لاہور کے نواحی گاؤں میں دو بھائیوں سمیت پانچ افراد کے قتل کے مقدمے میں نامزد ملزمان کے بیرون ملک فرار ہونے کا خدشہ ظاہر کر دیا ہے، ڈی جی امیگریشن کو بھجوائے گئے مراسلے کی کاپی اے آر وائی نیوز نے حاصل کرلی۔ مقدمے میں افتخار، جبار، ہیرا، ذوالفقار، جہانگیر، وقار، قدیر، لیاقت علی اور رحمت علی نامی ملزمان نامزد ہیں۔
لاہور: زمین کے تنازع پرایک ہی خاندان کے5 افراد قتل
واضح رہے کہ گزشتہ روز برکی میں چارہ خریدنے کے لیے ٹریکٹر ٹرالی پر جانے والے ایک ہی خاندان کے پانچ افراد کو دن دہاڑے مخالف گروپ نے فائرنگ کرکے قتل کر دیا تھا۔ قتل ہونے والوں میں دو سگے بھائی بھی شامل تھے۔
پولیس کے مطابق برکی کے گاؤں پھلروان میں کھوٹے والا اور لاٹھیا گروپ میں پچھلے دس سال سے زمین کے تنازعے پر دشمنی چلی آرہی ہے۔ پہلے بھی ایک جھگڑے میں دونوں گروہوں سے دو دو افراد قتل ہوچکے ہیں۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
