اسلام آباد (23 اگست 2025): پاکستان میں آبی مسائل کا حل بہتر حکمت عملی میں پوشیدہ ہے، مون سون سیزن 2025 کے دوران پانی کا ضیاع تشویشناک حد تک بڑھ چکا ہے۔
تفصیلات کے مطابق حالیہ مون سون سیزن میں ملک کے مختلف علاقوں میں شدید بارشیں ہوئیں جس سے دریا اور ندی نالے بھر گئے ہیں۔
محکمہ آبپاشی نے کہا ہے کہ یکم جولائی سے 20 اگست تک کوٹری کے مقام سے بحیرہ عرب میں 9.04 ملین ایکڑ فٹ ( ایم اے ایف) پانی خارج ہو چکا ہے، مزید 4 سے 5 ملین ایکڑ فٹ پانی کے اخراج کا امکان ہے کیونکہ سوات، کشمیر اور دیگر پہاڑی علاقوں سے ندیوں میں پانی کا بہاؤ بدستور جاری ہے۔
ملک کے اہم آبی ذخائر جس میں تربیلا، راول، خانپور اور سملی ڈیم شامل ہیں اپنی مکمل گنجائش تک پہنچ چکے ہیں، منگلا ڈیم 75 فیصد بھرا ہوا ہے، اس صورتحال میں اضافی پانی کو محفوظ کرنے کے لیے کوئی متبادل انتظام موجود نہیں جس کی وجہ سے اضافی پانی ضائع ہو رہا ہے۔
کوٹری بیراج سے آبی ذخائر سے متعلق جاری تازہ ترین رپورٹ کے مطابق یکم تا 10 جولائی کے دوران 0.60 ایم اے ایف، 11 تا 20 جولائی 1.11 ایم اے ایف، 21 تا 31 جولائی 2.60 ایم اے ایف، یکم جولائی تا 10 اگست 3.12 اور 11تا 20 اگست کے دوران 1.61 ملین ایکڑ پانی خارج ہوا۔
یہ اعداد و شمار اس بات کا ثبوت ہے کہ پاکستان میں آبی وسائل کے مؤثر انتظام اور اضافی پانی کو محفوظ کرنے کی صلاحیت تاحال ناکافی ہے۔
آبی ماہرین نے کہا ہے کہ پانی کو ضائع ہونے سے بچانے کے لیے فوری اقدامات نہ کیے گئے تو ملک کو شدید آبی بحران کا سامنا کرنا پڑ سکتا ہے اگر بروقت نئے ڈیمز کی تعمیر اور موجودہ نظام کی بہتری پر کام نہ کیا گیا تو آبی مسائل میں اضافہ ہوگا۔
