ARYNews.tv | Urdu – Har Lamha Bakhabar

Tag: پانی کا ٹینک

  • پانی کے ٹینک میں گر کر دو معصوم بچوں کی جان چلی گئی

    پانی کے ٹینک میں گر کر دو معصوم بچوں کی جان چلی گئی

    بھارتی ریاست تلنگانہ کے ورنگل شہر کے بالاجی نگر میں ایک افسوسناک واقعہ پیش آیا، جب پانی کے ٹینک کے گر کر دو معصوم بچے زندگی کی بازی ہار گئے۔

    بین الاقوامی خبر رساں ادارے کی رپورٹ کے مطابق پانی کے ٹینک میں گرنے سے دو بچے زندگی کی بازی ہار گئے، گزشتہ رات پیش آنے والے اس واقعہ کے بعد علاقے میں غم کی لہر دوڑ گئی۔

    بھارتی میڈیا کے مطابق بچوں کے والدین نے بچوں کو اپنے والدین کے گھر چھوڑ دیا تھا اور خود کہیں چلے گئے تھے۔

    بچے کھیلتے کھیلتے پانی کے ٹینک کے پاس پہنچ گئے، جس کا ڈھکن موجود نہ تھا اور ٹینک کا ڈھکن کھلا رہنے کی وجہ سے اتفاقی طور پر اس میں گر کر جان کی بازی ہا رگئے۔

    دوسری جانب بھارت میں سفاک شوہر بیوی کو قتل کرنے کے بعد اس کا کٹا ہوا سر لے کر تھانے پہنچ گیا۔

    بھارتی میڈیا رپورٹس کے مطابق افسوسناک واقعہ اترپردیش کے ضلع بارہ بنکی میں پیش آیا جہاں مبینہ طور پر شوہر نے بیوی کا سر قلم کردیا اور اس کے کٹے ہوئے سر کو لے کر تھانے پہنچ گیا۔

    ملزم کی شناخت انیل کنوجیا کے نام سے ہوئی ہے جسے پولیس نے گرفتار کرکے واقعے کا مقدمہ درج کرلیا ہے۔

    سوشل میڈیا پر ویڈیو سامنے آئی جس میں ملزم کو بیوی کا خون میں لت پت سر لے کر تھانے جاتے دیکھا جاسکتا ہے جبکہ قریب موجود لوگ حیرانی سے اسے دیکھ رہے ہیں۔

  • پانی کے ٹینک کے قریب کھیلتی بچی کے ساتھ خوفناک حادثہ، کمزور دل والے ویڈیو نہ یکھیں

    پانی کے ٹینک کے قریب کھیلتی بچی کے ساتھ خوفناک حادثہ، کمزور دل والے ویڈیو نہ یکھیں

    کرناٹک: بھارتی شہر بنگلور میں ایک جگہ پانی کا ٹینک بھرے جانے میں غفلت کے باعث ایک بچی ٹینک میں گر گئی، اس واقعے کی دل دہلا دینے والی ویڈیو منظر عام پر آ گئی ہے۔

    اکثر ایسا ہوتا ہے کہ بڑوں کی غفلت کا خمیازہ بچوں کو بھگتنا پڑ جاتا ہے، ایسا ہی ایک واقعہ کرناٹک کے شہر بنگلور میں پیش آیا، اس واقعے کی ویڈیو بھی سامنے آئی ہے جس میں بچی کو ٹینک کے کھلے دہانے میں گرتے دیکھا جا سکتا ہے۔

    ویڈیو کے مطابق ایک عمارت کے زیر زمین ٹینک میں ٹینکر سے پائپ کے ذریعے پانی بھرا جا رہا ہے، ٹینک کا دہانہ کھلا ہوا تھا اور آس پاس کوئی نہیں تھا، ایسے میں وہاں کھڑی ایک بچی ٹینک کے کھلے ڈھکن کے پاس آئی اور اس میں نیچے گر کر غائب ہو گئی۔

    یہ واقعہ سی سی ٹی وی کیمرے میں قید ہو گیا، فوٹیج میں دیکھا جا سکتا ہے کہ کچھ دیر تک کسی کو کچھ پتا نہیں چلتا، پھر تقریباً 42 سیکنڈ کے بعد ٹینک بھرنے والا شخص اندر سے آ کر وہاں کھڑا ہوتا ہے، اور تب اس کو ٹینک میں سے آوازیں سنائی دیتی ہیں۔

    بچی کی آوازیں سن کر مذکورہ شخص کی گھبراہٹ کو بھی دیکھا جا سکتا ہے، وہ جلدی سے جوتے اتار کر ٹینک میں اترتا ہے، اس دوران عمارت کے اندر سے ایک خاتون بھی باہر آتی ہیں اور جیسے ہی ان کو بچی کا پتا چلتا وہ بھی گھبرا کر ٹینک کے پاس چلی جاتی ہیں۔

    تاہم، خوش قسمتی سے بچی ایک منٹ اور 10 سیکنڈز تک ٹینک میں رہنے کے بعد بھی زندہ رہی، ٹینک بھرنے والے شخص نے اسے بہ حفاظت نکال کر خاتون کے حوالے کیا، فوٹیج میں خاتون کو بچی کے چہرے پر پانی کے چھینٹے بھی مارتے دیکھا جا سکتا ہے۔