Tag: پانی کی بندش

کراچی:  پانی اور بجلی کی عدم فراہمی سے تنگ شہریوں نے بلدیہ حب ریور روڈ اور لانڈھی میں احتجاجی مظاہرے کیے ۔

تفصیلات کے مطابق کراچی کے علاقے بلدیہ ٹاؤن کے مکینوں نے بجلی اور پانی کی بندش کے خلاف حب ریور روڈ پر احتجاجی مظاہرہ کرتے ہوئے سڑک بند کردی، جس کے باعث اطراف کی شاہرواں پر بدترین ٹریفک جام ہوگیا۔

مظاہرین نے مطالبہ کیا کہ بلدیہ ٹاؤن میں پانی اور بجلی کی فراہمی کو یقینی بنایا جائے۔ پولیس حکام نے مظاہرین کو سڑک کھولنے کا حکم دیا مگر مکینوں کی جانب سے انکار کردیا گیا، جس کے بعد پولیس نے مظاہرین کو منتشر کرنے کے لیے لاٹھی چارج  اور ہوائی فائرنگ کیْ جس سے دو مظاہرین زخمی ہوگئے، زخمی افراد کو طبی امداد کے لیے قریبی اسپتال منتقل کردیا گیا ہے۔ تاہم بعد ازاں پولیس حکام سے مذاکرات کے بعد مظاہرین منتشر ہوگئے۔

دوسری جانب لانڈھی چار نمبر میں علاقہ مکینوں کی بڑی تعداد پانی اور بجلی کی عدم فراہمی کے خلاف سڑکوں پر نکل آئی، مظاہرین کے مطابق علاقے میں کئی روز سے بجلی کی فراہمی منقطع ہے جس کے باعث پانی کی شدید قلت کا سامنا بھی کرنا پڑ رہا ہے۔

اس موقع پر مظاہرین کی جانب سے حکومتِ سندھ اور کراچی الیکٹرک انتظامیہ کے خلاف نعرے بازی بھی کی گئی۔