کراچی کے علاقے حسن اسکوائر پر پانی کی عدم فراہمی پر شہریوں نے احتجاج کیا اور سڑک سے گزرنے والے واٹر ٹینکروں کے وال کھول دیے۔
اے آر وائی نیوز کے مطابق کراچی کے علاقے حسن اسکوائر پر پانی عدم فراہمی پر شہری سڑکوں پر نکل آئے جس کے نتیجے میں حسن اسکوائر سے نیپا جانے والی سڑک ٹریفک کے لیے بند ہوگئی۔
مظاہرین نے روڈ سے گزرنے والے واٹر ٹینکروں کے وال کھول دیے، مظاہرین کا کہنا ہے کہ ہمیں پانی نہیں ملتا تو ٹینکروں کو بھی پانی لے جانے نہیں دیں گے۔
ٹینکروں کے وال کھولے کے باعث شاہراہ قائدین اور حسن اسکوائر کی سڑکوں پر پانی جمع ہوگیا ہے۔
احتجاج کی وجہ سے پرانی سبزی منڈی، عیسیٰ نگری، اسٹیڈیم روڈ اور اطراف کی سڑکوں پر بدترین ٹریفک جام ہے۔
ادھر کراچی کے علاقے جمشید روڈ پر بھی پانی، بجلی کی عدم فراہمی پر احتجاج ختم ہوگیا ہے جس کے بعد سڑک ٹریفک کے لیے کھول دی گئی ہے۔
واضح رہے کہ گزشتہ روز گرومندر سے لسبیلہ جانے والی سڑک پر بھی شہریوں نے پانی اور بجلی کی عدم فراہمی پر احتجاج کیا تھا۔
امیر جماعت اسلامی منعم ظفر نے پانی بحران پر احتجاج کے شرکا سے خطاب کرتے ہوئے کہا کہ ن لیگ اور پیپلزپارٹی شہر کو پانی دینے کو تیار نہیں۔
انہوں نے کہا کہ عوام کو ظالم حکمرانوں کے خلاف گھروں سے نکلنا ہوگا، کراچی کا انفرا اسٹرکچر تباہ کردیا گیا، یہ سیوریج کا کام بھی نہیں کرسکتے، ہمارا مطالبہ واضح ہے کے فور پروجیکٹ مکمل کیا جائے۔
امیر جماعت اسلامی کراچی نے کہا کہ ہم آئندہ کے لائحہ عمل کا اعلان جلد کریں گے۔
