Tag: پاکستانی طلبا

اسلام آباد: چیئرمین سینیٹ صادق سنجرانی کا کہنا ہے کہ پاکستانی طلبا کوسہولتیں فراہم کرنے پر چین کے شکرگزار ہیں۔

تفصیلات کے مطابق وفاقی دارالحکومت اسلام آباد میں چیئرمین سینیٹ صادق سنجرانی کی چین کے سفارت خانے آمد پر چینی سفیر یاؤ جنگ نے چیئرمین سینیٹ کا استقبال کیا۔دلاور خان، ستارہ ایاز، محمدعلی سیف، نصیب اللہ اور اشوک کمار چیئرمین سینیٹ کے ہمراہ تھے۔

اس موقع پر چیئرمین سینیٹ نے کہا کہ کرونا وائرس پر پاکستانی قوم چین کے ساتھ ہے، سیاسی قیادت، پارلیمان اور عوام چین سےاظہار یکجہتی کرتے ہیں۔

صادق سنجرانی کا کہنا تھا کہ چین کی حکومت کے کرونا وائرس پر قابو پانے کے اقدامات قابل تحسین ہیں، پاکستانی طلبا کو سہولتیں فراہم کرنے پر چین کےشکرگزار ہیں۔ انہوں نے کہا کہ ضرورت پڑی توطبی ماہرین پرمشتمل ٹیم چین بھجوائی جائے گی، پاکستان اور چین نے ہر مشکل وقت میں ایک دوسرے کا ساتھ دیا۔

چینی سفیر نے اظہار یکجہتی پر چیئرمین سینیٹ ،پارلیمان اور عوام کاشکریہ ادا کرتے ہوئے کہا کہ پاکستانی طلبا ہمیں بہت عزیز ہیں، پاکستانی طلبا کو ہر ممکن سہولتیں کی فراہمی یقینی بنائیں گے۔

کرونا وائرس دنیا کے لیے بڑا خطرہ بن گیا، اموات 2619 ہو گئیں

واضح رہے کہ کرونا وائرس دنیا کے لیے بڑا خطرہ بن گیا ہے، وائرس سے اموات کی تعداد 2619 ہو گئی۔

اسلام آباد: معاون خصوصی برائے صحت ڈاکٹر ظفر مرزا کا کہنا ہے کہ پاکستان میں کرونا وائرس سے متاثرہ کوئی شہری سامنے نہیں آیا ہے۔

تفصیلات کے مطابق اسلام آباد میں پریس کانفرنس کرتے ہوئے ڈاکٹر ظفر مرزا نے کہا کہ چین میں کرونا وائرس سے اب تک 170 افراد ہلاک ہوچکے ہیں، پوری دنیا کرونا وائرس سے متعلق تشویش میں مبتلا ہے اور یہ وائرس چین سمیت 15 ممالک میں پھیل چکا ہے۔

ڈاکٹر ظفر مرزا کا کہنا تھا کہ قوم کو کرونا وائرس کی صورت حال پر باخبر رکھنا فرض سمجھتے ہیں، جن لوگوں میں بیماری پھیلی ماضی میں انہوں نے چین کا سفر کیا۔

معاون خصوصی برائے صحت کا کہنا تھا کہ متاثرہ ممالک میں کرونا وائرس کی منتقلی چین سے ہوئی، پاکستان میں ابھی تک کوئی کرونا وائرس سے متاثرہ مریض نہیں، چین میں کرونا وائرس سے متاثرہ پاکستانی طلبہ میں اضافہ نہیں ہوا۔

ڈاکٹر ظفر مرزا کا کہنا تھا کہ ڈبلیو ایچ او نے چین میں کرونا وائرس سے متاثر غیر ملکیوں کو واپس نہ لانے کی سفارش کی ہے، ڈبلیو ایچ او کسی کو چین سے شہریوں کے انخلا کی تجویز نہیں دے رہا۔

انہوں نے کہا کہ ایسا نہیں کہ حکومت کو چین میں پاکستانیوں کا احساس نہیں ہے، چینی شہر ووہان تک وائرس کی منتقلی کے سبب لاک ڈاؤن کیا گیا ہے، ڈبلیو ایچ او وائرس کا عالمی پھیلاؤ روکنے کے لیے تجاویز دے رہا ہے۔

معاون خصوصی کا کہنا تھا کہ بیجنگ میں ہمارا سفارت خانہ دن رات پاکستانی کمیونٹی سے رابطے میں ہے، ووہان میں موجود پاکستانیوں کے دیکھ بھال کر رہے ہیں۔

کراچی: وزیر صحت سندھ عذرا پیچوہو کا کہنا ہے کہ چین میں مقیم پاکستانی طلبا کو واپس نہ لایا جائے، حالات کے سازگار ہونے کا انتظار کیا جائے۔

تفصیلات کے مطابق صوبائی وزیر صحت عذرا پیچوہو نے کہا کہ چین میں مقیم پاکستانی طلبا کو واپس نہ لایا جائے، متاثرہ طلبا ممکنہ طور پر وائرس پھیلانے کا سبب بن سکتے ہیں۔

وزیر صحت سندھ کا کہنا تھا کہ چینی قوانین اور صحت عامہ کے پیش نظر طلبا چین میں قیام کریں، حالات کے سازگار ہونے کا انتظار کیا جائے، وائرس کاایک مخصوص وقت ہوتا ہے،مشکل وقت بھی گزر جائے گا۔

کرونا وائرس سے متعق صوبائی وزیر صحت عذرا پیچوہو کا کہنا تھا کہ پاکستان میں کرونا وائرس کا کوئی کیس رپورٹ نہیں ہوا۔

اس سے قبل معاون خصوصی برائے صحت ڈاکٹر ظفر مرزا کی زیر صدارت ایمرجنسی کرونا وائرس کی کور کمیٹی کے اجلاس میں طبی ماہرین کا کہنا تھا کہ پاکستان میں فی الحال کرونا وائرس سے نمٹنے کی سہولتیں موجود نہیں، چین میں موجود پاکستانیوں کو کلیئرنس کے بعد وطن لایا جائے، بغیر کلیئرنس کسی کو بھی پاکستان واپس نہ لایا جائے۔

دوسری جانب ترجمان دفترخارجہ عائشہ فاروقی کا کہنا ہے کہ پاکستانی سفارت خانہ چین میں موجود طلبا سے رابطے میں ہے، کسی ملک نے ابھی تک باقاعدہ چین سے اپنے لوگ نہیں نکالے۔

چین میں 4 پاکستانی طلبہ میں کرونا وائرس کی تصدیق ہوئی ہے، ڈاکٹر ظفر مرزا

یاد رہے کہ گزشتہ روز ڈاکٹر ظفر مرزا نے تصدیق کی تھی کہ چین کے صوبے ووہان میں زیر تعلیم 4 پاکستانی طالب علموں میں بھی کرونا وائرس کی تصدیق ہوچکی ہے۔ چاروں طالب علم تشویش ناک حالت میں اسپتال میں داخل ہیں۔