نوبیل انعام یافتہ پاکستانی سماجی کارکن اور فلم پروڈیوسر ملالہ یوسف زئی نے مستقبل میں پاکستانی فلم سازوں و فنکاروں کے ساتھ بھی کام کرنے کا عندیہ دیا ہے۔
کینیڈا میں ہونے والے ٹورنٹو انٹرنیشنل فلم فیسٹیول میں پاکستانی صحافی کو انٹرویو دیتے ہوئے ملالہ یوسف زئی نے مستقبل میں پاکستانی فلموں کو پروڈیوس کرنے سمیت اداکاروں کے ساتھ کام کرنے کا عندیہ دیا۔
ملالہ نے کہا کہ میں نے پہلے بھی پاکستانی فلم کو سپورٹ کیا ہے اور جب بھی مجھے موقع ملتا ہے میں پاکستانی فلموں کو سپورٹ کرتی رہوں گی، ہر کسی کو پاکستانی فلموں، ڈراموں اور اداکاروں کو سپورٹ کرنا چاہیے۔
ملالہ نے پاکستانی ڈراموں اور فلموں کی تعریفیں کرتے ہوئے کہا کہ پاکستان میں اچھے موضوعات پر ڈرامے اور فلمیں بنتی ہیں، اس لیے ہر پاکستانی کو کوشش کرنی چاہیے کہ وہ پاکستانی فلموں اور ڈراموں کو بطور ہدایت کار یا پروڈیوسر سپورٹ کرے یا پھر بطور مداح ڈراموں اور فلموں کو شوق سے ضرور دیکھیں۔
نوبیل انعام یافتہ کارکن نے کہا کہ پاکستان میں بہت زیادہ ٹیلنٹ موجود ہے، شوبز انڈسٹری کی سپورٹ کرنے سے ہی اسے آگے لے کر جایا جا سکتا ہے۔
واضح رہے کہ ملالہ یوسف زئی ماضی میں پاکستانی فلم ”جوائے لینڈ“ کو پروڈیوس کر چکی ہیں اور حال ہی میں بطور پروڈیوسر ان کی پہلی ہولی وڈ دستاویزی فلم ”دی لاسٹ آف دی سی ویمن“ کا ٹریلر بھی سامنے آیا تھا۔
