Tag: پاکستانی نژاد اطالوی لڑکی

گجرات : پسندکی شادی کی خواہش پر اہلخانہ نے غیرت کےنام پر  اپنی اطالوی بیٹی کو قتل کردیا ، پولیس نے لڑکی کےقتل میں ملوث باپ اوربھائی سمیت تین افرادکو گرفتار کرلیا ہے۔

تفصیلات کے مطابق پسندکی شادی کی خواہش کا اظہار کرنا پاکستانی نژاد اطالوی لڑکی کا جرم ٹھرا، گجرات میں ثنا چیمہ کو باپ، بھائی اور چچا نے مبینہ طور پر غیرت کے نام پر قتل کردیا ۔

پولیس کا کہنا ہے کہ  مقتولہ کے والد غلام مصطفیٰ اس کی شادی رشتے داروں میں کرنا چاہتے تھے، مگر ثناء چاہتی تھی کہ اس کی شادی اٹلی میں ہو۔

پولیس کے مطابق ثناچیمہ کے والدغلام مصطفیٰ ،  بھائی عدنان مصطفیٰ سمیت تین افراد نے مل کر مبینہ طور پر ثنا کو قتل کیا اور  پھر دفنا دیا، پولیس نے اب تک تین افراد کو حراست میں لیا اور ایف آئی آردرج کرلی ہے۔

اہلخانہ نے الزامات مستردکرتے ہوئے ثناچیمہ کی موت  کو حادثہ قرار دے کر کہا کہ موت بیماری کے باعث ہوئی۔

پولیس کا کہنا ہے کہ لڑکی کے قتل میں اس کا باپ ،بھائی سمیت3افرادملوث ہیں ، اصل حقائق تحقیقات کے بعد سامنےآئیں گے۔

مزید پڑھیں : پسند کی شادی، خواہش ظاہر کرنے پر اہل خانہ نے لڑکی کو زندہ جلادیا

یاد رہے گذشتہ سال گجرات میں ایسا ہی ایک انسانیت سوز واقعہ پیش آیا تھا ، جہاں ایم اے کی طلبہ ماریہ کو کزن کے ساتھ شادی کا اظہار کرنے پر اہل خانہ نے زندہ جلادیا تھا۔ متاثرہ لڑکی کو تشویش ناک حالت میں اسپتال منتقل کیا گیا تھا لیکن 90 فیصد جسم جھلسنے کی وجہ سے جانبر نہ ہوسکی۔

پولیس نے لڑکی کے قتل میں ملوث نانا، والدہ، ماموں اور بھائی کو گرفتار کرلیا تھا۔

مقتولہ کے نانا کا کہنا تھا کہ ’’ماریہ نے کزن کے ساتھ پسند کی شادی کرنے کا اظہار کیا تاہم میری غیرت نے گوارا نہیں کیا اس لیے میں نے اُس پر پیٹرول چھڑک کر آگ لگا دی۔

واضح رہے کہ 2016 میں بھی غیرت کے نام پر قتل کا ایک  واقعہ پیش آیا تھا، جب جہلم میں  برطانوی نژاد پاکستانی خاتون سامعہ شاہد کو  غیرت کے نام پر قتل کردیا گیا تھا۔

اہل خانہ نے دعویٰ کیا تھا کہ سامعہ کی موت  دل کا دورہ پڑنے کی وجہ سے  ہوئی جبکہ بعد ازاں  سابق شوہر چوہدری شکیل نے انہیں گلا دبا کر قتل کرنے کا اعتراف کرلیا تھا۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔