برٹش کولمبیا : کینیڈا میں پاکستانی نژاد بزنس مین راؤ راحت کو جلا دیا گیا، ان سے سکھ رہنما ہردیپ سنگھ نجر کے قتل کے حوالے سے پوچھ گچھ کی گئی تھی۔
تفصیلات کے مطابق پاکستانی نژاد بزنس مین راؤ راحت کو کینیڈا میں نامعلوم شخص نے آگ لگادی۔
نامعلوم شخص نے برٹش کولمبیا میں اُن کے دفترمیں گھس کر آگ لگائی تاہم انہیں انتہائی تشویشناک حالت میں اسپتال پہنچایا گیا، جہاں ان کی جان بچانے کی سرتوڑ کوشش کی جا رہی ہے۔
گزشتہ برس خالصتان نواز سکھ رہنما ہردیپ سنگھ نجر کے قتل کے حوالے سے راؤ راحت سے پوچھ گچھ کی گئی تھی، ان کا تعلق زرمبادلہ کے بزنس سے ہے۔
تاہم ابھی تک کسی بھی گروپ یا فرد نے راؤ راحت کو جلانے کی ذمےداری قبول نہیں کی ہے۔
یاد رہے ہردیپ سنگھ کو گزشتہ سال برٹش کولمبیا کے شہر سرے میں ایک بڑے گردوارے کے باہرقتل کیا گیا تھا، ہردیپ سنگھ نجر کے قتل کے بعد سکھوں کے احتجاج میں راؤ راحت ان کے ساتھ پیش پیش رہے تھے۔
کینیڈا میں خالصتان نواز سکھ رہنماؤں کی سرگرمیوں پربھارت بہت زیادہ متعرض ہے لیکن دال اب تک نہیں گل سکی۔
خالصتان تحریک کے معاملات نے بھارت اور کینیڈا کے تعلقات میں شدید کشیدگی پیدا کردی ہے مگراس کے باوجود کینیڈین وزیراعظم جسٹن ٹروڈو نےبھارت کی برتری تسلیم کرنےسے انکار کیا ہے۔
بھارت کی ٹرانس نیشنل کلنگ بین الاقوامی امن کیلئے خطرہ ہے، برٹش کولمبیا میں پہلے ہردیپ سنگھ نجر قتل اور اب ایک پُرامن شہری کو آگ لگائی گئی، کیا ہردیپ سنگھ نجر کی طرح پاکستانی نژاد تاجر کے قتل میں بھی بھارت ملوث ہے۔