ARYNews.tv | Urdu – Har Lamha Bakhabar

Tag: پاکستان

پاکستان بھر سے تازہ ترین خبریں اور معلومات دیکھیں اے آز وائی نیوز کی ویب سائٹ پر

پاکستان بھر سے تازہ ترین خبریں اور معلومات دیکھیں اے آز وائی نیوز کی ویب سائٹ پر 

  • وزیر اعظم نے سرکاری حج کوٹہ کم رکھنے کی تجویز مسترد کر دی تھی

    وزیر اعظم نے سرکاری حج کوٹہ کم رکھنے کی تجویز مسترد کر دی تھی

    اسلام آباد (31 جولائی 2025): ذرائع نے کہا ہے کہ وزیر اعظم میاں شہباز شریف نے سرکاری حج کوٹہ کم رکھنے کی تجویز مسترد کر دی تھی۔

    تفصیلات کے مطابق وفاقی کابینہ میں حج پالیسی منظور کر لی گئی ہے، تاہم اجلاس میں تجویز آئی تھی کہ سرکاری کوٹہ 40 فی صد رکھا جائے، لیکن وزیر اعظم نے اسے مسترد کر کے 70 فی صد کیا۔

    کابینہ اجلاس میں فیصلہ ہوا کہ آئندہ سال پرائیویٹ حج کوٹہ صرف 30 فی صد ہوگا، وزیر اعظم نے کہا کہ حجاج کرام کو ہر قسم کی سہولتوں کی فراہمی یقینی بنائی جائے گی۔

    وزیر مذہبی امور نے بتایا کہ تخمینہ ساڑھے 11 سے ساڑھے 12 لاکھ روپے ہوگا، 2026 میں ایک لاکھ 79 ہزار سے زائد پاکستانی فریضہ حج پر جا سکیں گے۔

    حج پالیسی 2026 کی منظوری، سرکاری اور نجی کوٹہ سے متعلق بڑا فیصلہ

    دوسری طرف وزیر اعظم کے زیر صدارت اجلاس میں فیصلہ ہوا ہے کہ مہنگی چینی بیچنے والوں کے خلاف سخت کارروائی ہوگی، وزیر اعظم نے چینی کے سرکاری نرخ پر عمل درآمد یقینی بنانے کا حکم بھی دیا، شہباز شریف نے کہا چینی کی ایکس مل قیمت 165 روپے اور ریٹیل قیمت 173 روپے پر عمل درآمد کرایا جائے۔

    انھوں نے کہا کسی کو بھی عوام کے معاشی استحصال کی ہرگز اجازت نہیں دی جائے گی، وزیر اعظم کو بریفنگ میں بتایا گیا کہ چینی کی مصنوعی قلت پیدا کرنے والوں کے خلاف کارروائیاں جاری ہیں۔

  • پاکستان کا جدید ریموٹ سینسنگ سیٹلائٹ کامیابی سے خلا میں روانہ

    پاکستان کا جدید ریموٹ سینسنگ سیٹلائٹ کامیابی سے خلا میں روانہ

    اسلام آباد (31 جولائی 2025): پاکستان کا جدید ریموٹ سینسنگ سیٹلائٹ کامیابی سے خلا میں روانہ ہو گیا ہے۔

    تفصیلات کے مطابق چین نے جمعرات کی صبح جنوب مغربی چین کے صوبے سیچوان میں واقع شیچانگ سیٹلائٹ لانچ سینٹر سے کوائژو-1A کیریئر راکٹ کے ذریعے پاکستان کے ریموٹ سینسنگ سیٹلائٹ-01 کو کامیابی کے ساتھ مقررہ مدار میں بھیج دیا۔ یہ سیٹلائٹ قومی اراضی کے سروے، آفات کی پیش گوئی، اور بچاؤ و امدادی سرگرمیوں جیسی خدمات فراہم کرنے کا کام انجام دے گا۔

    یہ پاکستان کے خلائی پروگرام میں بڑی پیش رفت ہے، یہ جدید ریموٹ سینسنگ سیٹلائٹ چین کے شِی چانگ سیٹلائٹ لانچ سینٹر سے خلا میں روانہ کیا گیا ہے۔ اس مصنوعی سیارے سے ملک میں سیلاب، زلزلے، لینڈ سلائیڈنگ، گلیشیئرز کے پگھلنے کی بروقت اطلاع مل سکے گی، یہ سیٹلائٹ جغرافیائی خطرات کی نشان دہی کر کے سی پیک کو بھی مدد دے گا، اور دوسری طرف پاکستان میں انفراسٹرکچر کی ترقی اور شہری پھیلاؤکی نگرانی ہو سکے گی۔

    اس مشن کی کامیابی کے ساتھ سپارکو نے پاکستان کے خلائی سفر میں ایک اور کامیابی کا اضافہ کر دیا ہے، کامیاب لانچنگ کے بعد خلا میں پاکستان کے فعال مصنوعی سیاروں کی تعداد 6 ہو گئی ہے۔

    پاکستان اور امریکا کے درمیان اہم تجارتی معاہدہ کامیابی سے طے پا گیا، وزارت خزانہ

    وفاقی وزیر احسن اقبال نے انجینئرز اور سائنس دانوں کو مبارک باد دی، چیئرمین سپارکو نے کہا کہ سیٹلائٹ لانچ پائیدار ترقی کی جانب ایک قدم ہے، اس سے پاکستان نے خلائی پروگرام کا ایک اور سنگِ میل عبور کر لیا ہے، یہ سیٹلائٹ فصلوں کی پیداوار، انفراسٹرکچر اور شہری پھیلاؤ کی نگرانی میں مددگار ثابت ہوگا، سیلاب، زلزلے اور زمینی کھسکاؤ کی بروقت پیشگوئی ممکن ہو سکے گی۔

    انھوں نے کہا اس سیٹلائٹ سے گلیشیئرز کے پگھلاؤ اور جنگلات کی کٹائی پر نظر رکھی جا سکے گی، ماحولیاتی نگرانی اور قدرتی وسائل کے مؤثر انتظام میں یہ سیٹلائٹ معاون ہوگا، جب کہ سی پیک منصوبوں میں جیو ہیزرڈز اور ٹرانسپورٹ نیٹ ورکس کی شناخت میں بھی مدد ملے گی۔

    ان کا کہنا تھا کہ یہ سیٹلائٹ مختلف ماحولیاتی حالات میں ڈیٹا حاصل کرنے کی بھرپور صلاحیت رکھتا ہے، اس کی لانچنگ سپارکو کے وژن 2047 اور قومی خلائی پالیسی کا حصہ ہے۔

  • پاکستان اور امریکا کے درمیان اہم تجارتی معاہدہ کامیابی سے طے پا گیا، وزارت خزانہ

    پاکستان اور امریکا کے درمیان اہم تجارتی معاہدہ کامیابی سے طے پا گیا، وزارت خزانہ

    اسلام آباد (31 جولائی 2025): پاکستان کو تجارتی میدان میں بڑی کامیابی ملی ہے، پاک امریکا ٹریڈ ڈیل مکمل ہو گئی، وزارت خزانہ نے اعلامیہ جاری کرتے ہوئے کہا ہے کہ پاکستان اور امریکا کے درمیان اہم تجارتی معاہدہ کامیابی سے طے پا گیا ہے۔

    وزارت خزانہ سے جاری اعلامیے کے مطابق اس معاہدے کا مقصد دو طرفہ تجارت کا فروغ اور منڈیوں تک رسائی میں اضافہ ہے، سرمایہ کاری کے فروغ اور باہمی دل چسپی کے شعبوں میں تعاون بھی معاہدے کا حصہ ہے۔

    معاہدے میں پیش رفت وزیر خزانہ محمد اورنگزیب، امریکی سیکریٹری کامرس اور یو ایس ٹی آر کی ملاقات میں ہوئی، جس میں سیکریٹری کامرس جواد پال اور امریکا میں پاکستانی سفیر رضوان سعید شیخ بھی شریک تھے۔

    اعلامیے کے مطابق امریکی صدر ڈونلڈ ٹرمپ نے معاہدے کا اعلان ٹرتھ سوشل پر پوسٹ کے ذریعے کیا، پاک امریکا معاہدہ سے امریکا میں پاکستانی مصنوعات پر ٹیرف میں کمی متوقع ہے، اس سے توانائی، معدنیات، آئی ٹی، کرپٹو کرنسی سمیت اہم شعبوں میں باہمی اقتصادی تعاون بڑھے گا۔

    اعلامیہ میں کہا گیا ہے کہ یہ معاہدہ پاک امریکا تجارتی تعلقات کو امریکی ریاستوں تک وسعت دینے میں مدد دے گا، دونوں ممالک کو ایک دوسرے کی منڈیوں تک بہتر رسائی حاصل ہوگی، اس سے پاکستان کے بنیادی انفراسٹرکچر اور ترقیاتی منصوبوں میں امریکی سرمایہ کاری کا بھی امکان ہے۔

    وزارت خزانہ کا کہنا ہے کہ یہ معاہدہ دونوں ممالک کی قیادت کے دو طرفہ تعلقات گہرے کرنے کے عزم کا اظہار ہے، اور تجارت اور سرمایہ کاری روابط کو مضبوط بنانے کی کوششوں کی نشان دہی کرتا ہے۔

    پاکستان کے ساتھ تجارتی ڈیل مکمل ہوگئی، ٹرمپ کا اعلان

    ادھر تجزیہ کاروں نے امریکی صدر ڈونلڈ ٹرمپ کے پاکستان کے ساتھ تجارتی ڈیل کے اعلان کو خوش آئند قرار دیا ہے، تجزیہ کار ڈاکٹر قمر چیمہ کہتے ہیں اس اعلان سے ظاہر ہوتا ہے اب پاکستان سینٹر آف گریویٹی ہے، جو تجارتی سرگرمیوں کا مرکز ہوگا۔ امریکن بڑے پیمانے پر سرمایہ کاری کرنے جا رہے ہیں، جس کے بعد یورپین اور دیگر ممالک بھی سرمایہ کریں گے۔

    تجزیہ کار ڈاکٹر نسیم اشرف نے کہا یہ صرف تجارت کی بات نہیں بلکہ یہ پاکستان اور امریکا کا ایک نیا تعلق قائم ہوا ہے، ماہر معیشت عابد سلہری نے پاک امریکا ٹریڈ ڈیل کو سفارتی میدان میں پاکستان کی بڑی کامیابی قرار دیا اور کہا یہ پاکستان کے لیے ایک تاریخی لمحہ ہے اور یہ حقیقی معنوں میں گیم چینجر بن سکتا ہے، جس سے پاکستان توانائی کے میدان میں خود کفیل ہو سکتا ہے اور اپنے معدنی ذخائر کو دریافت کر سکتا ہے۔

  • پاکستان میں چاندی کی قیمت میں مسلسل کمی ریکارڈ

    پاکستان میں چاندی کی قیمت میں مسلسل کمی ریکارڈ

    پاکستان میں چاندی کی قیمت بین الاقوامی مارکیٹ میں چاندی کی مانگ و رسد، ڈالر کی قیمت، مہنگائی، عوامی مانگ اور سرکاری پالیسیوں جیسے مختلف عوامل پر منحصر ہوتی ہے۔

    ساڑھے باون تولہ چاندی کی قیمت کا تعین اس لیے اہم ہے کہ تاریخی طور پر یہ ایک معیاری وزن سمجھا جاتا ہے اور زیادہ تر چاندی کے زیورات اسی وزن اور مخصوص معیار کے تحت تیار کیے جاتے ہیں، پاکستان کے مختلف شہروں میں چاندی کی قیمت میں تھوڑا سا اتار چڑھاؤ پایا جاسکتا ہے۔

    ملک میں مقامی کرنسی کے حساب سے روزانہ چاندی کی قیمت اپ ڈیٹ ہوتی ہے، فی گرام چاندی، دس گرام چاندی اور فی تولہ چاندی کی قیمت آج ملک میں کیا رہی اس حوالے سے ذیل میں قیمتوں کی تفصیلات بتائی گئی ہی۔

    ملک بھر میں چاندی کی قیمت میں آج بھی معمولی کمی دیکھنے میں آئی، کراچی، لاہور اور اسلام آباد میں آج 10 گرامی چاندی کی قیمت تقریباً 3,470 روپے رہی جبکہ ان شہروں میں ایک تولہ چاندی کی قیمت تقریباً 4,043 روپے ریکارڈ کی گئی۔

    اسی طرح راولپنڈی، پشاور اور کوئٹہ میں بھی چاندی کے نرخ یکساں رہے، ان شہروں میں 10 گرامی چاندی کی قیمت 3,470 روپے رہی جبکہ ایک تولہ چاندی کی قیمت 4,043 روپے رہی۔

    پاکستان میں چاندی کو صرف زیورات کے طور پر ہی نہیں بلکہ ایک محفوظ سرمایہ کاری کے طور پر بھی دیکھا جاتا ہے۔ یہاں چاندی کی سرمایہ کاری کے بارے میں کچھ اہم باتیں جاننا ضروری ہے:

    مہنگائی کے خلاف ایک ہیج: چاندی کو اکثر مہنگائی کے خلاف ایک ہیج سمجھا جاتا ہے۔ جب مہنگائی بڑھتی ہے تو چاندی کی قیمت میں بھی اضافہ ہونے کا امکان ہوتا ہے۔

    طویل مدتی سرمایہ کاری: چاندی میں سرمایہ کاری کو طویل مدتی سرمایہ کاری کے طور پر دیکھا جاتا ہے۔ اس کی قیمت میں مختصر مدت میں اتار چڑھاؤ آ سکتا ہے لیکن طویل مدت میں یہ ایک اچھی سرمایہ کاری ثابت ہو سکتی ہے۔

    سونا کے مقابلے میں کم خطرناک: سونا کے مقابلے میں چاندی کو کم خطرناک سرمایہ کاری سمجھا جاتا ہے۔ اگرچہ سونا بھی ایک محفوظ سرمایہ کاری ہے لیکن چاندی کی قیمت میں اتار چڑھاؤ کم ہوتا ہے۔

  • شعبہ صحت میں انقلابی قدم، پاکستان میں پہلی بار ٹیلی میڈیسن منصوبے کا آغاز

    شعبہ صحت میں انقلابی قدم، پاکستان میں پہلی بار ٹیلی میڈیسن منصوبے کا آغاز

    اسلام آباد (30 جولائی 2025): پاکستان میں شعبہ صحت میں انقلابی قدم اٹھاتے ہوئے پہلی بار ٹیلی میڈیسن منصوبے کا آغاز کیا جا رہا ہے۔

    اے آر وائی نیوز کے مطابق وفاقی وزیر صحت مصطفیٰ کمال نے صحت میں انقلابی قدم اٹھاتے ہوئے ملک میں پہلی بار ٹیلی میڈیسن منصوبہ شروع کرنے کا فیصلہ کیا ہے۔ ابتدائی مرحلے میں کراچی اور اسلام آباد میں پائلٹ پروگرام کا آغاز کیا جائے گا۔

    ٹیلی میڈیسن منصوبے پر پیش رفت سے متعلق اعلیٰ سطح کا اجلاس وفاقی وزیر صحت مصطفیٰ کمال کی سربراہی میں منعقد ہوا جس میں جوائنٹ سیکریٹری ہیلتھ اور ڈائریکٹر جنرل ڈیولپمنٹ سمیت اسپیشل کنسلٹنٹ ٹیلی میڈیسن شرکت کی۔ اجلاس میں ٹیلی میڈیسن منصوبے کی پیش رفت کا جائزہ اور درپیش چیلنجز پر بریفنگ دی گئی۔

    اجلاس سے خطاب کرتے ہوئے وفاقی وزیر صحت مصطفیٰ کمال نے ٹیلی میڈیسن منصوبے کو وقت کی اہم ضرورت اور پرائمری ہیلتھ کیئر سسٹم کو مستحکم بنانے کی جانب ایک اہم قدم قرار دیا اور اس منصوبے کی جلد از جلد تکمیل یقینی بنانے کی ہدایت کی تاکہ ملک بھر کے عوام اس جدید سہولت سے بھرپور فائدہ اٹھا سکیں۔

    مصطفیٰ کمال کا کہنا تھا کہ 70 فیصد مریض بنیادی صحت مراکز کے بجائے بڑے اسپتالوں میں جاتے ہیں، جس کی وجہ سے بڑے اسپتالوں پر مریضوں کا دباؤ بڑھ رہا ہے۔ ٹیلی میڈیسن کے اس جدید نظام کے ذریعے نہ صرف اسپتالوں پر بوجھ پر کم ہو گا بلکہ شہریوں کو ان کی دہلیز پر طبی سہولتیں میسر آئیں گی۔

    ان کا کہنا تھا کہ جدید ٹیکنالوجی سے استفادہ کرتے ہوے ڈاکٹرز اور دوا ہم مریض کی دہلیز تک لا رہے ہیں ۔ ٹیلی میڈیسن کے ذریعہ دور دراز علاقوں کے مکینوں کو ان کے گھروں کی دہلیز پر ڈاکٹرز اور دوا کی سہولت میسر ہوگی۔ اس اقدام سے غریب اور لاچار مریض جو اسپتال جانے کی استطاعت نہیں رکھتے، وہ بھی مستفید ہوسکیں گے۔

    ٹیلی میڈیسن کیا ہے؟

    ٹیلی میڈیسن ایک ایسا طریقہ کار ہے جس میں ڈاکٹر اور مریض ایک دوسرے سے دور ہوتے ہوئے بھی طبی مشورہ اور دیکھ بھال فراہم کرتے ہیں۔ یہ عام طور پر ویڈیو کانفرنسنگ یا ٹیلی فون کے ذریعے کیا جاتا ہے، جس میں مریض ایک جگہ پر ہوتا ہے اور ڈاکٹر کسی اور جگہ پر۔

    ٹیلی میڈیسن کے ذریعے، ڈاکٹر مریض کی تشخیص، علاج اور نگرانی کر سکتا ہے، چاہے مریض اور ڈاکٹر دونوں مختلف مقامات پر ہوں۔ یہ سہولت خاص طور پر ان لوگوں کے لیے مفید ہے جو دور دراز علاقوں میں رہتے ہیں یا جنہیں سفر کرنے میں دشواری ہوتی ہے۔

  • مئی 2025 کی طرح آئندہ بھی کسی بھی جارحیت کا بھرپور جواب دیا جائے گا، پاکستان

    مئی 2025 کی طرح آئندہ بھی کسی بھی جارحیت کا بھرپور جواب دیا جائے گا، پاکستان

    اسلام آباد (30 جولائی 2025): پاکستان نے واضح طور پر کہا ہے کہ مئی 2025 کی طرح آئندہ بھی کسی بھی جارحیت کا بھرپور جواب دیا جائے گا۔

    اے آر وائی نیوز کے مطابق پاکستان نے نیو نارمل کے حوالے سے بھارتی بیانات کو دوٹوک انداز میں مسترد کر دیا ہے اور دفتر خارجہ نے واضح طور پر کہا ہے کہ مئی 2025 کی طرح پاکستان آئندہ بھی کسی بھی جارحیت کا بھرپور جواب دے گا۔ دو طرفہ تعلقات کا واحد راستہ خود مختاری، سالمیت اور اقوام متحدہ کے اصولوں کا احترام ہے۔

    ترجمان دفتر خارجہ شفقت علی خان نے کہا کہ مبینہ "ایٹمی بلیک میلنگ” کا بھارتی بیانیہ گمراہ کن اور خود غرضی پر مبنی تصور ہے۔ بھارت کا مقصد اشتعال انگیزی پر پردہ ڈالنا اور پاکستان پر الزام عائد کرنا ہے۔ دنیا کو پتہ ہے کہ پاکستان نے بھارت کا روایتی صلاحیتوں کے ذریعہ مقابلہ کیا۔

    ترجمان دفتر خارجہ نے بھارتی پارلیمان میں نام نہاد آپریشن سندور پر ہونے والی بحث پر دفتر خارجہ نے ردعمل دیتے ہوئے کہا ہے کہ بھارتی رہنما عوام کو گمراہ کرنے کے بجائے اپنے فوجی نقصانات تسلیم کریں۔ بھارتی قیادت کو جنگ بندی میں فریق ثالث کے فعال کردار کو بھی مان لینا چاہیے۔

    انہوں نے آپریشن سندور، بھارت کے بے بنیاد الزامات اور اشتعال انگیز دعووں کو یکسر مسترد کرتے ہیں۔ بھارتی رہنماؤں کے یہ بیانات حقائق کو مسخ کرنے اور جارحیت کو جواز دینے کے خطرناک رجحان کے عکاس ہیں اور اندرونی سیاسی فائدے کے لیے کشیدگی کو بڑھاوا دینا خطرناک ہے۔

    ترجمان شفقت علی خان نے کہا کہ دنیا بھی یہ جانتی ہے کہ بھارت نے بغیر تحقیقات کے حملہ کیا۔ 6 اور 7 مئی کو بھارتی حملے میں درحقیقت معصوم افراد شہید ہوئے۔

    بھارت نےجس مبینہ دہشت گردی کے ڈھانچے کو نشانہ بنایا درحقیقت وہاں خواتین اور بچے تھے۔ اس حملے میں بھارت اپنے کسی بھی اسٹریٹیجک ہدف کو حاصل کرنے میں ناکام رہا۔ بھارتی طیاروں اور اہداف کو غیر مؤثر بنانے میں پاکستان کی کامیابی ناقابل تردید حقیقت ہے۔

    انہوں نے مزید کہا کہ بھارت نے پہلگام واقعہ پر شفاف اور آزادانہ تحقیقات کی فوری پیشکش کو قبول نہیں کیا بلکہ جارحیت اور تصادم کا راستہ اختیار کیا۔ وہ خود ہی مدعی بھی بنا، منصف بھی اور جلاد بھی۔

    دفتر خارجہ نے آپریشن مہادیو کو مسترد کرتے ہوئے کہا کہ نام نہاد آپریشن مہا دیو سے متعلق کوئی بھی دعویٰ اہمیت نہیں رکھتا۔ بھارتی وزیر داخلہ کا بیان جھوٹ اور تضادات سے بھرا ہوا ہے۔ کیا یہ محض اتفاق ہے کہ مبینہ ملزم لوک سبھا میں بحث کے آغاز پر ہی مارے گئے۔

  • چین کا بڑا گروپ پاکستان میں سرمایہ کاری کا خواہشمند

    چین کا بڑا گروپ پاکستان میں سرمایہ کاری کا خواہشمند

    بیجنگ : چین کے گوو ڈونگ گروپ نے پاکستان میں ٹیلی کمیونیکیشن کے شعبے میں سرمایہ کاری پر دلچسپی کا اظہار کردیا۔

    تفصیلات کے مطابق چین کی معروف ٹیلی کمیونیکیشن کمپنی گوو ڈونگ گروپ نے پاکستان کے ٹیلی کمیونیکیشن، توانائی اور الیکٹرک گاڑیوں کے چارجنگ انفراسٹرکچر کے شعبوں میں سرمایہ کاری میں گہری دلچسپی ظاہر کی ہے۔

    یہ پیشرفت اسپیشل انویسٹمنٹ فسیلیٹیشن کونسل (SIFC) کے فعال اقدامات کے باعث ممکن ہوئی ہے، جو ملک میں غیر ملکی سرمایہ کاری کی راہ ہموار کرنے میں کلیدی کردار ادا کر رہی ہے۔

    وفاقی وزیر برائے آئی ٹی و ٹیلی کمیونیکیشن شزہ فاطمہ خواجہ نے شنگھائی میں عالمی مصنوعی ذہانت کانفرنس کے موقع پر گوو ڈونگ گروپ کے تین رکنی وفد سے ملاقات کی، جس کی قیادت گروپ کے بانی و چیئرمین لو جیے نے کی۔

    ملاقات میں پاکستان کے آئی سی ٹی (ICT)، ٹیلی کام انفراسٹرکچر، ڈیٹا سینٹرز، کلاؤڈ کمپیوٹنگ، ای وی چارجنگ اسٹیشنز، اور گرین انرجی کے شعبوں میں تعاون اور سرمایہ کاری کے امکانات پر تفصیلی تبادلہ خیال کیا گیا۔

    گوو ڈونگ گروپ کا شمار چین کی صف اول کی مواصلاتی کمپنیوں میں ہوتا ہے اور اس کی جانب سے پاکستان میں سرمایہ کاری کی دلچسپی کو پاکستان کے لیے ایک اہم پیش رفت قرار دیا جا رہا ہے، خاص طور پر ایسے وقت میں جب ملک معیشت کی بحالی کی جانب گامزن ہے۔

    وزیر آئی ٹی شزہ فاطمہ خواجہ نے چینی وفد کو اسلام آباد دورے کی دعوت دی تاکہ باہمی تعاون کو عملی شکل دی جا سکے۔

    انہوں نے یقین دلایا کہ حکومت پاکستان چینی کمپنیوں کو ہر ممکن سہولیات فراہم کرے گی اور سرمایہ کاری کے لیے سازگار ماحول یقینی بنایا جائے گا۔

    واضح رہے کہ ایس آئی ایف سی نے حالیہ مہینوں میں مختلف شعبوں میں بین الاقوامی سرمایہ کاروں کے ساتھ روابط کو فروغ دینے میں اہم کردار ادا کیا ہے، اور جدید ٹیکنالوجی، توانائی، اور ڈیجیٹل انفراسٹرکچر میں سرمایہ کاری کو قومی ترجیح قرار دیا ہے۔

    حکومت کو توقع ہے کہ گوو ڈونگ گروپ جیسے عالمی اداروں کی شمولیت پاکستان کی ٹیکنالوجی اور معیشت کو نئے عروج پر لے جائے گی۔

  • ویڈیو رپورٹ: پاکستان میں تعمیرات کے لیے پہلی بار ماحول دوست اینٹیں تیار

    ویڈیو رپورٹ: پاکستان میں تعمیرات کے لیے پہلی بار ماحول دوست اینٹیں تیار

    پاکستان میں پہلی مرتبہ ماحول دوست اینٹیں (Eco Bricks) بنانے کا سلسلہ شروع ہو گیا ہے۔ سیمنٹ، ریت اور بجری میں 15 سے 20 فی صد پلاسٹک استعمال کر کے ’ایکو برکس‘ تیار کی جا رہی ہیں۔ ان اینٹوں کو فرش اور بیرونی چار دیواری میں استعمال کیا جا سکتا ہے۔

    مٹی کے ذریعے بھٹوں میں تیار کی جانے والی اینٹوں کا زمانہ ہو گیا پرانا، اب لاہور میں بجری ریت اور سیمنٹ کے ساتھ ساتھ پلاسٹک ویسٹ کو مکس کر کے ماحول دوست اینٹیں بنائی جا رہی ہیں، جو گھروں کے فرش اور بیرونی چار دیواری میں استعمال کی جا سکیں گی۔

    افتتاحی تقریب میں موجود وفاقی وزیر ماحولیات شذرہ منصب علی خان کہتی ہیں کہ پاکستان کو پلاسٹک ویسٹ فری بنانے کے لیے ایکو برکس ایک اچھا قدم ہے۔ پاکستان میں سالانہ 39 لاکھ ٹن کوڑا پیدا کیا جاتا ہے، ایکو برکس جیسے منصوبوں سے ماحول کے لیے انتہائی خطرناک میٹریل کو مثبت انداز میں استعمال کیا جا سکے گا۔

    کیا ساجد مسیح مسلمان ہو گیا تھا؟ ویڈیو رپورٹ دیکھیں

  • پاکستان کا جدید ریموٹ سینسنگ سیٹلائٹ لانچ کرنے کی تیاریاں مکمل

    پاکستان کا جدید ریموٹ سینسنگ سیٹلائٹ لانچ کرنے کی تیاریاں مکمل

    اسلام آباد : چین سے پاکستان کا جدید ریموٹ سینسنگ سیٹلائٹ لانچ کرنے کی تیاریاں مکمل کرلی گئی ہیں، سیٹلائٹ قومی سطح پر مختلف شعبوں کی معاونت فراہم کرے گا۔

    تفصیلات کے مطابق پاکستان کا جدید ریموٹ سینسنگ سیٹلائٹ کل چین سے لانچ کیا جائے گا، چین کے شیچانگ سیٹلائٹ لانچ سینٹر میں تیاریاں مکمل کرلی گئی ہیں۔

    پاکستان کے خلائی ادارے سپارکو کے سائنسدان بھی لانچ سینٹر میں موجود ہوں گے، یہ تاریخی مشن پاکستان کے خلائی ٹیکنالوجی کے سفر میں ایک اہم پیش رفت ہے، جو زمین کے مشاہدے کی صلاحیتوں میں نمایاں اضافہ کرے گا۔

    سیٹلائٹ قومی سطح پر مختلف شعبوں کی معاونت کرتے ہوئے ایگریکلچر، شہری منصوبہ بندی، ماحولیاتی مانیٹرنگ اور آفات سمیت سیلاب، زلزلے، لینڈ سلائیڈنگ ، گلیشیئرز کے پگھلنے اور جنگلات کی کٹائی کے اثرات کی پیش گوئی اور ان میں کمی کے لیے اہم کردار ادا کرے گا۔

    یہ سیٹلائٹ جغرافیائی خطرات کی نشان دہی کر کے سی پیک جیسی قومی ترقیاتی پہلوؤں کو بھی سپورٹ کرے گا. پاکستان کی پہلے ہی پانچ سیٹلائٹ خلا میں موجود ہیں۔

  • پاکستان میں مون سون کا نیا اسپیل ، شدید بارشوں کی پیش گوئی

    پاکستان میں مون سون کا نیا اسپیل ، شدید بارشوں کی پیش گوئی

    لاہور : محکمہ موسمیات نے مون سون کے نئے اسپیل میں شدید بارشوں کی پیش گوئی کرتے ہوئے متعلقہ اداروں کے لئے الرٹ جاری کردیا۔

    تفصیلات کے مطابق مون سون کے نئے سسٹم کے زیراثر پنجاب ، خیبرپختونخوا اور کشمیر کے مختلف علاقوں میں بادل برسنے لگے۔

    ڈی ایم اے پنجاب نے مزید بارشوں کا الرٹ جاری کردیا اور کہا آئندہ 24 گھنٹے میں لاہور، قصور، شیخوپورہ اور سیالکوٹ میں شدید بارش متوقع ہیں۔

    حکام کا کہنا تھا کہ بارشوں کے باعث لاہور، راولپنڈی اور گجرانوالہ میں اربن فلڈنگ کاخدشہ ہے تاہم بارشوں کا سلسلہ 31 جولائی تک جاری رہ سکتا ہے۔

    موسم سے متعلق خبریں

    متعلقہ محکموں کی جانب سے حفاظتی انتظامات کا سلسلہ جاری ہے اور نشیبی علاقوں میں مشینری پہنچا دی گئی ہےجبکہ عوام کو زیادہ بارش والےعلاقوں میں محدود نقل حمل کی اپیل کی گئی ہے

    خیال رہے رات گئے اسلام آباد،راولپنڈی، صوابی،ہنگو،نوشہرہ اورمردان میں موسلا دھاربارش کا سلسلہ جاری رہا ، جس سے نشیبی علاقے زیرآب آگئے، جس کے بعد رین ایمرجنسی نافذ کردی گئی۔

    راولپنڈی نالہ لئی میں کٹاریاں کے مقام پر پانی کی سطح ساڑھے چودہ فٹ جبکہ گوالمنڈی کے مقام پر ساڑھے بارہ فٹ ہوگئی۔

    واسا نے ہائی الرٹ جاری کرتے ہوئے رین ایمرجنسی نافذ کردی ہے، گجرات میں بھی موسلادھاربارش ہوئی، نشیبی علاقے زیرآب آگئے۔

    وزیرآباد میں تیزہواؤں کےساتھ بارش نےجل تھل ایک کردیا جبکہ ڈسکہ، حافظ آباد، قائد آباد اورپنڈی بھٹیاں میں بادل برسے۔ کئی علاقوں میں فیڈرٹرپ ہونے سے بجلی معطل ہوگئی۔

    بلوچستان میں بھی کہیں کہیں تیزبارش ہوسکتی ہے جبکہ سندھ کے ساحلی علاقوں میں مطلع ابر آلود رہنے اورکہیں کہیں ہلکی بارش یا بونداباندی کا امکان ہے۔