اسلام آباد: پاکستان اور آئی ایم ایف کے درمیان معاہدے پر دستخط آج متوقع ہیں، آئندہ مالی سال کے لیے مالی خسارہ 11 ارب ڈالر رہے گا۔
تفصیلات کے مطابق پاکستان اور آئی ایم ایف کے درمیان معاہدے پر دستخط آج ہونے کا امکان ہے، آئندہ مالی سال کے لیے مالی خسارہ 11 ارب ڈالر رہے گا، شرح سود 200 بیسز پوائنٹ تک بڑھا دی جائے گی۔
رپورٹ کے مطابق آئندہ سال کرنٹ اکاؤنٹ خسارہ 8 ارب ڈالر رہے گا، آئندہ بجٹ میں 350 ارب روپے کی سبسڈی ختم کردی جائیں گی۔
ذرائع کا کہنا ہے کہ بجلی اور گیس کی قیمتوں میں اضافہ کیا جائے گا، نیپرا اور اوگرا نرخوں کے تعین میں آزاد ہوں گے۔
خیال رہے کہ پاکستان اور آئی ایم ایف حکام کے درمیان تکنیکی سطح کے مذاکرات جاری ہیں۔ آئی ایم ایف مشن کی سربراہی ارنستو ریگو کر رہے ہیں۔ پہلے مرحلے میں تکنیکی سطح کے مذکرات کی قیادت حکومت پاکستان کی جانب سے سیکریٹری وزارت خزانہ ڈاکٹر عبدالحفیظ شیخ کر رہے ہیں۔
مزید پڑھیں: پاکستان نے آئی ایم ایف کو ایمنسٹی اسکیم پر راضی کرلیا
تکینکی مذاکرات میں آئی ایم ایف سے محصولات، ایکسچینج ریٹ، شرح سود، بجلی اور گیس کی قیمتوں پر بات چیت ہوئی۔ آئی ایم ایف کو پاور سیکٹر کے ساتھ سوشل سیفٹی نیٹ پر بریفنگ دی گئی۔
آئی ایم ایف کو حکومت کی جانب سے سرکلر ڈیٹ کم کرنے، بجلی و گیس کے نرخ بڑھانے کے لیے حکمت عملی کا بھی بتایا گیا۔ آئی ایم ایف نے نئے مالی سال سے بھرپور ٹیکس اصلاحات پر زور دیا ہے اور کہا ہے کہ آئی ایم ایف کم از کم چھ سو ارب روپے کے نئے ٹیکسوں کا نفاذ چاہتا ہے۔
آئی ایم ایف وفد نے بجلی اور گیس کے نرخوں میں بھی اضافہ تجویز کیا ہے جبکہ نقصان میں چلنے والے قومی اداروں کی تنظیم نو اور نجکاری بھی آئی ایم ایف کے مطالبات میں شامل ہے۔