Tag: پاکستان اور روس

اسلام آباد : پاکستان اور روس نے پاکستان اسٹیل ملز کو جدید بنانے کا فیصلہ کرلیا، معاون خصوصی ہارون اختر خان کا کہنا ہے کہ اسٹیل ملز کی جدید کاری سے روزگار اور صنعتی پیداوار میں اضافے کی توقع ہے۔

تفصیلات کے مطابق معاون خصوصی برائے صنعت و پیداوار ہارون اخترکی قیادت میں وفد دورہ روس پر ہے۔

پاکستان اور روس نے کراچی میں پاکستان اسٹیل ملز کی بحالی کے لیے پروٹوکول پر دستخط کر دیے اور پاکستان اسٹیل ملز کو جدید بنانے کا فیصلہ کیا گیا۔

پاکستان اسٹیل مل کی بحالی کے لیے روس کے ساتھ شراکت داری سے نئی صنعتی تاریخ رقم ہوگی۔

پاکستان کے سیکریٹری صنعت و پیداوار سیف انجم اور روس کے وادیم ویلیچکو نے معاہدے پر دستخط کیے۔

مزید پڑھیں : پاکستان اور روس کا کراچی میں ایک نئی اسٹیل مل قائم کرنے پر اتفاق

اس موقع پر معاون خصوصی ہارون اختر خان نے کہا کہ 1971 میں سوویت تعاون سے قائم پاکستان اسٹیل ملز ایک بار پھر روس کے ساتھ بحال ہوگا۔

ہارون اختر خان کا کہنا تھا کہ پاکستان اسٹیل مل کی بحالی وزیراعظم شہباز شریف کے وژن کی عکاسی کرتی ہے، وزیراعظم شہباز شریف کے صنعتی ترقی کے وژن سے پاکستان اسٹیل مل کو بحال کیا جائے گا۔

انھوں نے کہا کہ روس کے ساتھ معاہدہ اسٹیل مل کی ترقی اور صنعتی مستقبل کے لیے سنگ میل ہے، اسٹیل مل کی جدید کاری سے روزگار اور صنعتی پیداوار میں اضافے کی توقع ہے۔

اسلام آباد : پاکستان اور روس کے درمیان بڑے معاہدے پر دستخط ہوگئے، جس کا مقصد بین الاقوامی کارگو ٹرانسپورٹ کو فروغ دینا اور سہولت فراہم کرنا ہے۔

تفصیلات کے مطابق پاکستان اور  روس کے درمیان ایس پی آئی ای ایف میں ریلوے میں تعاون کے معاہدے پر دستخط ہوگئے۔

27ویں سینٹ پیٹرزبرگ انٹرنیشنل اکنامک فورم کے موقع پرپاکستان اور روس نے 7 جون 2024 کو ریلوے کے شعبے میں تعاون کے حوالے سے مفاہمت کی ایک یادداشت پر دستخط کیے۔

دونوں ممالک کا مقصد ریلوے کی اپ گریڈیشن کے منصوبوں اور اس اہم شعبے کے جدید خطوط پر استوار کرنا ہے۔

اس ایم او یو کے تحت اس شعبے میں کام کرنے والی متعلقہ کمپنیوں کے درمیان مستقبل میں تعاون بھی ہوگا، اس کا مقصد بین الاقوامی کارگو ٹرانسپورٹ کو فروغ دینا اور سہولت فراہم کرنا ہے۔

پاکستان کی طرف سے سفیر محمد خالد جمالی اور روس کی طرف سے ڈپٹی ٹرانسپورٹ منسٹر مسٹر ڈی ایس زیویریف نے دستخط کئے۔

اسلام آباد : پاکستان اور روس کے درمیان پہلی بار براہ راست کارگو سروس کا آغاز ہوگیا، جو دونوں ممالک کے درمیان دو طرفہ تجارت میں تبدیلی کا اشارہ دے رہی ہے۔

تفصیلات کے مطابق ملکی تاریخ میں پہلی بار روس کیساتھ سمندری راستے سے براہ راست کارگو سروس کا آغاز ہوگیا، سمندری راستے سے تجارت کے آغاز پر نجی ہوٹل میں تقریب کا انعقاد کیا گیا، روسی حکام اور وزیر مملکت پیٹرولیم مصدق ملک تقریب میں موجود تھے۔

وفاقی وزیر توانائی انجینئر خرم دستگیر خان نے تقریب سے خطاب کرتے ہوئے کہا کہ پاکستان اور روس کے تجارتی تعلقات بہترہو رہے ہیں،دونوں ممالک کے درمیان تجارت میں نمایاں اضافہ ہوا ہے۔

خرم دستگیر کا کہنا تھا کہ روس کی معیشت جی ڈی پی کے لحاظ سے پاکستان سے 5گنا بڑی ہے، ہم ایک جامع آزاد تجارتی معاہدے کی تلاش کر رہے ہیں اور ٹیرف کوکم کررہے ہیں تاکہ زیادہ سے زیادہ سرمایہ کاری کوفروغ دی جا سکے۔

وفاقی وزیر نے مزید کہا کہ دو طرفہ تجارت کو 20 بلین ڈالر تک بڑھانے کی صلاحیت کے ساتھ کاروبار کے بے پناہ مواقع موجود ہیں۔

ماہرین کا کہنا ہے کہ کہ شپنگ سروس کے آغاز سے دونوں ممالک کے درمیان تجارتی تعلقات کو نئی شکل ملے گی۔

براہ راست کارگو سروس شپنگ کے وقت کو ایک ماہ سے 18 دن تک کم کر دے گی، پہلا جہاز آج کراچی پہنچے گا جبکہ دوسرا براہ راست جہاز 29 مئی تک بندرگاہ پر پہنچے گا۔

اس وقت روس کو پاکستان کی برآمدات 150 ملین امریکی ڈالر ہیں جبکہ درآمدات 300 ملین ڈالر کے لگ بھگ ہیں۔ تاہم، اس براہ راست شپنگ سروس کے نفاذ سے آنے والے برسوں میں روس کو پاکستانی برآمدات میں 2.5 بلین ڈالر کا اضافہ متوقع ہے۔