Tag: پاکستان بار کونسل

  • کل ملک گیر ہڑتال کا اعلان

    کل ملک گیر ہڑتال کا اعلان

    اسلام آباد: پاک فوج سے یکجہتی کیلئے کل ملک گیر ہڑتال کا اعلان کردیا گیا ، ملک بھر میں وکلا برداری ریلیاں نکالے گی۔

    تفصیلات کے مطابق پاکستان بار کونسل نے پاک فوج سے یکجہتی کیلئے کل ملک گیر ہڑتال کا اعلان کرتے ہوئے کہا شہداکےاہلخانہ اورزخمیوں سےمکمل یکجہتی کرتےہیں، بارایسوسی ایشنزقراردادیں منظور کرے گی۔

    پاکستان بارکونسل کا کہنا تھا کہ ملک بھر میں وکلا برداری ریلیاں نکالے گی، بھارتی حملےکی مذمت کرتےہیں،اقوام متحدہ نوٹس لے۔

    دوسری جانب بھارتی غرور خاک میں ملانے پر پاکستانی عوام کا مسلح افواج کو خراج تحسین۔ ملک بھر میں اطہار یکجہتی کیلئے ریلیاں نکالی جارہی ہیں، شرکا کا کہنا ہے بھارت نے پھر جارحیت کی تو کرارا جواب ملے گا۔

    ملتان میں محکمہ صحت و بہودآبادی اور اسپیشلائزڈ ہیلتھ نے بھارتی جارحیت کے خلاف اور پاک افواج کی حمایت میں ریلی نکالی۔

    پیرمحل، محسن وال، ساہیوال ميں بھارتی جارحیت کے خلاف شہری سڑکوں پر نکلے جبکہ روجھان اورجہانیاں میں بھی پاک فوج سے اظہار یکجہتی کیلئے ریلیاں نکالی گئیں۔

    نواب شاہ میں چیئرمین تعلیمی بورڈ کی سربراہی میں پاک فوج کی حمایت میں ریلی نکالی گئی جبکہ سبی اورچمن ميں بھارتی جارحیت کے خلاف احتجاجی مظاہرہ کیا گیا۔

    میرپور آزاد کشمیرمیں پاکستان زندہ باد ریلی نکالی گئی، جس میں فوج زندہ باد پاکستان زندہ باد کے فلک شگاف نعروں سے فضا گونج اٹھی۔

  • پاکستان بار کونسل کا خفیہ انداز میں مجوزہ آئینی ترمیم پیش کرنے پر اظہار تشویش

    پاکستان بار کونسل کا خفیہ انداز میں مجوزہ آئینی ترمیم پیش کرنے پر اظہار تشویش

    اسلام آباد : پاکستان بار کونسل نے حکومت کی جانب سے خفیہ انداز میں مجوزہ آئینی ترمیم متعارف کرانے پر تشویش کا اظہار کیا ہے، بیان میں اراکین نے شدید نکتہ چینی کی۔

    پاکستان بار کونسل کے 6 ارکان نے اپنے بیان میں کہا ہے کہ مجوزہ ترامیم آئین کے بنیادی ڈھانچے کی خلاف ورزی ہے، ان کامقصد عدلیہ کی آزادی کو سلب کرنا ہے۔

    پاکستان بارکونسل ارکان نے کہا کہ مذکورہ ترامیم قانون کی حکمرانی کے خلاف ہیں، ترامیم بغیر کسی بحث کے آئین کو ختم کرنے کی بنیاد پر کی جارہی ہیں۔

    ان کا کہنا ہے کہ یہ پوری مشق ربڑ اسٹیمپنگ کی مشق معلوم ہوتی ہے، غلط مقاصد کے لیے ایک متبادل عدالتی نظام بنانے کے لیےمشق کی جارہی ہے۔

    پی بی سے کے چھ اراکین نے اپنے جاری بیان میں مزید کہا ہے کہ اعلیٰ عدالتوں کے ججوں، اور وکلاء سمیت قانونی برادری کو اس موقع پر متحد ہونا چاہیے۔

    مذکورہ چھ ارکان میں محمود چوہان، عابد شاہد زبیری، اشتیاق اے خان، شہاب سرکی، طاہرفراز اور منیر کاکڑ شامل ہیں۔

  • انتخابی عمل ساکھ کھو چکا، چیف الیکشن کمشنر کا استعفیٰ بحران ٹال سکتا تھا: پاکستان بار کونسل

    انتخابی عمل ساکھ کھو چکا، چیف الیکشن کمشنر کا استعفیٰ بحران ٹال سکتا تھا: پاکستان بار کونسل

    اسلام آباد: پاکستان بار کونسل نے ایک اعلامیے میں کمشنر راولپنڈی کے الزامات کی مکمل تحقیقات کی ضرورت پر زور دیتے ہوئے کہا ہے کہ انتخابی عمل ساکھ کھو چکا ہے۔

    تفصیلات کے مطابق پاکستان بار کونسل کی جانب سے ایک اعلامیہ جاری کیا گیا ہے، جس میں کہا گیا ہے کہ انتخابی عمل شفافیت اور نتائج کے ساتھ ساکھ بھی کھو چکا ہے، کمشنر راولپنڈی کے الزامات نے انتخابی عمل سے متعلق خدشات کو بڑھا دیا ہے، الزامات کی مکمل تحقیقات ضروری ہیں۔

    کونسل کا کہنا ہے کہ چیف الیکشن کمشنر کا استعفیٰ موجودہ بحران کو ٹال سکتا تھا، سیاسی جماعتوں کی جانب سے چیف الیکشن کمشنر پر خدشات کو بھی نظر انداز کیا گیا، جس کے نتیجے میں موجودہ سیاسی بحران میں اضافہ ہوا، تمام اسٹیک ہولڈرز انتخابی عمل میں اعتماد کی بحالی کو ترجیح دیں۔

    راولپنڈی ڈویژن میں انتخابی دھاندلی کی ذمہ داری قبول کرتا ہوں، کمشنر

    اعلامیے میں کہا گیا ہے کہ پاکستان بار کونسل آزاد امیدواروں پر جبر کی بھی مذمت کرتی ہے، ہر آزاد امیدوار کو وابستگی کا انتخاب کرنے کی آزادی ہونی چاہیے، پاکستان کے استحکام اور ترقی کے لیے جمہوری اصولوں کو برقرار رکھنے کا عزم کیا جائے۔

    بار کونسل نے کہا چیف الیکشن کمشنر نے انتخابی عمل کو تہہ و بالا کر دیا تو انصاف کا مطالبہ مذاق کے مترادف ہے، بار کونسل کے جاری اعلامیہ میں سلمان اکرم راجہ اور فواد چوہدری کی گرفتاری کی بھی مذمت کی گئی ہے۔

  • 22 مئی کو ملک گیر ہڑتال کا اعلان

    22 مئی کو ملک گیر ہڑتال کا اعلان

    اسلام آباد : پاکستان بار کونسل نے جی 20 ممالک اجلاس کے بھارتی حکومت کے فیصلے کی مذمت کرتے ہوئے 22 مئی کو ملک گیر ہڑتال کا اعلان کردیا۔

    تفصیلات کے مطابق پاکستان بار کونسل نے 22 مئی کو جی20ممالک اجلاس کیخلاف ملک گیر ہڑتال کا اعلان کردیا۔

    پاکستان بارکونسل کی جانب سے اعلامیے میں کہا گیا کہ بھارت جی20ممالک کا اجلاس مقبوضہ کشمیرمیں منعقد کررہاہے، پاکستان بار کونسل کی جی 20 ممالک اجلاس کےبھارتی حکومت کے فیصلے کی مذمت کرتا ہے۔

    اعلامیے میں کہنا تھا کہ یہ عمل سلامتی کونسل کی قراردادوں،بین الاقوامی قانون کی خلاف ورزی ہے،سرینگر بھارتی قبضے کے خلاف کشمیری جنگجوؤں کی بغاوت کا مرکز رہا ہے، اس طرح کے واقعات جموں و کشمیر کی حقیقت کو چھپا نہیں سکتے۔

    پاکستان بار کونسل نے مزید کہا کہ مقبوضہ کشمیر بین الاقوامی سطح پر تسلیم شدہ تنازعہ ہے، کئی دہائیوں سےاقوام متحدہ کی سلامتی کونسل کےایجنڈےپرموجودہے، اس طرح کی سرگرمیاں حقیقت کو نہیں بدل سکتیں۔

  • پاکستان بار کونسل کے 7 ارکان نے یوم سیاہ سے اعلان لاتعلقی کر دیا

    پاکستان بار کونسل کے 7 ارکان نے یوم سیاہ سے اعلان لاتعلقی کر دیا

    اسلام آباد: پاکستان بار کونسل کے 7 ارکان نے یوم سیاہ سے اعلان لاتعلقی کر دیا۔

    تفصیلات کے مطابق ممبران پاکستان بار کونسل نے یوم سیاہ سے اعلان لا تعلقی کرتے ہوئے اعلامیہ جاری کیا ہے کہ وہ نام نہاد یوم سیاہ کو مسترد کرتے ہیں اور ان کے مؤقف میں یہ چند ممبران کا اقلیتی فیصلہ ہے۔

    ممبران نے مشترکہ اعلامیہ میں کہا کہ یوم سیاہ کے فیصلے کو ملک بھر کے وکلانے مسترد کیا ہے، سیاسی طاقتیں سپریم کورٹ کے احکامات کو من و عن تسلیم کریں، ہم یوم سیاہ کو آئین کی بالادستی اور عدلیہ کی آزادی پر حملہ تصور کرتے ہیں۔

    اعلامیہ کے مطابق ممبران نے کہا کہ وہ چیف جسٹس کی سربراہی میں سپریم کورٹ کے ساتھ کھڑے ہیں، اور حکومتی ایما پر سپریم کورٹ کے خلاف سازش کا جواب دیں گے۔

    انھوں نے کہا کچھ ممبران کے نمائندہ کانفرنس اور مشترکہ اعلامیے کی بھی شدید مذمت کی جاتی ہے، یہ اعلامیہ بدنیتی پر مبنی ہے جس کا مقصد عدلیہ کی آزادی کو نقصان پہنچانا ہے۔

    ممبران پاکستان بار کونسل کا کہنا تھا کہ مذکورہ اعلامیہ آئین سے انحراف اور توہین آمیز ہے، نیز سپریم کورٹ رولز اینڈ پروسیسجر بل آئین اور عدلیہ کی آزادی کے خلاف ہے۔

  • پاکستان بار کونسل کے رکن چوہدری حفیظ کا ساتھیوں سمیت پی ٹی آئی میں شمولیت کا اعلان

    پاکستان بار کونسل کے رکن چوہدری حفیظ کا ساتھیوں سمیت پی ٹی آئی میں شمولیت کا اعلان

    اسلام آباد: پاکستان بار کونسل کے رکن چوہدری حفیظ الرحمان نے ساتھیوں سمیت پی ٹی آئی میں شمولیت کا اعلان کر دیا۔

    تفصیلات کے مطابق چیئرمین تحریک انصاف عمران خان سے زمان پارک میں وکلا کے ایک وفد نے ملاقات کی، جس میں اراکین پنجاب بارکونسل اویس قاضی، اقبال موہل، سابق رکن پنجاب بار کونسل میاں فیض اللہ شامل، سابق صدر لاہور بار سید محمد شاہ اور نائب صدر سپریم کورٹ بار ایسوسی ایشن ارشد باجوہ شامل تھے۔

    پی ٹی آئی میں شمولیت اختیار کرنے والے وکلا میں سپریم کورٹ بار ایسوسی ایشن کے ایگزیکٹو رکن عارف محمود چوہدری، لاہور بار کے نائب صدور میاں عصمت اللہ اور محمد حیات سندھو، عارف اعوان، طاہر امین چوہدری، زاہد نواز چیمہ، نورالمصطفیٰ، مبین عارف چوہدری، حسیب عارف چوہدری اور فصیح الرحمان بھی شامل تھے۔

    وکلا نے عدلیہ کی آزادی اور جمہوریت کے تحفظ و استحکام کے حوالے سے عمران خان کے مؤقف کی مکمل تائید کا اعلان کیا، جب کہ حکمران اتحاد کی جانب سے عدلیہ پر حملوں اور دستور سے انحراف کی شدید مذمت کی گئی۔

    وکلا نے آرٹیکل 224 کے تحت پنجاب، کے پی میں 90 روز میں انتخابات کے انعقاد کا آئینی تقاضا پورا کرنے کا مطالبہ کیا، اور سپریم کورٹ کی جانب سے آئین کے مذکورہ آرٹیکل کی تشریح کی بھی مکمل توثیق کا اعلان کیا۔

    وکلا کے وفد کا کہنا تھا کہ دستور اور عدلیہ کے خلاف سازشیں اور حملے کرنے والوں کو ہرگز اجازت نہیں دیں گے، عدلیہ کے بازو مروڑنے کی کوششیں ترک نہ کی گئیں تو 2007 سے بڑی تحریک برپا کریں گے۔

    وکلا نے کہا کہ آئین پر حملہ کرنے والوں کا علاج آرٹیکل 6 کی صورت میں خود آئین تجویز کرتا ہے، معزز سپریم کورٹ دستور کی حفاظت کا آئینی فریضہ بلاخوف سرانجام دے۔

    وکلا کا کہنا تھا کہ دھونس اور سازش پر آمادہ گروہ سے وکلا اور قوم نمٹ لیں گے، جمہوریت کے استحکام و فروغ اور دستور کی بالادستی کے لیے عمران خان کے ایجنڈے کی تائید کرتے ہیں۔

    دوسری طرف عمران خان نے چوہدری حفیظ الرحمان کی ساتھیوں سمیت تحریک انصاف میں شمولیت کا خیر مقدم کیا۔

  • وکلا ایکشن کمیٹی کا پاکستان بار کونسل سے 14 جون کی ہڑتال کی کال واپس لینے کا مطالبہ

    وکلا ایکشن کمیٹی کا پاکستان بار کونسل سے 14 جون کی ہڑتال کی کال واپس لینے کا مطالبہ

    کراچی: شہر قائد میں وکلا ایکشن کمیٹی نے پاکستان بار کونسل سے 14 جون کی ہڑتال کی کال واپس لینے کا مطالبہ کردیا۔

    تفصیلات کے مطابق آل پاکستان وکلا ایکشن کمیٹی سندھ کے رہنماؤں نے پریس کانفرنس کرتے ہوئے کہا کہ احتساب سب کے لیے ہے، آج 5 ججز کے ہاتھ میں ملک کی تقدیر کا فیصلہ ہے، احتساب سب کا ہوگا کوئی نہیں بچ سکتا، تمام ججز سمیت سب کا احتساب ہونا چاہئے۔

    وکلا ایکشن کمیٹی کے رہنماؤں نے کہا کہ جسٹس قاضی فائز عیسیٰ کے خلاف ریفرنس فائل ہوا ہے اس کی حمایت کرتے ہیں، چیف جسٹس سپریم کورٹ سے درخواست ہے ریفرنس کو چلنے دیں۔

    انہوں نے کہا کہ تمام ججز اور لفافہ وکلا کے خلاف ریفرنس فائل ہونے چاہئیں، ریفرنس کی سماعت خفیہ ہوتی ہے لیکن اس کو پبلک کردیا گیا ہے، سپریم کورٹ آئین اور قانون کے مطابق چلتی ہے، امید ہے سپریم کورٹ کوئی بھی فیصلہ انصاف پر مبنی کرے گی۔

    مزید پڑھیں: جسٹس قاضی فائز عیسیٰ کو حکومت نہیں ہٹاسکتی، جسٹس آصف سعید کھوسہ

    وکلا ایکشن کمیٹی کے رہنماؤں نے کہا کہ ہم بھی ووٹ کرتے ہیں، پاکستان بار کونسل ہم سے بھی مشاورت کرلیا کرے، آئین کے مطابق جس کی اہلیہ دہری شہریت رکھتی ہو وہ کوئی عوامی عہدہ نہیں رکھ سکتا ہے۔

    انہوں نے کہا کہ ججز نے ہی دہری شہریت سے متعلق فیصلہ دیا تھا، ججز دہری شہریت کے اپنے ہی فیصلے پر عمل تو کرائیں، مطالبہ کرتے ہیں جتنے بھی ججز ہیں سب کا احتساب ہونا چاہئے۔

    وکلا ایکشن کمیٹی کے رہنماؤں نے یہا کہ ججز کوئی مقدس گائے نہیں، یہ کیا طریقہ ہے وکیل کو پکڑو اور جج کو نہیں پکڑو۔

    انہوں نے کہا کہ وکلا برادری میں ہمیشہ جمہوری تسلسل رہا ہے، جمہوری تسلسل کا مطلب یہ نہیں ہزاروں وکلا کی تقدیر کے مالک بن جائیں، یہ کسی صورت قبول نہیں من مانی کو وکلا کے سر تھوپا جائے، وکلا کی بڑی تعداد کا یکسر نظر انداز کرکے مرضی کا احتجاج نہیں کرایا جاسکتا ہے۔

  • پاکستان بار کونسل کا پی ٹی ایم ارکان کے خلاف سخت کارروائی کا مطالبہ

    پاکستان بار کونسل کا پی ٹی ایم ارکان کے خلاف سخت کارروائی کا مطالبہ

    اسلام آباد : پاکستان بار کونسل نے ملک مخالف پی ٹی ایم ارکان کی غیرآئینی سرگرمیوں کی شدید مذمت کرتے ہوئے اس خلاف سخت قانونی کارروائی کا مطالبہ کیا ہے۔

    تفصیلات کے مطابق پاکستان بار کونسل نے بعض پی ٹی ایم ارکان محسن داوڑ، علی وزیر، گلالئی اسماعیل و دیگر کی ریاست مخالف غیر آئینی سرگرمیوں کی مذمت کی ہے۔

    میڈیا سے گفتگو کرتے ہوئے وائس چیئرمین سید امجد شاہ کا کہنا تھا کہ پی ٹی ایم کے کچھ ممبران اداروں کیخلاف نفرت پھیلارہے ہیں، علیحدگی کی باتیں غداری کےمترادف ہیں۔

    ایسےعوامل کیخلاف حکومت سخت کارروائی کرے، انہوں نے کہا کہ کچھ پی ٹی ایم ارکان علیحدگی کیلئےکھلے عام مہم پر لگے ہیں، کسی شخص یا گروپ کا مطالبہ آئینی ہے تو پورا ہونا چاہیے، حکومت نے کسی سطح پر بھی پی ٹی ایم کے جائز مطالبات کو نظر انداز نہیں کیا۔

    محسن داوڑ، علی وزیر ودیگرکی گفتگو سےایجنڈا واضح ہوناشروع ہو گیا ہے، پی ٹی ایم ارکان نے افغانستان کی بولی کھل کر بولنا شروع کر دی ہے، حکومت پی ٹی ایم کے ایسے عناصر کیخلاف سخت قانونی کارروائی کرے۔

    مزید پڑھیں: رکنِ قومی اسمبلی محسن داوڑ تمام اخلاقی حدیں پار کرگیا

    واضح رہے کہ پی ٹی ایم کا رکنِ قومی اسمبلی محسن داوڑ گزشتہ روز افغانستان کی محبت میں تمام اخلاقی حدیں عبور کرگیا تھا سماجی رابطے کی ویب سائٹ ٹوئٹر پر اس کا کہنا تھا کہ جغرافیہ بدلتاہے، قومیں نہیں بدلتیں، میں افغان تھا، افغان ہوں اور افغان رہوں گا، محسن داوڑ کے متنازع ٹویٹ پر صارفین نے کڑی تنقید کا نشانہ بنایا اور سوالات کیے۔

  • اویس شاہ کا اغوا: پاکستان بار کونسل کا عدالتیں بند رکھنے کا اعلان

    اویس شاہ کا اغوا: پاکستان بار کونسل کا عدالتیں بند رکھنے کا اعلان

    کراچی: پاکستان بار کونسل نے اویس شاہ کے اغوا کے خلاف کل ملک بھر میں عدالتی کارروائیاں بند رکھنے کا اعلان کردیا۔

    تفصیلات کے مطابق پاکستان بار کونسل نے چیف جسٹس سندھ ہائی کورٹ کے بیٹے اویس شاہ کے اغوا کے خلاف کل ملک بھر میں ہڑتال کا اعلان کیا ہے اور مطالبہ کیا ہے کہ حکومت اویس شاہ کی محفوظ بازیابی جلد از جلد یقینی بنائے۔

    وائس چیئرمین پاکستان بار کونسل فروغ نسیم کا کہنا ہے کہ وکلا عدالتوں کا بائیکاٹ کریں گے اس لیے کہ چیف جسٹس سندھ ہائی کورٹ کے بیٹے کا اغوا انتہائی تشویش ناک ہے اور کئی دن گزرنے کے باوجود تاحال بازیاب نہیں کرایا جاسکا۔

    انہوں نے مطالبہ کیا کہ آئی جی سندھ پولیس چیف جسٹس کے بیٹے کی جلد از جلد بازیابی کو یقینی بنائیں۔

    واضح رہے کہ کئی دن گزرنے کے باوجود، رینجرز، پولیس، سی ٹی ڈی اور دیگر خفیہ ادارے مل کر اور علیحدہ علیحدہ اویس شاہ کی بازیابی کےلیے چھاپے مار رہے ہیں، گرفتاریاں بھی ہوئیں لیکن تاحال اویس شاہ کا کوئی پتا نہ مل سکا۔ وزیراعلیٰ سندھ نے اویس شاہ کی بازیابی پر انعامی رقم بڑھا کر 25سے ایک کروڑ روپے کردی ہے۔

  • پاکستان بار کونسل کی جانب سے ہڑتال کا اعلان

    پاکستان بار کونسل کی جانب سے ہڑتال کا اعلان

    اسلام آباد:  مظاہرین اور صحافیوں پر پولیس وحشیانہ تشدد کے خلاف ملک بھرکی عدالتوں میں پاکستان بار کونسل کی جانب سے ہڑتال کی جارہی ہے ۔

    اسلام آباد میں عوام اور میڈیا پر تشدد کے خلاف پاکستان بار کونسل کی جانب سے ٓآج ہڑتال کی جارہی ہے، پاکستان بار کونسل کے مطابق ملک بھر کے وکلاء آج احتجاجا عدالتوں میں پیش نہیں ہونگے ۔

    کراچی میں اعلی اور ماتحت عدالتوں میں وکلا کی جانب سے عدالتی کارروائی کا بائیکاٹ جاری ہے، وکلا کے بائیکاٹ کے باعث مقدمات کی سماعت ملتوی ہوگئی، کوئٹہ میں اے آر وائی نیوز کے اسائمنٹ ایڈیٹر ارشاد مستوئی کے قتل اور اسلام آباد میں صحافیوں پر پولیس تشددکے خلاف وکلاء عدالتوں کا بائیکاٹ کر رہے ہیں، بلوچستان بار ایسوسی ایشن کی کال پر صوبے بھر میں وکلاء آج اعلیٰ اور ماتحت عدالتوں میں پیش نہیں ہورہے۔

    پاکستان بار کی اپیل پر لاہور، مانسہرہ اور دیگر شہروں میں بھی وکلاء عدالتی کارروائی کا احتجاجا بائیکاٹ کررہے ہیں، جمعرات کو ارشاد مستوئی اپنے دو ساتھیوں سمیت کوئٹہ میں اسوقت جاں بحق ہوئے، جب نامعلوم افراد نے ان کے دفتر میں گھس کر فائرنگ کردی۔