پاکستان ایشیا میں غیرقانونی تجارت سے سب سے زیادہ متاثر ہونے والا ملک ہے، جس کے سبب ملکی معیشت کو ہزاروں ارب روپے کے نقصان کا سامنا ہے۔
یہ بات پاکستان بزنس کونسل نے اپنے ایک بیان میں کہی، پی بی سی عہدیداران کے مطابق غیر قانونی تجارت کا مجموعی حجم دستاویزی اور غیر دستاویزی معیشت کا 10 فیصد ہے۔
غیر قانونی تجارت سے معیشت کو سالانہ 8 ہزار ارب روپے کا نقصان ہو رہا ہے، غیر قانونی تجارت کا حجم بڑا ہے، اسے درست کریں۔
پی بی سی عہدیداران کا کہنا ہے کہ غیرقانونی تجارت کی فنڈنگ اور معاونت جرائم پیشہ عناصر کرتے ہیں، غیرقانونی تجارت انڈر انوائسنگ، ہنڈی حوالہ، ورکرز ترسیلات اور روپے کی قدر پر اثر انداز ہوتی ہے۔
انہوں نے کہا کہ غیر قانونی تجارت کرنے والے عناصر مزدوروں کا استحصال کرتے ہیں، ماحول دشمن، غیر معیاری اور جان لیوا اشیاء بیچتے ہیں، کمزور سیاسی عزم اور ذاتی مفادات اسے قابو کرنے کی کوششوں کو روکتی ہیں، ٹیکسوں کی بلند شرح ٹیکس نہ دینے کی ترغیب دیتے ہیں۔
