اسلام آباد: پاکستان بیت المال میں بھی اربوں روپے کی مالی بے ضابطگیاں سامنے آگئیں، کروڑوں کے فنڈز سرکاری ملازمین میں بانٹ دیے گئے۔
بیت المال کی ذمہ داری غریب، مفلس، بےسہارا، بیواؤں، یتیموں اور نوجوانوں کی مدد کرنا ہے، تاہم یہاں بھی اربوں کی مالی بدعنوانی سامنے آچکی ہے، آڈیٹر جنرل کی آڈٹ رپورٹ میں انکشاف کیا گیا ہے کہ غریبوں کیلئے مختص کروڑوں کے فنڈز سرکاری ملازمین میں بانٹ دیے گئے۔
آڈٹ رپورٹ میں بتایا گیا ہے کہ مجموعی طور پر 2 ارب روپے سے زائد کے اعتراضات سامنے آگئے ہیں، غریبوں کی انفرادی مالی امداد میں سے 2 کروڑ 81 لاکھ 176 روپے سرکاری ملازمین میں تقسیم کیے گئے۔
دستاویز میں 1 ارب 37 کروڑ روپے کے سرکاری فنڈز کمرشل بینک اکاؤنٹ میں منتقل کرنے کا انکشاف بھی سامنے آیا ہے۔
آڈٹ رپورٹ میں کہا گیا ہے کہ بیت المال لاہور نے غیراستعمال شدہ 52 کروڑ واپس قومی خزانے میں جمع نہیں کرائے، 16 کروڑ 23 لاکھ روپے کے فنڈز خلاف ضابطہ خرچ کیے گئے۔
