اسلام آباد: پاکستان تحریک انصاف کے چیئرمین عمران خان نے قومی دولت کی مسلسل بیرون ملک منتقلی پر تشویش کا اظہار کیا ہے۔
عمران خان کا کہنا تھا کہ بالواسطہ ٹیکسوں میں اضافے سے عام شہری محرومی کے بوجھ تلے دب کر رہ گیا، جبکہ سرمایہ دار اور اشرافیہ ٹیکس دینے کی بجائے سرمایہ بیرون ملک منتقل کر رہے ہیں،ان کا کہنا تھا کہ زیادہ تر سرمایہ کرپشن اور کالے دھن سے بنایا جا رہا ہے۔
عمران خان نے بتایا کہ دبئی میں پاکستانیوں نے چار سو تیس ارب روپے کی جائیدادیں خرید لی ہیں، کپتان کا کہنا تھا کہ یہ رقم پاکستان میں رہتی تو آئی ایم ایف کے سامنے ہاتھ پھیلانے کی نوبت نہ آتی۔
کپتان نے آصف زرداری اور شریف برادران پر تنقید کرتے ہوئے کہا کہ ان کے بیرون ملک اکاؤنٹس سے سب واقف ہیں، امریکہ اور یورپ میں حکمرانوں کے لگژری فلیٹس اور ولاز باعث شرم ہیں۔
انہوں نے کہا کہ ن لیگ اور پیپلز پارٹی باہمی سمجھوتہ کے تحت لوٹی ہوئی دولت بچا رہے ہیں۔
