Tag: پاکستان تحریک انصاف

لاہور: پاکستان تحریک انصاف کے رہنما ہمایوں اخترخان کا کہنا ہے کہ اپوزیشن دن رات یہی دعائیں مانگ رہی ہے حکومت ناکام ہوجائے۔

تفصیلات کے مطابق تحریک انصاف کے رہنما ہمایوں اختر خان نے کہا ہے کہ حکومت معیشت کی ترقی اور خط غربت سے نیچے زندگی بسر کرنے والوں کو قومی دھارے میں شامل کرنے کے لیے ایمرجنسی کی طرز پر اقدامات اٹھا رہی ہے۔

انہوں نے کہا کہ صنعتوں سمیت دیگر شعبوں کی ترقی سے روزگار کے مواقع پیدا ہوں گے،گھروں کی تعمیر کے منصوبے سے کئی شعبے عروج حاصل کریں گے۔

ہمایوں اختر خان نے کہا کہ اپوزیشن صرف دن رات یہی دعائیں مانگ رہی ہے کہ حکومت ناکام ہوجائے تاکہ ان کی کرپشن کا کاروبار دوبارہ چل سکے۔

تحریک انصاف کے رہنما نے کہا کہ ملک کو تنزلی کی اتھاہ گہرائیوں میں دھکیلنے والے اپنے انجام کو پہنچ چکے ہیں اور انہیں اب لوٹی ہوئی دولت واپس کرنا ہو گی۔

انہوں نے کہا کہ وزیراعظم عمران خان محروم طبقات کو اپنے پاﺅں پر کھڑا کرنے کے لیے فکر مند ہیں اور خط غربت سے نیچے زندگی بسر کرنے والوں کو قومی دھارے میں شامل کرنے کے لیے چین کے ماڈل کو اپنایا جائے گا۔

ہمایوں اختر خان نے کہا کہ موجودہ حکومت نے غیرمعمولی فیصلوں سے معیشت کی گاڑی کو درست سمت میں گامزن کر دیا ہے اور وہ دن بھی آئے گا جب پاکستان کا شمار طاقتور معیشتوں میں ہوگا۔

لاہور: پاکستان تحریک انصاف کے رہنما ملک کرامت علی کھوکھر کا کہنا ہے کہ حالات کی بہتری اور صورت حال کی مثبت، یقینی وحقیقی تبدیلی تک حالات اور غیر سنجیدہ عناصر کے ساتھ جنگ جاری رہے گی۔

تفصیلات کے مطابق پاکستان تحریک انصاف کے رہنما ملک کرامت علی کھوکھر نے کہا کہ ملک وقوم کی ترقی وخوشحالی پی ٹی آئی کی عوامی حکومت کی اولین ترجیحات میں شامل ہے۔

انہوں نے کہا کہ صوبہ پنجاب میں صنعت کاری اورسرمایہ کاری کو فروغ دینے کے لیے فیکٹریوں کی انسپکشن ختم کرنے کا فیصلہ دور رس اثرات کا حامل ہوگا۔

ملک کرامت علی کھوکھر نے کہا کہ حالات کی بہتری اور صورت حال کی مثبت، یقینی وحقیقی تبدیلی تک حالات اور غیر سنجیدہ عناصر کے ساتھ جنگ جاری رہے گی، کسی بھی محاذ پر سمجھوتہ ممکن نہیں ہے۔

تحریک انصاف کے رہنما نے کہا کہ پی ٹی آئی کی حکومت سابق حکمرانوں کی بداعمالیوں کے نتیجے میں پیدا ہونے والے بحرانوں سے نبر د آزما ہے۔

اپوزیشن عوام کو مسلسل گمراہ کرنے میں مصروف ہے، کرامت علی کھوکھر

یاد رہے کہ گزشتہ ماہ تحریک انصاف کے رہنما کا کہنا تھا کہ ملکی معاشی حالات بہتری کی طرف جا رہے ہیں، اپوزیشن عوام کو مسلسل گمراہ کرنے میں مصروف ہے۔

لاہور: پاکستان تحریک انصاف کے رہنما ہمایوں اخترخان کا کہنا ہے کہ جوں جوں معیشت کی حالت سنبھلے گی اس کے ثمرات عوام تک منتقل کیے جائیں گے۔

تفصیلات کے مطابق پاکستان تحریک انصاف کے سینئر مرکزی رہنما ہمایوں اختر خان نے کہا ہے کہ موجودہ نہیں بلکہ سابقہ حکومت نے کشمیر کے مسئلے کو پس پشت ڈالا اور بیانات داغنے والے لیگی رہنما اس سے بخوبی آگاہ ہیں۔

انہوں نے کہا کہ وزیراعظم عمران خان نے جس طرح دنیا بھر میں کشمیر کے مسئلے کو اجاگر کیا ہے اس سے بھارت میں ہلچل مچی ہوئی ہے۔

ہمایوں اختر خان نے کہا کہ چیلنجز اور مشکلات کے باوجود حکومت درست سمت میں گامزن ہے۔ انہوں نے کہا کہ سابقہ حکومتوں کی پیدا کی گئی خرابیاں چند ہفتوں یا مہینوں میں درست نہیں ہوسکتیں بلکہ ان کے لیے سالوں درکار ہے۔

تحریک انصاف کے رہنما نے کہا کہ حکومت حقائق چھپانے کی بجائے کی بجائے عوام کو اصل صورت حال سے آگاہ رکھے ہوئے ہے اور مشکلات سے چھٹکارا پانے کے لیے بھی پیشرفت کی جارہی ہے۔

انہوں نے کہا کہ موجودہ حکومت کو پانچ سال کا مینڈیٹ ملا ہے اور یہ اپنی مدت پوری کرے گی، ن لیگ والے مڈٹرم انتخابات اور دوبارہ اقتدار میں آنے کے خواب دیکھنے کی بجائے اپنی لوٹ مار کا حساب دے۔

لاہور: پاکستان تحریک انصاف کے رہنما جمشید اقبال چیمہ کا کہنا ہے کہ پاکستان کشمیریوں کی سیاسی، اخلاقی اور سفارتی حمایت میں کسی لمحے غفلت کا مظاہرہ نہیں کرے گا۔

تفصیلات کے مطابق تحریک انصاف کے مرکزی رہنما جمشید اقبال چیمہ نے کہا ہے کہ کشمیریوں کی آزادی کی تحریک اپنے عروج پر ہے، موجودہ حکومت کے اقدامات کی وجہ سے کشمیر کا مسئلہ پوری دنیا میں اجاگر ہوا ہے۔

انہوں نے کہا کہ پاکستانی قوم نے ایک بار پھر بھرپور اظہار یکجہتی کرکے کشمیریوں سے خون کا رشتہ ثابت کر دیا ہے۔

جمشید اقبال چیمہ نے کہا کہ دنیا نے تسلیم کیا ہے کہ بھارتی افواج نہتے کشمیریوں پر مظالم کے پہاڑتوڑ رہی ہے اورا ب کشمیرکا مسئلہ پوری دنیا کی مداخلت کا متقاضی ہے۔

تحریک انصاف کے رہنما نے کہا کہ بھارت کے اقدامات کی وجہ سے پورے خطے کا امن داﺅ پر لگ گیا ہے جس کا عالمی دنیا کوفی الفور نوٹس لینا چاہیے۔

انہوں نے کہا کہ پاکستانی قوم نے کشمیریوں سے اظہار یکجہتی کے لیے اپنی تمام تر مصروفیات ترک کرکے اورسڑکوں پر آکرثابت کردیا ہے کہ ہم اپنے مظلوم کشمیری بھائیوں کی جدوجہد میں ان کے شانہ بشانہ ہیں اور ان کے لیے کسی قربانی سے دریغ نہیں کیا جائے گا۔

لاہور: پاکستان تحریک انصاف کے رہنما ہمایوں اخترخان کا کہنا ہے کہ ملک جس نہج پر پہنچ گیا ہے اس میں کرپشن اور پاکستان کسی صورت اکٹھے نہیں چل سکتے۔

تفصیلات کے مطابق پاکستان تحریک انصاف کے سینئر مرکزی رہنما ہمایوں اختر خان نے کہا ہے کہ حکومت معیشت کی حقیقی اور پائیدار ترقی کے لیے اصلاحات کے ذریعے بلیک ہولز کو بند کرنے کے لیے کوشاں ہے۔

انہوں نے کہا کہ اپوزیشن جو مرضی کرلے احتساب کے عمل کو کسی صورت پس پشت ڈالا جائے گا اور نہ ہی احتساب کے اداروں کی راہ میں رکاوٹیں کھڑی کی جائیں گی۔

ہمایوں اخترخان نے کہا کہ قومی احتساب بیورو ٹیکس کے معاملات میں مداخلت نہیں کرے گا اور اسے متعلقہ ادارے ہی دیکھیں گے۔

تحریک انصاف کے رہنما نے کہا کہ سابقہ ادوار میں معیشت کو چلانے کے لیے کاسمیٹکس پالیسیوں کا نفاذ کیا گیا جس کا خمیازہ پوری قوم بھگت رہی ہے۔

انہوں نے کہا کہ موجودہ حکومت نے معیشت کی حقیقی اور پائیدار ترقی کے لیے اصلاحات کی کڑوی گولی نگلی ہے اور گزرتے وقت کے ساتھ اس مثبت اثرات سامنے آرہے ہیں۔

ہمایوں اخترخان نے کہا کہ حیرت ہے کہ سابقہ حکمرانوں کی اپنی فیکٹریاں اور کاروبار تو دن دوگنی رات چوگنی ترقی کرتے رہے جبکہ قومی ادارے سالانہ اربوں روپے خسارہ کرتے رہے۔

تحریک انصاف کے رہنما نے کہا کہ موجودہ حکومت بہترین قومی مفاد میں نجکاری کے عمل میں بھی اصلاحات کررہی ہے تاکہ ان اداروں کو اپنے پاﺅں پر کھڑا کیا جائے گا۔

انہوں نے کہا کہ مسلم لیگ ن، پیپلز پارٹی اور ان کی اتحادی جماعتیں بے نقاب ہوچکی ہیں اور انہیں موجودہ حالات میں اپنی سیاسی بقاء کی فکر لاحق ہے۔

اسلام آباد: وفاقی وزیر برائے مواصلات مراد سعید کا کہنا ہے کہ سوات موٹروے کو کالام تک توسیع دینے کا فیصلہ کیا گیا ہے۔

تفصیلات کے مطابق سیاحت کے فروغ اور مسافروں کی سہولت کے لیے ایک اور اہم قدم، وفاقی حکومت نے خیبرپختونخوا حکومت کے ساتھ ایم او یو سائن کرلیا۔ وزیراعلیٰ خیبرپختونخوا اور وفاقی وزیر مواصلات نے معاہدے پر دستخط کیے۔

سوات ایکسپریس وے کے انتظامی معاملات این ایچ اے کے سپرد کردیے گئے۔ سوات ایکسپریس وے پرروڈ سیفٹی، سفری سہولیات کی نگرانی موٹر وے پولیس کرے گی۔

وزیراعلیٰ محمود خان نے کہا کہ این ایچ اے کی تمام سہولتیں سوات ایکسپریس وے پردستیاب ہوں گی، فیصلہ سوات کالام جانے والے سیاحوں کی آسانی کے لیے کیا گیا۔

وزیراعلیٰ خیبرپختونخواہ نے کہا کہ سوات موٹروے کو توسیع دے کر ٹورسٹ زون بنایا جائے گا۔

دوسری جانب وفاقی وزیر مواصلات مراد سعید نے کہا کہ فیصلے سے ملکی سیاحت کو فروغ ملے گا، خیبر پختونخوا پہلا صوبہ ہے جس نے اپنے وسائل سے موٹروے مکمل کی۔

مراد سعید نے کہا کہ صوبے میں سیاحت کے فروغ کے لیے اقدامات جاری ہیں، مسافروں کے تحفظ کے لیے موٹروے پولیس سے معاہدہ کیا گیا۔

وفاقی وزیر برائے مواصلات نے کہا کہ وزارت مواصلات سوات ایکسپریس وے کو ٹیک اوور کرے گی، سوات موٹروے کو کالام تک توسیع دینے کا فیصلہ بھی کر لیا گیا ہے۔

مراد سعید نے کہا کہ مسافر سوات ایکسپریس وے پر این ایچ اے کی موبائل ایپ استعمال کرسکیں گے، موسم کی صورت حال، سیاحتی مقامات کی پیشگی اطلاع مل سکے گی۔

لاہور: پاکستان تحریک انصاف کے رہنما ملک کرامت علی کھوکھر کا کہنا ہے کہ پاکستان کو خوشحال و ترقی یافتہ دیکھنا پی ٹی آئی کا خواب ہے۔

تفصیلات کے مطابق پاکستان تحریک انصاف کے رہنما ملک کرامت علی کھوکھر نے کہا کہ ملک میں قیام امن،عوام کو بنیادی سہولتوں کی فراہمی کے لیے حکومت اپنا کردار ادا کر رہی ہے۔

انہوں نے کہا کہ ہماری اولین ترجیح معاشی استحکام ہے جس کے لیے پی ٹی آئی نے فریم ورک مکمل کرلیا ہے اور انشاءاللہ اس کے تحت عوام کو تبدیلی نظر آئے گی۔

پاکستان تحریک انصاف کے رہنما عوام نے پی ٹی آئی کو بھاری مینڈیٹ دیا ہے جس کی حکومت قدر کرتی ہے، انشاءاللہ عوام بہت جلد ریلیف محسوس کریں گے۔

ملک کرامت علی کھوکھرنے کہا ہے کہ عوام پی ٹی آئی حکومت کی کارکردگی سے مطمئن ہیں اور واضح تبدیلی محسوس کررہے ہیں، حکومت اپنے تمام وعدوں کو پایہ تکمیل تک پہنچائے گی۔

قومی خزانہ لوٹنے والے کسی رعایت کے مستحق نہیں ہیں، ملک کرامت علی کھوکھر

یاد رہے کہ گزشتہ ماہ پاکستان تحریک انصاف کے رہنما اور رکن قومی اسمبلی ملک کرامت علی کھوکھر کا کہنا تھا کہ وزیراعظم عمران خان عوام سے کیے گئے وعدے ضرور پورے کریں گے۔

اسلام آباد: وزیراعظم کے معاون خصوصی برائے سیاسی امور نعیم الحق کا کہنا ہے کہ 5 سال میں ایک کروڑ صحت کارڈ جاری کریں گے اور کم آمدنی والے لوگوں کو گھر فراہم کریں گے۔

تفصیلات کے مطابق وزیراعظم کے معاون خصوصی نعیم الحق نے تقریب سے خطاب کرتے ہوئے کہا کہ عمران خان پاکستان کو مدینہ جیسی فلاحی ریاست بنائیں گے۔

انہوں نے کہا کہ ہماری حکومت نے جو بجٹ پیش کیا، پاکستان کی تاریخ میں اس سے بہتر فلاحی بجٹ سامنے نہیں آیا۔

نعیم الحق نے کہا کہ احساس پروگرام کے تحت 114 اسکیمیں شروع کی ہیں جس کے تحت یتیم اور بیوہ بغیر کچھ دکھائے 5 سے 10 لاکھ روپے کا قرض حاصل کرسکیں گے۔

وزیراعظم کے معاون خصوصی نے کہا کہ عمران خان پاکستان کو فلاحی ریاست بنانے کا عزم پورا کریں گے اور اس کے لیے جو ہم اسکیمیں لا رہے ہیں، پاکستان کی تاریخ میں اس سے بہتر فلاحی پروگرامز سامنے نہیں آئے۔

نعیم الحق نے مقبوضہ کشمیر پر بات چیت کرتے ہوئے کہا کہ کشمیر کے معاملے پر جنگ ہوئی تو نہ ہندوستان رہے گا نہ پاکستان رہے گا۔

وزیراعظم کے معاون خصوصی نے کہا کہ ڈونلڈ ٹرمپ سے بات میں انہیں بتایا کہ ہم ایک سال سے بات چیت کی کوششیں کررہے ہیں مگر مثبت جواب نہیں آتا تو انہوں نے حیرت کا اظہار کیا۔

نعیم الحق نے کہا کہ آر ایس ایس کا فلسفہ ہے کہ ہندوستان میں صرف ہندوؤں کی حکومت ہو اور اس فلسفے پرنریندر مودی عمل پیرا ہے تاہم ہم اس وقت تک چین سے بہیں بیٹھیں گے جب تک کشمیر کو آزادی نہ مل جائے اور انہیں اپنی قسمت کے فیصلے کا حق نہ مل جائے۔