Tag: پاکستان تحریک انصاف

اسلام آباد: حکومت نے اسد عمر کو نئی ذمہ داریاں دینے کا فیصلہ کر لیا ہے، وزیر اعظم عمران خان نے ہدایت کی ہے کہ اسد عمر کو چیئرمین قائمہ کمیٹی برائے خزانہ مقرر کیا جائے۔

تفصیلات کے مطابق وزیر اعظم عمران خان نے اپنے سابق وزیر خزانہ اسد عمر کو چیئرمین قائمہ کمیٹی برائے خزانہ مقرر کرنے کی ہدایت جاری کر دی ہے۔

وزیر اعظم نے اسد عمر کو چیئرمین قائمہ کمیٹی برائے خزانہ بنانے کی منظوری دے دی، اس سلسلے میں ہدایات پارٹی چیف وہپ عامر ڈوگر کو جاری کی گئیں۔

خیال رہے کہ گزشتہ روز اسد عمر اور وزیر اعظم کی اہم ملاقات ہوئی، جس میں وزیر اعظم نے اسد عمر کو ایک بار پھر کابینہ کا حصہ بننے کی پیش کش کی۔

یہ بھی پڑھیں:  وزیر اعظم سے اسد عمرکی ملاقات، سابق وزیر خزانہ کو ایک بار پھر کابینہ میں شمولیت کی پیش کش

گزشتہ روز وزیر ریلوے شیخ رشید نے بھی اسد عمر سے ملاقات کی، جس میں اسد عمر کے کابینہ میں دوبارہ شمولیت کے معاملے پر تبادلۂ خیال کیا گیا۔

واضح رہے کہ اسد عمر نے 18 اپریل کو اپنے ٹویٹر اکاؤنٹ کے ذریعے وزارت خزانہ چھوڑنے کا اعلان کیا تھا، اس سے تین دن قبل اے آر وائی نیوز نے ان کے قلم دان کی تبدیلی کی خبر دی تھی۔

وزارت خزانہ چھوڑنے کے بعد اسد عمر نے اے آر وائی نیوز کے پروگرام میں اقرار کیا کہ انھیں کارکردگی کی بنیاد پر وزارت سے ہٹایا گیا۔

انھوں نے وزارت سے ہٹنے کے بعد وزیر اعظم کی خواہش کے باوجود کوئی اور وزارت لینے سے انکار کیا۔

اسلام آباد: وفاقی وزیر برائے آبی وسائل فیصل واوڈا کی طبیعت خراب ہو گئی، وہ قومی اسمبلی کے اجلاس میں بھی شرکت نہیں کر سکے اور انھیں اسپتال منتقل کر دیا گیا۔

تفصیلات کے مطابق فیصل واوڈا کی طبیعت خراب ہو گئی، انھیں اے ایف آئی سی اسپتال منتقل کر دیا گیا ہے، فیصل واوڈا کو دل کی تکلیف کے باعث اسپتال منتقل کیا گیا۔

ذرایع کا کہنا ہے کہ ڈاکٹروں نے علاج شروع کر دیا ہے، فیصل واوڈا کو انجائنا کی تکلیف ہوئی۔

قبل ازیں فیصل واوڈا کو قومی اسمبلی کے اجلاس میں شرکت کرنی تھی لیکن طبیعت کی خرابی کے باعث وہ اجلاس میں شریک نہ ہو سکے۔

یہ بھی پڑھیں:  مہمند ڈیم کی تقریب سے واپسی پر فیصل واوڈا کا ہیلی کاپٹر خراب موسم کا شکار

وفاقی وزیر آبی وسائل فیصل واوڈا کی جگہ عمر ایوب نے سوالوں کے جواب دیے، روحیل اصغر نے اجلاس میں سوال کیا کہ بلوچستان میں ڈیم منصوبے تو سابق حکومت کے ہیں، یہ بتائیں وزیر اعظم ان منصوبوں کا افتتاح کب کر رہے ہیں۔

عمر ایوب نے جواب دیا کہ افتتاح ان منصوبوں کا کرتے ہیں جن کے لیے ہماری حکومت فنڈز دیتی ہے، سابق حکومت نے کئی ترقیاتی منصوبوں کے فنڈز جاری نہیں کیے تھے۔

خیال رہے کہ دو مئی کو مہمند ڈیم کی افتتاحی تقریب سے واپسی پر فیصل واوڈا کا ہیلی کاپٹر خراب موسم کا شکار ہوگیا تھا اور پائلٹ نے تیز ہچکولوں اور جھکڑوں کے بعد ہیلی کاپٹر نیچے بہ حفاظت اتار لیا تھا۔

اسلام آباد: سابق وزیر خزانہ اسد عمر کو وفاقی کابینہ میں شامل کرنے کے لیے کوششیں بدستور جاری ہیں، اس سلسلے میں آج اسد عمر اور وزیر اعظم کی اہم ملاقات ہوئی۔

تفصیلات کے مطابق وزارت خزانہ سے ہٹانے جانے والے پی ٹی آئی رکن قومی اسمبلی اسد عمر کو ایک بار پھر کابینہ میں شامل کرنے کے لیے کوششیں کی جا رہی ہیں۔

ذرایع کا کہنا ہے کہ وزیراعظم عمران خان سے اسد عمر کی اہم ملاقات ہوئی ہے، جس میں وفاقی کابینہ میں اسد عمر کی واپسی سے متعلق معاملات پر مشاورت کی گئی۔

ذرایع نے بتایا کہ وزیر اعظم نے اسد عمر کو ایک بار پھر کابینہ کا حصہ بننے کی پیش کش کی ہے۔

یہ بھی پڑھیں:  اسد عمر قیمتی انسان ہیں، منانے جاؤں گا، شیخ رشید کا اعلان

قبل ازیں وزیر ریلوے شیخ رشید نے  بھی اسد عمر سے آج ملاقات کی ہے، جس میں کابینہ میں دوبارہ شمولیت کے معاملے پر تبادلۂ خیال کیا گیا۔

یاد رہے کہ وزارت چھوڑنے کے بعد سے شیخ رشید سے اسد عمر کی اب تک 3 ملاقاتیں ہو چکی ہیں۔

واضح رہے کہ اسد عمر نے 18 اپریل کو اپنے ٹویٹر اکاؤنٹ کے ذریعے وزارت خزانہ چھوڑنے کا اعلان کیا تھا، اس سے تین دن قبل اے آر وائی نیوز نے ان کے قلم دان کی تبدیلی کی خبر دی تھی۔

وزارت خزانہ چھوڑنے کے بعد اسد عمر نے اے آر وائی نیوز کے پروگرام میں اقرار کیا کہ انھیں کارکردگی کی بنیاد پر وزارت سے ہٹایا گیا۔

انھوں نے وزارت سے ہٹنے کے بعد وزیر اعظم کی خواہش کے باوجود کوئی اور وزارت لینے سے انکار کیا۔