ننکانہ صاحب : چیئرمین سکھ کمیونٹی پاکستان رادیش سنگھ نے کہا کرتارپور راہداری کھول کر بہت بڑا قدم اٹھایا ہے، سکھوں کے خواب کی تعبیر ہورہی ہے، پاکستان کا احسان زندگی بھر نہیں اتار سکتے۔
تفصیلات کے مطابق چیئرمین سکھ کمیونٹی پاکستان رادیش سنگھ نے گفتگو کرتے ہوئے کہا کرتارپور راہدای کھولنے پربہت خوش ہیں، پاکستان نے بہت اچھا پیغام دیا ہے، پاکستان میں اقلیتی کمیونٹی بہت خوش ہیں۔
چیئرمین سکھ کمیونٹی کا کہنا تھا کہ پاکستان کی جانب سے دنیا کو مثبت پیغام جارہا ہے اور سکھوں کے خواب کی تعبیر ہورہی ہے، کرتارپور راہداری کھول کر بہت بڑا قدم اٹھایا ہے، پاکستان کا احسان زندگی بھر نہیں اتار سکتے۔
رادیش سنگھ نے کہا کہ شیڈول طےہے ،5ہزار سکھ یاتری آئیں گے ، مذہبی رسومات کےسلسلے میں 10ہزار سکھ بھی آسکتے ہیں، ایک لاکھ سے زائد سکھ ہر سال یاترا کیلئے آسکیں گے۔
مزید پڑھیں : بابا گرو نانک کے جنم دن کی تقریبات میں شرکت کیلئے سکھ یاتریوں کی آمد کا سلسلہ شروع
ان کا کہنا تھا کہ پاکستان کے اقدام سے سیاحت کو بھی فروغ ملے گا ، بھارت سے آنیوالے سکھوں کو ویلکم کریں گے ، وزیراعظم اور آرمی چیف کے شکر گزار ہیں۔
چیئرمین سکھ کمیونٹی نے مزید کہا کہ پوری دنیا میں سب سے بڑا گوردوارہ پاکستان میں ہے ، گرونانک صاحب کےامن کا پیغام پاکستان کےذریعے دنیا بھر میں جائے گا۔
خیال رہے ننکانہ صاحب میں بابا گورونانک کے 550 ویں جنم دن کی 10 روزہ تقریبات کا آغاز ہو گیا ہے ، ان تقریبات میں شرکت کیلئے بھارت سے 1 ہزار سے زائد سکھ یاتری گورو دوارہ جنم استھان میں پہنچ گئے جبکہ آسٹریلیا، کینیڈا، امریکہ، بھارت اور دنیا بھر سے سکھوں کی آمد کا سلسلہ جاری ہے۔