Tag: پاکستان ریلوے

لاہور: ڈائریکٹر پبلک ریلیشن ریلوے قرۃ العین نے کہا کہ اتنے بڑے پیمانے پرنقصان ہو تو دیگر ادارے معاونت کرتے ہیں، ریلوے میں 70 سال سے ڈیزاسٹرمینجمنٹ کا کوئی تصور نہیں ہے۔

تفصیلات کے مطابق اے آروائی نیوز کے پروگرام باخبرسویرا میں بات کرتے ہوئے ڈائریکٹر پبلک ریلیشن ریلوے قرۃ العین نے کہا کہ تبلیغی اجتماع کے لیے جانے والوں کی چیکنگ آسان نہیں ہوتی۔

انہوں نے کہا کہ مسافر اسٹیشن پر آتے ہیں تو پہلے ریلوے پولیس چیکنگ کرسکتی ہے، مسافر کے سوار ہونے کے بعد ٹرین کا گارڈ بھی سامان چیک کرسکتا ہے۔

ڈائریکٹر پبلک ریلیشن ریلوے نے کہا کہ بہت سی میتیں ناقابل شناخت ہیں، مسافروں کی شناخت ڈی این اے کے ذریعے ہوگی۔

انہوں نے کہا کہ ٹرین کے اپنے پاور سپلائی میں اتنی بڑی آگ نہیں بھڑک سکتی، ٹرین میں چھوٹی موٹی اسپارک ہوسکتی ہے مگر آگ نہیں لگ سکتی۔

قرۃ العین نے مزید کہا کہ اتنے بڑے پیمانے پرنقصان ہو تو دیگر ادارے معاونت کرتے ہیں، ریلوے میں 70 سال سے ڈیزاسٹرمینجمنٹ کا کوئی تصور نہیں ہے۔

لیاقت پور: تیزگام کی 3 بوگیوں میں آگ لگ گئی، 74 افراد جاں بحق

یاد رہے کہ گزشتہ روز کراچی سے راولپنڈی جانے والی تیز گام ایکسپریس میں پنجاب کے علاقے لیاقت پور کے قریب گیس سلینڈر پھٹنے سے آتشزدگی کے باعث 74 افراد جاں بحق اور متعدد مسافر زخمی ہوگئے تھے۔

تیزگام ایکسپریس کو حادثہ صبح چھ بجکر پندرہ منٹ پر پنجاب کے ضلع رحیم یار خان کی تحصیل لیاقت پور میں چنی گوٹھ کے نزدیک چک نمبر 6 کے تانوری اسٹیشن پر پیش آیا تھا۔

ملتان: وفاقی وزیر ریلوے شیخ رشید نے کہا ہے کہ ریلوے کی تاریخ میں سب سے کم حادثات میرے دور میں ہوئے جس کا ریکارڈ موجو ہے جو پیش کر سکتا ہوں۔

تفصیلات کے مطابق سانحہ تیز گام ایکسپریس کے زخمیوں کی عیادت کے بعد ملتان میں میڈیا سے بات کرتے ہوئے وزیر ریلوے شیخ رشید نے سانحے میں 74 افراد کے جاں بحق ہونے کی تصدیق کردی۔

وزیر ریلوے نے حادثے کی وجوہات بیان کرتے ہوئے کہا کہ سلنڈر اور چولہا جلانے کی وجہ سے اتنا بڑا سانحہ رونما ہوا، تبلیغی جماعت کے لوگ ناشتے کی تیاری کے لیے چولہا جلانے لگے تو گارڈ نے انہیں روکا لیکن گارڈ کےجانے کے بعد انہوں نےچولہا جلا لیا۔

شیخ رشید نے سانحے میں جاں بحق افراد کے لواحقین کو15،15لاکھ روپے اور زخمیوں کو فی کس 3 سے5 لاکھ روپے امداد دینے کا اعلان بھی کیا۔

وزیر ریلوے نے بتایا کہ وزیراعظم نےواقعے کی تحقیقات کا حکم دے دیا ہے اور 10 روز میں انکوائری مکمل کرکے مجرموں کو سزا دیں گے۔

یہ بھی پڑھیں: وفاقی وزیر ریلوے شیخ رشید کو ہٹانے کا مطالبہ

شیخ رشید نے دعویٰ کیا کہ سب سے کم ٹرین حادثات ان کے دور میں ہوئے،ٹرین حادثات کا ریکارڈ موجود ہے جو پیش کرسکتا ہوں۔

استعفے کے سوال پر وزیرریلوے نے جواب دیا کہ میرا استعفیٰ کوئی مسئلہ نہیں اس حوالے سے اتوار کو جواب دوں گا۔

یاد رہےکہ لیاقت پور کے قریب تیزگام ایکسپریس میں آتشزدگی کے ہولناک واقعے میں تین بوگیوں میں سوار درجنوں مسافرزندہ جل گئے۔

حادثے کے بعد بہاولپور ملتان اوررحیم یارخان کےسرکاری اسپتالوں میں ایمرجنسی نافذ کردی گئی،ایم ایس ڈی ایچ کیو لیاقت پورکےمطابق 12 مسافروں کی حالت تشویشناک ہے جب کہ جاں بحق اورزخمیوں کی شناخت کی کوشش کررہے ہیں،14 لاشیں ناقابل شناخت ہیں۔

اسلام آباد: پارلیمانی سیکریٹری برائے ریلوے فرخ حبیب نے کہا ہے کہ ریلوے کی سواریوں میں ایک کروڑ سواریوں کا اضافہ ہو چکا ہے، ہم نے ریلوے ملازمین کی تنخواہوں اور پنشنز میں بھی اضافہ کیا۔

تفصیلات کے مطابق پارلیمانی سیکریٹری فرخ حبیب نے قومی اسمبلی اجلاس میں محکمہ ریلوے سے متعلق وضاحت کرتے ہوئے کہا کہ ایک سال میں ریلوے میں ایک کروڑ سواریوں کا اضافہ ہوا۔

انھوں نے کہا ریلوے ملازمین کی تنخواہوں اور پنشنز میں بھی اضافہ کیا گیا، دوسری طرف ریلوے کے اخراجات کم کیے گئے، ریلوے اپنے ٹریک پر رواں دواں ہے بلکہ پھل پھول رہا ہے۔

فرخ حبیب کا کہنا تھا کہ فیصل آباد ریلوے اسٹیشن بھوت بنگلے کا منظر پیش کرتا تھا، اب اس کی تزئین و آرایش شروع کر دی گئی ہے۔

یہ بھی پڑھیں:  محکمہ ریلوے کی بدانتظامی، ٹرینیں حسب معمول تاخیر کا شکار، مسافر اذیت میں مبتلا

پارلیمانی سیکریٹری نے کہا محدود وسائل میں رہ کر ریلوے کو ترقی کی راہ پر گامزن کیا جا رہا ہے۔

واضح رہے کہ محکمہ ریلوے کی بد انتظامی اور حادثات سے ٹرینوں کی آمد و رفت کا شیڈول کچھ عرصے سے مسلسل تاخیر کا شکار ہے، ریلوے حکام ٹرین آپریشن کو معمول پر لانے میں ناکام رہے ہیں جس سے مسافروں کو انتظار کی کوفت اور اذیت کا سامنا ہے۔

وزیر ریلوے شیخ رشید نے رواں ماہ کہا تھا کہ 5 سال میں ریلوے کا خسارہ ختم کرنا ہے، ہم 138 ٹرینیں روزانہ چلا رہے ہیں، ساری ٹرینیں افسران اور مزدوروں کی محنت سے چلی ہیں، میں چاہتا ہوں سیاست سے بالاتر ہوکر ریلوے چلایا جائے۔

لاہور: وزارت ریلوے نے بقر عید پر اسپیشل ٹرینیں چلانے اور معمول کی ٹرینوں کے ساتھ اضافی کوچز لگانے کا فیصلہ کر لیا ہے۔

تفصیلات کے مطابق عید پر خصوصی ٹرینوں کے ساتھ ساتھ معمول کی ٹرینوں میں اضافی کوچز لگانے کا فیصلہ کیا گیا ہے، ترجمان ریلوے کا کہنا ہے کہ یہ فیصلہ وزیر ریلوے شیخ رشید کی ہدایت پر کیا گیا۔

ریلوے ترجمان نے بتایا ہے کہ 7، 8، 9، اور 10 اگست کو ٹرینوں کے ساتھ اضافی کوچز لگائی جائیں گی۔

ترجمان کے مطابق چاروں دن 5 شیڈول ٹرینوں کے ساتھ اضافی کوچز لگانے کا فیصلہ ہوا ہے، ان اضافی کوچز کی بکنگ فوری طور پر کھول دی گئی ہے۔

شیڈول کے مطابق پہلی عید اسپیشل ٹرین 10 اگست کو کراچی سے راولپنڈی براستہ لاہور روانہ ہوگی، دوسری عید اسپیشل ٹرین 10 اگست کو کوئٹہ سے راولپنڈی براستہ لاہور روانہ ہوگی۔

یہ بھی پڑھیں:  وفاقی حکومت کا عید الاضحیٰ پر چار چھٹیاں دینے کا اعلان، نوٹی فکیشن جاری

ریلوے ترجمان کا کہنا تھا کہ عید اسپیشل ٹرینوں کی بکنگ 24 گھنٹے پہلے کی جائے گی۔

خیال رہے کہ حکومت پاکستان نے عید الاضحیٰ پر ملک بھر میں سرکاری تعطیلات کا نوٹی فکیشن جاری کر دیا ہے جس کے مطابق چھٹیاں 12 سے 15 اگست تک ہوں گی۔

واضح رہے کہ آئے دن ٹرینوں کی تاخیر کا مسئلہ شدت اختیار کر گیا ہے، آج بھی لاہور سے مختلف شہروں کے لیے روانہ ہونے والی ٹرینیں تاخیر کا شکار رہیں، ان ریل گاڑیوں میں کراچی ایکسپریس، جناح ایکسپریس، اکبر ایکسپریس، ملت ایکسپریس اور پاکستان ایکسپریس شامل تھیں۔

شیخ رشید نے ٹرینوں کی تاخیر کے حوالے سے کہا کہ ایک ماہ کی مہلت دے دیں، بارشوں کی وجہ سے سگنل سسٹم متاثر ہوتا ہے، ہماری 136 میں سے 6 ٹرینیں تاخیر کا شکار ہیں لیکن وہ بھی ایک ماہ میں ٹھیک ہو جائیں گی۔

اسلام آباد: پاکستان ریلویز نے مال بردار گاڑیوں کے کرایے میں 20 فی صد اضافے کا اعلان کر دیا ہے۔

تفصیلات کے مطابق مال بردار ریل گاڑیوں کے کرائے میں بھی اضافہ کر دیا گیا ہے، پاکستان ریلویز نے بیس فی صد اضافے کا اعلان کیا۔

ترجمان ریلوے کے مطابق کرایوں میں اضافے کا اطلاق 10 اگست سے ہوگا، کرایوں میں اضافے کا اطلاق ایچ ایس ڈی اور کارگو ٹرینوں پر نہیں ہوگا۔

وزارت ریلوے نے کرایوں میں اضافے کے سلسلے میں ڈویژنل سپرنٹنڈنٹس کو احکامات جاری کر دیے۔

یہ بھی پڑھیں:  پاکستان ریلوے میں اب نئی بھرتی ٹیسٹ اور انٹرویو کی بجائے قرعہ اندازی کے ذریعے ہوگی

یاد رہے کہ جون میں وفاقی وزیر ریلوے شیخ رشید نے ریلوے کے کرایوں میں اضافے کا اعلان کیا تھا، جس کے بعد یکم جولائی سے اکانومی کلاس کرائے میں 100 روپے کا اضافہ ہوا، مجموعی طور پر کرایوں میں 6 سے 7 فی صد اضافہ کیا گیا۔

وفاقی وزیر ریلوے نے کراچی سے مزید 3 فریٹ ٹرینیں چلانے کا بھی اعلان کیا تھا۔

شیخ رشید نے گزشتہ ماہ بتایا کہ وزارت نے تن خوا اور تیل پر 3 ارب کا اضافی خرچ اٹھایا ہے۔ تیل، پنشن اور تن خوا کی مد میں ساڑھے 12 ارب خرچ ہوئے۔ 24 ٹرینیں اور 2 مال گاڑیاں چلائی گئیں۔ سال میں 60 لاکھ مسافر بڑھائے گئے۔

واضح رہے کہ پاکستان ریلوے میں نئی بھرتی کے سلسلے میں پالیسی بھی تبدیل کر دی گئی ہے، نئی بھرتیاں اب ٹیسٹ اور انٹرویو کی بجائے قرعہ اندازی کے ذریعے ہوں گی، قرعہ اندازی میں نام نکلنے کی صورت میں میڈیکل کے بعد امیدوار کو ملازمت مل جائے گی۔