دبئی: پاکستان سپر لیگ کا دوسرا سیزن جاری ہے اور میچ میں ہر لمحہ پرجوش و سنسنی خیز لمحوں کے ساتھ میچ کے علاوہ دلچسپ و مزاحیہ مناظر بھی دیکھنے کو مل رہے ہیں۔
نیوزی لینڈ کے سابق باؤلر ڈینی موریسن جو لیگ میں کمنٹری کے فرائض انجام دے رہے ہیں، اپنی حس مزاح کے لیے مشہور ہیں اور اکثر و بیشتر مزاحیہ حرکتیں کرتے رہتے ہیں۔
کبھی وہ چیئر لیڈرز کے ساتھ رقص کرتے نظر آتے ہیں، کبھی شائقین کے ساتھ گھل مل جاتے ہیں اور کبھی مائیک پکڑے گانا گاتے نظر آتے ہیں۔
اس بار معروف کمنٹیٹر رمیز راجہ نے ان کی حس مزاح کو آزمانے کا سوچا اور ان کے ساتھ اردو سوال و جواب کا سیشن رکھ لیا جس میں رمیز نے اردو میں سوالات کیے جبکہ ڈینی نے انگریزی میں جوابات دیئے۔
رمیز نے انہیں زیادہ مشکل میں نہ ڈالتے ہوئے سوالات کے ساتھ اشارے بھی کیے جس سے ڈینی کو اردو میں سوال سمجھنا کچھ آسان ہوگیا اور انہوں نے بآسانی تمام سوالات کے جواب دے ڈالے۔
رمیز نے ان سے پہلا سوال پوچھا، ’آپ کے کیا حال ہیں؟‘ ڈینی نے تھوڑے توقف کے بعد جواب دیا، ’میں ٹھیک ہوں‘ جس پر رمیز بھی حیرت سے ہنس پڑے۔ شاید انہیں توقع نہیں تھی کہ ڈینی اتنی آسانی سے اردو سمجھ لیں گے۔
جب ڈینی سے پوچھا گیا کہ ان کی پسندیدہ ٹیم کون سی ہے تو انہوں نے کراچی کنگز کا نام لے ڈالا۔ انہوں نے کہا، ’کیونکہ اس میں بابر اعظم، سوئنگ کنگ محمد عامر، سہیل خان اور وہ ایک اور کرس گیل موجود ہے‘۔
جب ان سے پوچھا گیا کہ ان کا پسندیدہ گانا کون سا ہے تو انہوں نے پی ایس ایل کے آفیشل سانگ پر باقاعدہ رقص کر کے بتایا کہ انہیں یہ گانا پسند ہے۔
آخر میں رمیز راجہ نے ہنستے ہوئے ان سے کہا ، ’آپ خاصے پاگل ہیں‘ تو ڈینی نے برا مانے بغیر کہا، ’یس آئی ایم پاگل‘۔
یاد رہے کہ پاکستان سپر لیگ کا فائنل 5 مارچ کو لاہور میں کھیلا جائے گا جس کے ٹکٹوں کی فروخت آج سے شروع کردی گئی ہے۔
دبئی : پاکستان سپر لیگ کے تیسرے مرحلے کے میچ میں کراچی کنگز کی ٹیم آج کوئٹہ گلیڈی ایٹرز سے ٹکرائے گی, یہ اہم میچ پاکستانی وقت کے مطابق رات نو بجے شروع ہوگا.
تفصیلات کے مطابق کراچی کنگز اورکوئٹہ گلیڈی ایٹرز کی ٹیمیں دوسری بار دبئی میں آج مدمقابل ہوں گی۔ کراچی کنگز کے پاس ہار کا بدلہ لینے کا بہترین موقع ہے۔
کراچی کنگز کی گاڑی جیت کے ٹریک پرآگئی ہے۔ کوئٹہ گلیڈی ایٹرز کی فتح اسے پلے آف مرحلے میں پہنچا سکتی ہے جبکہ کراچی کنگز کے شیروں نے بھرپور کم بیک کرتے ہوئے مسلسل دو میچز جیت کرکوئٹہ کیلئے خطرے کی گھنٹی بجادی ہے۔
سرفرازالیون سات پوائنٹس کے ساتھ لیگ میں سرفہرست ہے۔ کراچی کنگز کے پانچ میچ کھیل کر سب سے کم چار پوائنٹس ہیں۔
کوئٹہ کی ٹیم بیٹنگ پر انحصار کرے گی۔ کراچی کنگز کے باؤلرز کو ڈینجر مین کیون پیٹرسن، سرفراز احمد اور رلی روسو کا روکنا ہوگا۔
بیٹنگ میں سب کو کرس گیل کے چلنے کا انتظار ہے۔ دونوں ٹیمیں ایونٹ میں اپنا چھٹا میچ کھیلیں گی۔ کوئٹہ جیت گیا تو اگلے راؤنڈ میں پہنچ جائے گا۔ کراچی کامیابی حاصل کرکے اپنی پوزیشن بہتر بنائے گا۔
کراچی: پی ایس ایل اسپاٹ فکسنگ اسکینڈل میں تین کھلاڑیوں کو پوچھ گچھ کے بعد کلیئر قرار دے دیا گیا ان میں محمد عرفان، شاہ زیب حسن اور ذوالفقاربابر شامل ہیں۔
اسپورٹس اینکر نجیب الحسنین نے اس حوالے سے اے آر وائی نیوز سے ٹیلی فونک گفتگو کرتے ہوئے کہا کہ ابھی کوئی بات حتمی نہیں، اسپاٹ فکسنگ کا معاملہ سامنے آنے کے بعد تحقیقات کا دائرہ کار مزید وسیع ہوگا، کھلاڑیوں کے نام آتے رہیں گے اور پوچھ گچھ ہوتی رہے گی تاہم تحقیقات سے قبل یہ کہہ دینا بہت آسان ہے کہ فلاں کھلاڑی ملوث ہے، ہمیں ایسا نہیں کرنا چاہیے۔
انہوں نے کہا کہ دو کھلاڑیوں کے نام آئے ، انہیں وطن واپس بھیجا گیا اب ان کے قریب کون کون تھا، کون کون ان کی نقل و حرکات سے واقف تھا یہ سوالات تو تمام کھلاڑیوں سے ہوں گے صر ف اس پوچھ گچھ پر یہ کہہ دینا غلط ہے کہ فلاں کھلاڑی بھی اسپاٹ فکسنگ میں ملوث ہے۔
انہوں نے مزید کہا کہ عرفان سے پوچھ گچھ کی گئی بعدازاں اسے اجازت دے دی گئی کہ وہ پی ایس ایل کھیلے کیوں کہ اس کا اسپاٹ فکسنگ سے تعلق ثابت نہیں ہوا اسی طرح بہت سے لڑکوں کے نام آئیں گے اور کلیئر ہوتے رہیں گے۔
قبل ازیں پی ایس ایل کے چیئرمین نجم سیٹھی نے ٹوئٹ میں کہا تھا کہ محمد عرفان سے پوچھ گچھ کی گئی ہے تاہم انہیں معطل نہیں کیا گیا وہ میچ کھیل سکتے ہیں اسی طرح ذوالفقار بابر اور شاہ زیب حسن بھی اپنے میچز کھیل سکتے ہیں۔
محمد عرفان اسلام آباد یونائیٹڈ، شاہ حسن کراچی کنگز اور ذوالفقار بابر کا تعلق کوئٹہ گلیڈی ایٹر سے ہے، اس وقت کوئٹہ گلیڈی ایٹر اور کراچی کنگز کے درمیان میچ جاری ہے۔
واضح رہے کہ دو کھلاڑیوں شرجیل خان اور خالد لطیف کی بکیز سے ملاقاتوں کے انکشاف کے بعد انہیں وطن واپس بھیج دیا گیا ہے جب کہ دیگر کھلاڑیوں سے پوچھ گچھ کا سلسلہ جاری ہے، اب تک محمد عرفان، شاہ زیب حسن اور ذوالفقار بابر سے پوچھ گچھ کی جاچکی ہے۔
خیال رہے کہ پی ایس ایل کے خلاف سازش یا کراچی کنگز سے دشمنی میں کچھ نجی چینلز نے کراچی کنگز کے کھلاڑی عماد وسیم کے خلاف جھوٹی خبریں چلادیں جس پر عماد وسیم نےٹوئٹ میں کہا ہے کہ میرے خلاف چلنے والی تمام خبریں بے بنیاد ہیں، میں نے ہمیشہ دیانت داری سے کرکٹ کھیلی، میں پاکستان سے پیار کرتا ہوں، کراچی کنگز کے لیے بھی ہمیشہ ایمان داری سے کھیلا۔
دبئی: پاکستان سپر لیگ (پی ایس ایل) 2017 میں آج کراچی کنگز اور پشاور زلمی کا ٹاکرا ہوگا۔ اس سے قبل لاہور قلندرز اور کوئٹہ گلیڈی ایٹرز کی ٹیمیں آپس میں مدمقابل ہوں گی۔
دبئی کے انٹرنیشل کرکٹ اسٹیڈیم میں آج کراچی کنگز اور پشاور زلمی کی ٹیمیں آپس میں ٹکرائیں گی۔ میچ پاکستانی وقت کے مطابق 9 بجے شروع ہوگا۔
میچ سے قبل کراچی کنگز کے کھلاڑیوں نے بھرپور پریکٹس کی جس میں کراچی کنگز کے مالک سلمان اقبال نے بھی شرکت کی اور کھلاڑیوں کا حوصلہ بڑھایا۔
دوسری جانب پشاور زلمی کل کےافتتاحی میچمیں اسلام آباد یونائیٹڈ کے ہاتھوں 7 وکٹوں سے شکست کھا چکی ہے۔
آج ایک اور میچ لاہور قلندرز اور کوئٹہ گلیڈی ایٹرز کے درمیان کھیلا جارہا ہے جس میں لاہور قلندرز نے ٹاس جیت کر فیلڈنگ کا فیصلہ کیا ہے۔
یاد رہے کہ کراچی کنگز کی قیادت سری لنکن کھلاڑی کمار سنگا کارا کر رہے ہیں۔ ٹیم کے دیگر کھلاڑیوں میں شعیب ملک، کرس گیل، روی بوپارہ اور مہیلا جے وردنے شامل ہیں۔
کراچی : پاکستان سپر لیگ کی سب سے مضبوط ٹیم کراچی کنگزکی افتتتاحی تقریب آج نیشنل اسٹیڈیم کراچی میں ہورہی ہے، جس میں دلوں کے بادشاہ کی دھواں دار انٹری ہوگی اورنامور گلوکار بھی پرفارمنس پیش کریں گے۔
تفصیلات کے مطابق پاکستان میں کرکٹ کی تاریخ کا سب سے بڑا میلہ ہونے جارہا ہے، پاکستان سپرلیگ کی سب سے مضبوط اور بہترین ٹیم کراچی کنگز کے ستارے جمعے کی شام نیشنل اسٹیڈیم کراچی میں جگمگائیں گے، کراچی والوں نے تمام پاسز ہاتھوں ہاتھ لے لیے۔
کراچی کنگز کی شاندار لانچنگ تقریب میں علی عظمت ،فاخر، اور علی حیدر، سلیم جاوید ،حسن جہانگیر سمیت دیگر نامور گلوکار بھی پر فارم کریں گے فہد مصطفی اور وسیم بادامی تقریب کی میزبانی کریں گے۔
دوسری جانب گورنرسندھ محمد زبیر، میئر کراچی وسیم اختر اور ٹیم کے مالک سلمان اقبال نے اپنے پیغامات میں کراچی کنگز کی ٹیم کو خوش آئند قراردیا ہے۔
کراچی کنگز کے مالک سلمان اقبال نے اپنے پیغام میں کہا ہے کہ کراچی والوں یہ شہر ہمارا ہے، اس کو اجاگر کرنا ہے، کراچی والوں دنیا کو بتانا ہے کراچی کی رونقیں واپس آرہی ہیں اور ہر کراچی والا کپتان ہے۔
کراچی کنگز کی ٹیم کیلئے دیگر رہنماؤں نے نیک خواہشات کا اظہار کرتے ہوئے کراچی کی ٹیم کی جیت کے یقین کا اظہار کیا ہے۔
کراچی : پاکستان سپر لیگ میں شامل اہم ٹیم کراچی کنگز کے مالک اور اے آر وائی نیٹ ورک کے سی ای او سلمان اقبال نے کہا ہے کہ پی ایس ایل کا فائنل لاہور میں ہونا چاہیئے، پی سی بی سے کہا ہے کہ تین پلے آف میں سے ایک پلے آف کراچی میں کرادیں، انہوں نے کہا کہ وزیراعلیٰ سندھ، کور کمانڈرز، ڈی جی رینجرز نے کراچی میں مکمل سیکورٹی دینے کی یقین دہانی کرائی ہے۔
ان خیالات کا اظہارانہوں نے اے آر وائی نیوز کے پروگرام آف دی ریکارڈ میں خصوصی گفتگو کرتے ہوئے کیا، اس موقع پر لاہورقلندر کے مالک رانا فواد نے بھی لاہورمیں فائنل کرانے کی حمایت کی۔
سلمان اقبال نے کہا کہ غیرملکی کھلاڑی پی ایس ایل کیلیے آنے پر پچاس فیصد راضی ہیں باقی ان کے بورڈز پر منحصر ہے، عالمی کھلاڑی لاہور میں فائنل کھیلنے کیلئے تیارہیں، ان کے بورڈز نہیں۔
سنگاکارا، مہیلا، رائن میک لارن سمیت کئی کھلاڑیوں سے پاکستان آنے کی بات کی، کرس گیل، سنگا کارا لاہور آنا چاہتے ہیں لیکن ان کے بورڈز نے انہیں اجازت نہیں دی، کرس گیل پاکستان آنے میں کوئی خطرہ محسوس نہیں کرتا، کرس گیل نے کہا ہے ان کابورڈ اجازت دے تووہ آجائیں گے۔
ایک سوال کے جواب میں سلمان اقبال کا کہنا تھا کہ پی ایس ایل کافی مقبول ہوچکا ہے اور اس سال پی ایس ایل کی مقبولیت بہت زیادہ ہے، لوگوں کو اس کا بے صبری سےانتظارہے، اس بار پی ایس ایل میں انٹرنیشنل کھلاڑی زیادہ ہیں، انگلینڈ، آسٹریلیا کے کھلاڑی بھی پی ایس ایل میں شامل ہیں۔
انہوں نے بتایا کہ کراچی کنگز کے شائقین کو اسٹیڈیم تک پہنچانے کا خاص انتظام کیا گیا ہے، دو سے تین ٹورز بسیں شائقین کو اسٹیڈیم پہنچائیں گی۔
لاہور قلندرز کے مالک رانا فواد نے پروگرام میں گفتگو کرتے ہوئے کہا کہ سلمان اقبال نے صحیح کہا ہے کہ پی ایس ایل سب سے پاپولر لیگ ہے، اس کا فائنل لاہور میں ضرور ہونا چاہئیے، کھلاڑی پاکستان آنے میں پی ایس ایل فرنچائز کے ساتھ ہیں۔
اس موقع پر معروف کرکٹر شعیب ملک نے کہا کہ بنگلادیش پریمئرلیگ میں عالمی کھلاڑیوں سے پاکستان آنے کیلئے کہا تھا، پوری ذمہ داری سے غیرملکی کھلاڑیوں کو پی ایس ایل میں لانےکی کوشش کی، کچھ غیرملکی کھلاڑیوں کے پاکستان آنےکی توقع ہے۔
پاکستان سپر لیگ کے دوسرے سیزن کا دبئی میں 9 فروری سے آغاز ہونے جا رہا ہے اور افتتاحی تقریب کی میزبانی کی ذمہ داری اے آر وائی ڈیجیٹل کے مقبول پروگرام ’جیتو پاکستان‘ کے میزبان فہد مصطفیٰ کو سونپی گئی ہے۔
پاکستان سپر لیگ کے سوشل میڈیا اکاؤنٹس پر پوسٹ کی جانے والی ویڈیو میں فہد مصطفیٰ نے اپنے مداحوں کے لیے خود اس خوشخبری کا اعلان کیا۔
ویڈیو میں وہ بہت پر جوش دکھائی دے رہے ہیں اور اپنے مداحوں کو بھی اس تاریخی ایونٹ کا حصہ بننے کی دعوت دے رہے ہیں۔
یاد رہے کہ اے آر وائی نیٹ ورک کی ٹیم کراچی کنگز کی قیادت سری لنکن کھلاڑی کمار سنگا کارا کر رہے ہیں۔ ٹیم کے دیگر کھلاڑیوں میں شعیب ملک، کرس گیل، روی بوپارہ اور مہیلا جے وردنے وغیرہ شامل ہیں۔
پاکستان سپر لیگ کا دوسرا سیزن 9 فروری سے 7 مارچ تک کھیلا جائے گا۔ لیگ کا فائنل لاہور میں منعقد ہوگا۔
کراچی: اے آر وائی ںیٹ ورک کے سربراہ سلمان اقبال نے وزیر اعلیٰ سندھ مراد علی شاہ سے ملاقات کی۔ ملاقات میں سلمان اقبال نے وزیر اعلیٰ کو پاکستان سپر لیگ کی تقریبات میں مدعو کیا۔
تفصیلات کے مطابق اے آر وائی نیٹ ورک کے سربراہ سلمان اقبال نے وزیر اعلیٰ سندھ مراد علی شاہ سے ملاقات کی۔ ملاقات میں وزیر اعلیٰ اور سلمان اقبال کے درمیان باہمی دلچسپی کے امور پر گفتگو ہوئی۔
سلمان اقبال نے وزیر اعلیٰ کو پاکستان سپر لیگ ٹی 20 کرکٹ ٹورنامنٹ سے متعلق آگاہ کیا اور انہیں پی ایس ایل کی تقریبات میں شرکت کی دعوت دی جسے انہوں نے خوشدلی سے قبول کیا۔
وزیر اعلیٰ سندھ نے کہا کہ اے آر وائی نیوز نے پاکستان کی مضبوطی اور جمہوریت کے دفاع کے لیے ہر اول دستے کا کردار ادا کیا ہے۔ سندھ حکومت اور پیپلز پارٹی اے آر وائی نیوز کی غیر جانبدارانہ مؤقف کی ہمیشہ تائید کرتی رہی ہے۔
واضح رہے کہ پاکستان سپر لیگ ٹی 20 کا آغاز 25 فروری سے دبئی میں ہورہا ہے۔ ٹورنامنٹ کا آفیشل ترانہ بھی جاری کردیا گیا ہے جسے معروف گلوکار علی ظفر نے گایا ہے۔
دبئی: پی ایس ایل کے دوسرے ایڈیشن کے لیے پانچوں ٹیموں نے کھلاڑیوں کا انتخاب مکمل کرلیا، کراچی کنگز نے کرس گیل، لاہور قلندر نے برینڈن میک کولم، پشاور زلمے نے شاہد آفریدی ،کوئٹہ گلیڈی ایٹرز نے کیون پیٹرسن کو منتخب کرلیا جب کہ اسلام آباد یونائیٹڈنے مصباح الحق کو برقرار رکھا۔
تفصیلات کے مطابق پاکستان سپر لیگ(پی ایس ایل2017ء )کا دوسرا ایڈیشن فروری میں دبئی میں منعقد ہوگا جس میں پانچ ٹیمیں ایک دوسرے کے مدمقابل ہیں، اس ایونٹ میں کھلاڑیوں کے چنائو (ڈرافٹنگ) کے لیے تقریب دبئی میں منعقد ہوئی جس میں کھلاڑیوں سمیت ٹیم کے مالکان، چیرمین پی سی بی نجم سیٹھی، کرکٹ کے آفیشلز اور دیگر متلقہ افراد نے شرکت کی۔
ڈرافٹنگ میں 414 کھلاڑیوں کو پانچ کیٹگریز میں تقسیم کیا گیا تھا ان میں پلاٹینیم، ڈائمنڈ، گولڈ، سلور اور ایمرجنگ شامل تھیں، پانچوں ٹیموں نے 16،16 کھلاڑیوں کا انتخاب کیا جس کے بعد منتخب کھلاڑیوں کی تعداد 70 بن گئی۔
ڈرافٹنگ کے ہرمرحلے میں کھلاڑی منتخب کرنے کی پہلی باری لاہور قلندر کی، دوسری باری کراچی کنگز، تیسری پشاور زلمے، چوتھی کوئٹہ گلیڈی ایٹر اور آخری باری اسلام آباد یونائیٹڈ کی تھی۔
پلاٹینیم کیٹگری میں کراچی کنگز نے ویسٹ انڈیز کے بلے باز کرس گیل، ویسٹ انڈیز کے ہی کرکٹر کیرون پولارڈ اور پاکستانی آل رائونڈ شعیب ملک کو منتخب کیا۔
ڈائمنڈ کیٹگری میں محمد عامر، روی بوپارہ اور کمار سنگاکارا کو جب کہ گولڈ کیٹگری میں قومی کرکٹ ٹیم کے کھلاڑیوں عماد وسیم، بابر اعظم اور سائوتھ افریقا کے کھلاڑی ریان میکلرن کومنتخب کرلیا۔
سلور کیٹگری میں کراچی کنگز نے سہیل خان، شاہ زیب خان، سیف اللہ بنگش، خرم منظور کو اور ایمرجنگ کیٹگری میں کاشف عباسی، ابراراحمد اور عبدالحمید کو منتخب کیا۔
سپلیمنٹری رائونڈ میں مہیلا جے وردھنے اور اسامہ میر کراچی کنگز کا حصہ بن گئے۔
لاہور قلندر نے برینڈن میک کولم، سنیل نارائن، عمر اکمل، سہیل تنویر، ڈیوین براوو، یاسر شاہ، اینٹون ڈیوچ، محمد رضوان، کیمرون ڈیل پورٹ، اظہر علی، عامر یامین، ظفر گوہر، فخر زمان، بلاول بھٹی، غلام مدثر اور عثمان قادر کو منتخب کیا۔
پشاور زلمے نے شاہد آفریدی، آیون مورگن، وہاب ریاض، شکیب الحسن، ڈیرن شامی، محمد حفیظ، کرس جورڈن، تمیم اقبال، کامران اکمل،صہیب مقصود، جنید خان، عمران خان جونئیر،افتخار احمد، حارث سہیل، حسن علی اور محمد اصغر کو شامل کیا ۔
کوئٹہ گلیڈی ایٹر میں کیون پیٹرسن، سرفراز احمد، احمد شہزاد، کارلوس بریتھ ویٹ، لیوک رائٹ، انور علی، تیمل ملز، عمر گل، ذوالفقار بابر، محمد نواز، محمد نبی، اسد شفیق، سعد نسیم، عمر امین، حسن خان اور نور علی کو منتخب کیا گیا۔
اسلام آباد یونائیٹڈ نے مصباح الحق، شین واٹسن، اینڈر رسل، شرجیل خان، محمد عرفان، سیموئل بدری، محمد سمیع، خالد لطیف، بریڈ ہیڈن، سیم بلنگس، سعید اجمل، آصف علی، رمان رئیس، عمران خالد، احمد بٹ اور حسن طلعت کو منتخب کیا۔
اے آر وائی نیٹ ورک کے صدر اور سی ای او سلمان اقبال نے کرس گیل کو ان کے نام کی ٹی شرٹ پیش کی جو انہوں نے پہن لی۔
سابقہ ایونٹ میں اچھی کارکرگی کا مظاہرہ نہیں کیا، کرس گیل
کرس گیل کا کہنا تھا کہ پی ایس ایل کے پہلے ایونٹ میں بہترین کارکردگی کا مظاہرہ نہیں کرسکا تھا تاہم اس بار مکمل فٹ اور تیار ہوں،میری کوشش ہوتی ہے کہ تیز رفتاری کے ساتھ رنز حاصل کروں،پاکستان میں میرا فین کلب مزید بڑھ جائے گا۔
I will try to entertain the crowd as much as…by arynews
کرس گیل نے مزید کہا کہ انہوں نے کہا کہ پہلی بار بھی اس ایونٹ کا حصہ بن کر مزا آیا، کراچی کنگز میرے لیے نئی ٹیم ہے اس ٹیم کا حصہ بننا اچھا لگ رہا ہے، شائقین کو زیادہ سے زیادہ انٹرٹین کرنے کی کوشش کروں گا۔
تقریب سے قبل اے آر وائی نیوز کے اینکر پرسن ویسم بادامی نے کراچی کنگز کے مالک سلمان اقبال اور کرس گیل کے درمیان خوشگوار ماحول میں ہونے والی ملاقات میں ان سے بات چیت کی ، کرس گیل کا کہنا تھا کہ کراچی کنگز کا حصہ بن کر خوشی محسوس کررہا ہوں۔
کراچی: کراچی کنگز نے پاکستان سپر لیگ( پی ایس ایل) کے لیے کھلاڑیوں اور ٹیم مینجمنٹ کا اعلان کردیا، کراچی کنگز میں کرس گیل، کمار سنگاکارا اور تین سنچریاں بنانے والے بابر اعظم کو بھی شامل کیا گیا ہے جب کہ نئے ٹیلنٹ کی کھوج میں ہزاروں نوجوانوں کے ٹرائلز کے بعد 350 نوجوانوں کو شارٹ لسٹ کرلیا گیا ہے۔
یہ اعلان اے آر وائی ڈیجیٹل نیٹ ورک کے چیف ایگزیکٹو آفیسر اور کراچی کنگز کے مالک سلمان اقبال نے نیشنل اسٹیڈیم میں منعقدہ تقریب میں میڈیا بریفنگ میں کیا۔ تقریب کی میزبانی کے فرائض اینکر پرسن وسیم بادمی نے اداکیے جب کہ تقریب میں ٹیم مینجمنٹ، کراچی کنگزکی ایڈوائزری کمیٹی اور دیگر نے شرکت کی۔
اے آر وائی ڈیجیٹل نیٹ ورک کے چیف ایگزیکٹو آفیسر اور کراچی کنگز کے مالک سلمان اقبال نے میڈیا بریفنگ میں اعلان کیا کہ کراچی کنگز کے لیے ویسٹ انڈیز کے مایہ ناز بیٹسمین کرس گیل، سری لنکن کرکٹر اور وکٹ کیپرکمار سنگارا اور پاکستان کے لیے تین ون ڈے میں مسلسل تین سنچریاں بنانے والے قومی کرکٹ ٹیم کے کھلاڑی بابر اعظم کو منتخب کرلیا گیا ہے،شعیب ملک، عماد وسیم، روی بوپارہ، محمد عامر اور سہیل خان بھی ٹیم کا حصہ ہوں گے۔
انہوں نے بتایا کہ طارق وصی کراچی کنگز کے سی ای او،مکی آرتھر کراچی کنگز کے ہیڈ کوچ، اظہر محمود کوچ ،راشد لطیف ٹیم ڈائریکٹر،نوید رشید وی پی آپریشن، شہزاد حسن خان ہیڈ آف مارکیٹنگ اور عاصم قرییشی برانڈنگ کے ذمہ دار ہوں گے۔
انہوں نے بتایا کہ ساتھ ہی ایک ایڈوائزری کمیٹی تشکیل دی گئی ہے جس میں شعیب ملک، راشدلطیف، سلیم یوسف، اقبال قاسم اور اظہر محمود شامل ہیں، ایڈوائزی کمیٹی کے تحت تین اور سات اکتوبر کو ہونے والےٹرائلز کے ذریعے ہزاروں کھلاڑیوں میں سے 350 کھلاڑیوں کو منتخب کیا گیا ہے، ان 350 کھلاڑیوں میں سے 60 کھلاڑی منتخب کرکے ٹورنامنٹ کے لیے 15کھلاڑیوں پر مشتمل چار ٹیمیں بنائی جائیں گی ، جب کہ ان 60 میں سے 15 کھلاڑی منتخب کرکے کراچی کنگز اے کی ٹیم بنائے جائے گی۔
انہوں نے بتایا کہ 19 اکتوبر کو دبئی میں پی ایس ایل کی ڈرافٹنگ ہوگی،بہترین کارکردگی کے حامل چھ لڑکے پی ایس ایل ایمرجنگ پلیرز ڈرافٹ میں جائیں گے جن ٰمیں سے ایک کا انتخاب ہوگا۔
انہوں نے کہا کہ ہم نے یوکے کے کائونٹی کلب میں بات کرلی ہے، جہاں منتخب لڑکے دو ماہ کلب کرکٹ کھیلں گے،ان میں سے چھ لڑکے منتخب ہوکر وہیں رہیں گے وہاں کوچز انہیں ٹرین کریں گے،ہماری خواہش ہے کہ کرکٹ نہ صرف کراچی بلکہ پورے پاکستان کا ٹیلنٹ باہر آئے،آخری پی ایس ایل میں جو ٹیلنٹ سامنے آیا آج وہ ٹی ٹوئنٹی میں بہترین کارکردگی دے رہا ہے۔
انہوں نے کہا کہ کرکٹ ہمارے خون میں شامل ہے،اس سال پی ایس ایل کا کپ کراچی لانے کی بھرپور کوشش ہوگی،یہ ٹیم ہماری یا اے آر وائی کی نہیں بلکہ کراچی کی ہے، کراچی نے ہمیں ہمیشہ سپورٹ کیا۔
سلمان اقبال نے ایک سوال پر بتایا کہ ایڈوائزری بورڈ کھلاڑیوں کے انتخاب کا عمل مکمل کرے گا۔
اپنے خطاب میں راشد لطیف نے کہا کہ ٹرائلز کا مقصد یہ تھا کہ ہم نے کچھ نام منتخب کیے ہیں جو کراچی کنگز کے ڈرافٹ میں جائیں گے، کراچی میں ہمیشہ سے کرکٹ کی نرسری رہی ہے اور رہے گی، بدقسمتی سے کچھ برس سے کراچی کے بہت کم کھلاڑی قومی ٹیم میں شامل ہوئے۔انہوں نے ایک ہاتھ سے محروم کھلاڑی مطلوب قریشی کو اسٹیج پر بلا کر سب کے سامنے پیش کیا اور اس کے ٹیلنٹ کی تعریف کی۔
