Tag: پاکستان مسلم لیگ ن

لاہور: صدراتی انتخاب کے دوران ن لیگ کی ٹوٹ پھوٹ پھر سامنے آ گئی، پنجاب اسمبلی میں مسترد شدہ اٹھارہ میں سے 12 ووٹ ن لیگی ارکان کے نکلے۔

تفصیلات کے مطابق ایک بار پھر مسلم لیگی ارکانِ اسمبلی کے اندرونی اختلافات سامنے آ گئے، اس بار صدارتی انتخاب کے موقع پر ن لیگ کی ٹوٹ پھوٹ سامنے آئی۔

پنجاب اسمبلی میں مسترد شدہ 18 میں سے 12 ووٹوں کے بارے میں جب انکشاف ہوا کہ یہ ن لیگی ارکان کے ہیں تو سوال اٹھا کہ جان بوجھ کرووٹ خراب تو نہیں کیے گئے؟

صدارتی انتخاب نے اختلافات کو طشت از بام کر دیا، ن لیگ کی صفوں میں اپنوں ہی پر انگلیاں اٹھنے لگیں، سابق صوبائی وزیرِ صحت خواجہ عمران نذیر ساتھیوں پر برس پڑے۔

حمزہ شہباز شریف کے پرانے زخم پھر سے تازہ ہوگئے، یاد رہے کہ اسپیکر کے الیکشن میں بھی بارہ ووٹ مخالف امیدوار کو پڑے تھے۔

صدارتی انتخاب 2018: عارف علوی تیرہویں صدر پاکستان منتخب ہوگئے

خیال رہے کہ صدر کے انتخاب کے لیے پاکستان تحریک انصاف کے عارف علوی، پاکستان پیپلزپارٹی کے اعتزاز احسن اور مسلم لیگ ن سمیت دیگراپوزیشن جماعتوں کی جانب سے مولانا فضل الرحمان صدارتی امیدوار تھے۔

صدارتی انتخاب میں عارف علوی نے مجموعی طور پر 353، مولانا فضل الرحمان نے 185 جب کہ اعتزاز احسن نے مجموعی طور پر 124 ووٹ حاصل کیے، اور یوں عارف علوی اسلامی جمہوریہ پاکستان کے تیرہویں صدر بن گئے۔

لاہور: وزارتِ عظمیٰ کے انتخاب سے پہلے ن لیگ میں بغاوت کی چنگاریاں سلگنے لگیں، اسپیکر پنجاب اسمبلی کے لیے 15 ارکان نے اپنے امیدوار کو چھوڑ کر پرویز الہی کو ووٹ دے دیا۔

تفصیلات کے مطابق ’ووٹ کو عزت دو‘ کے نعرے لگانے والے موروثی سیاست سے باہر نہ نکل سکے، موروثی سیاست کے باعث پارٹی کے کئی ارکان ناراض ہوگئے۔

وزارتِ عظمیٰ کے امیدوار خادم اعلیٰ کے لیے خطرے کی گھنٹیاں بجنے لگیں، فارورڈ بلا ک کی خبروں پر سینئر لیگی ارکان آگ بگولہ ہوگئے ہیں تاہم قومی اسمبلی میں وزیرِ اعظم کے الیکشن میں شکست کے سائے گہرے ہونے لگے۔

ن لیگی قیادت نے جمہوری روایت سے آنکھیں چراتے ہوئے اپنے ہی بیانیے کو اڑا کر رکھ دیا ہے، خاندانی سیاست کو گلے لگاتے ہوئے وفاق میں شہباز شریف کو وزارتِ عظمی کے لیے جب کہ پنجاب میں انھی کے بیٹے حمزہ شہباز کو وزیرِ اعلیٰ کا امیدوار نامزد کر دیا۔

شور کرنے والوں کو زخم لگاہے، یہ شور کا نہیں کارکردگی دکھانے کا وقت ہے: پرویز الہیٰ

تحریکِ انصاف کے مرکزی رہنما اور سابق اپوزیشن لیڈر میاں محمود الرشید کہتے ہیں کہ ہم نے فارورڈ بلاک بنانے کی دانستہ کوشش نہیں کی، تاہم درجنوں لیگی ارکان دوستوں سے رابطے میں ہیں۔

واضح رہے کہ ن لیگی قائدین کی روش پر سابق وزیرِ داخلہ چوہدری نثار علی خان اور زعیم قادری سمیت کئی ناراض رہنما انگلیاں اٹھا چکے ہیں۔

لاہور: پیپلز پارٹی کے بعد مسلم لیگ ن نے بھی قومی اور صوبائی اسمبلیوں میں حلف اٹھانے کا فیصلہ کر لیا ہے، تاہم ن لیگی ارکان نے حتمی فیصلہ شہباز شریف پر چھوڑ دیا ہے۔

تفصیلات کے مطابق ن لیگ نے فیصلہ کر لیا ہے کہ وہ قومی اور صوبائی دونوں اسمبلیوں میں بیٹھے گی، اس سلسلے میں حلف لینے یا نہ لینے کا فیصلہ ن لیگی ارکان نے شہباز شریف پر چھوڑ دیا۔

اسمبلیوں میں بیٹھنے سے متعلق ن لیگ کے اہم اجلاس میں فیصلہ کیا گیا کہ حلف اٹھاتے وقت سیاہ پٹیاں باندھ کر احتجاج کیا جائے گا۔

اجلاس کے بعد میڈیا سے گفتگو کرتے ہوئے مسلم لیگ ن لاہور کے صدر پرویز ملک نے کہا کہ حلف اٹھانے سے متعلق باقاعدہ اعلان کل کے اجلاس میں ہوگا۔

انھوں نے کہا کہ مسلم لیگ ن کے صدر میاں شہباز شریف نے کہا ہے کہ ہمارا کوئی رکن فارورڈ بلاک کی جانب نہیں جائے گا۔

پیپلز پارٹی اور ایم ایم اے رہنماؤں کی ملاقات: پی پی کا اسمبلی میں بیٹھنے کا فیصلہ

خیال رہے کہ کل آل پارٹیز کانفرنس ہو رہی ہے جس میں شہباز شریف بھی شریک ہوں گے، ن لیگ اس کانفرنس کے بعد اپنے مستقبل کا فیصلہ کرے گی۔

 قبل ازیں پاکستان پیپلز پارٹی نے بھی اسمبلیوں میں بیٹھنے کا فیصلہ کر لیا ہے، پی پی نے الیکشن میں شکست کا معاملہ پارلیمنٹ کے فلور پر اٹھانے پر زور دیا۔

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔