لاہور: مریم نواز نے کہا ہے کہ تیار ہو جاؤ، اور سیٹ بیلٹ باندھ لو، پاکستان کا جہاز کسی بھی وقت پرانے پاکستان میں لینڈ کرنے والا ہے۔
لاہور میں ورکرز اجلاس سے خطاب کرتے ہوئے مسلم لیگ ن کی نائب صدر مریم نواز نے کہا کہ پاکستان کا جہاز کسی بھی وقت پرانے پاکستان میں لینڈ کرنےوالا ہے، کل تحریک کا آغاز ہوگا، جو 2017 میں نواز شریف نے وزیر اعظم ہاؤس سے نکالے جانے پر شروع کیا تھا۔
انھوں نے کہا ووٹ کو عزت دو کی تحریک کا دوبارہ آغاز ہونے جا رہا ہے، وزیر اعظم کو مخاطب کرتے ہوئے کہا آپ کے پاس کوئی سیاسی پتا نہیں بچا ہے، سب پتے خزاں کی طرح جھڑ چکے ہیں، آپ کا ٹرمپ کارڈ ایک ہی ہے کہ سیاست سے دست بردار ہو جاؤ، کل میرے اور حمزہ کے ساتھ عوام کا قافلہ آپ کو نکالنے کے لیے جی ٹی روڈ پر نکلے گا۔
مریم کا کہنا تھا کہ اپوزیشن میں ہونے کے باوجود نواز شریف کی پارٹی کا ایک بندہ نہیں ٹوٹا، جب کہ یہ اقتدار میں ہیں پھر بھی ان کا روز ایک ایک بندہ نکل رہا ہے، جتنی تمھاری بے عزتی ہو چکی صرف استعفیٰ سے بات نہیں بنتی گھر جانا پڑے گا، کہتا ہے کہ عوام میرے 27 مارچ کے جلسے میں ضرور نکلے، انشااللہ عوام ضرور نکلے گی لیکن تمہیں نکالنے کے لیے۔
انھوں نے کہا یہ دھمکیوں کے ذریعے اقتدار کا ایک ایک دن مانگ رہا ہے، لیکن اب کوئی بچانے نہیں آئے گا، تمھارا اقتدارکسی عالمی سازش نے ختم نہیں کیا، نہ اپوزیشن یا کسی سیاسی پارٹی نے ختم کیا، تمھارا اقتدار عوام کی بد دعاؤں نے ختم کیا ہے، اتحادیوں سے ہاتھ ملانے کو گناہ سمجھتے تھے، آج وہی دو دو ووٹ والوں کے گھر جا رہے ہو۔
مریم کا کہنا تھا کہ وزیر اعظم کو ڈر ہے اقتدار چلا گیا تو چوری کے جو تانے بانے بنی گالہ سے ملتے ہیں وہ کھل جائیں گے، اس کا اقتدار گیا نہیں، جانے والا ہے، اس کے بعد چوری کی جو دستانیں کھلیں گی لوگ کانوں کو ہاتھ لگائیں گے، ان کے تانے بانے بھی بنی گالہ اور جادو ٹونے سے ملتے ہیں، کوئی ٹرانسفر، تعیناتی کروڑوں کی رشوت سے کم میں نہیں ہوتی۔
انھوں نے مزید کہا آنے والے دنوں میں تمام ثبوت میڈیا پر دیکھیں گے، سیاسی شہید بننے کی کوشش نہ کرنا، گیدڑ کی کھال پہن کر کوئی نواز شریف نہیں بن سکتا، تم آلو پیاز کا ریٹ پتا کرنے نہیں آئے تھے تو کیا غریبوں کی روٹی چھیننے آئے تھے، تمھارا یوم حساب قریب ہے۔
