اسلام آباد: ملکی سطح پر اسمارٹ فونز کی تیاری کے سلسلے میں بڑی پیش رفت سامنے آئی ہے، موبائل ڈیوائس کی مینوفیکچرنگ سے متعلق ریگولیشنز اور تصدیق کا ڈرافٹ تیار کر لیا گیا۔
تفصیلات کے مطابق پاکستان ٹیلی کمیونی کیشن اتھارٹی نے پاکستان میں مقامی سطح پر موبائل فونز کی تیاری سے متعلق قواعد و ضوابط اور موبائل فونز کی تصدیق کے سلسلے میں ایک ڈرافٹ تیار کر لیا ہے، اس ڈرافٹ کا مقصد موبائل فونز کی مقامی سطح پر تیاری کو فروغ دینا ہے۔
پی ٹی اے کا اس سلسلے میں کہنا ہے کہ اس ڈرافٹ سے موبائل فونز کی اسمگلنگ کی حوصلہ شکنی ہوگی، یہ ڈرافٹ موبائل ڈیوائس مینوفیکچرنگ پالیسی کی روشنی میں تیار کیا گیا ہے، موبائل فونز کی تیاری میں سرمایہ کاری کی حوصلہ افزائی کی جائے گی۔
پی ٹی اے کے مطابق ڈرافٹ کی تیاری میں ٹیلی کام صارفین اور اسٹیک ہولڈرز سے تاثرات بھی لیے گئے ہیں، عوام بھی اپنے تاثرات 5 اکتوبر 2020 تک جمع کرا سکتے ہیں۔ پی ٹی اے کے ترجمان کا کہنا ہے کہ ادارہ اسمارٹ فونز کی ملکی سطح پر تیاری کے لیے کوشاں ہے۔
بیرون ملک سے موبائل فون لانے والوں کے لیے خوش خبری، آرڈیننس جاری
یاد رہے چند دن قبل سینیٹ کی قائمہ کمیٹی برائے آئی ٹی کے اجلاس میں اراکین کمیٹی نے مطالبہ کیا تھا کہ پی ٹی اے موبائل کمپنیوں کو عوام کو قسطوں پر فون دینے کا پابند کرے، جس پر پی ٹی اے جواب دیا تھا کہ ہم لائسنس دے دیں گے، کمپنیاں خود فور جی سپورٹ فون تیار کریں گی۔ کمیٹی کا مؤقف تھا کہ ڈیجیٹل پاکستان کے لیے اسمارٹ فونز تک آسان رسائی ضروری ہے۔ پی ٹی اے نے کہا تھا کہ مقامی سطح پر موبائل تیاری کے لائسنس کا جلد اجرا کیا جائے گا۔
