Tag: پاکستان پیپلزپارٹی

کراچی : پاکستان پیپلزپارٹی کے چیئرمین بلاول بھٹو زرداری نے کہا کہ ہمارے کشمیر میں انتخابی مہم سے مسئلہ کشمیر ابھر کر سامنے آیااورمودی سے دوستی کی وجہ سے نواز شریف کی جانب سے مسئلہ کشمیر کو عالمی سطح پر سرد خانے حوالے کرنے کی کوششوں کو ناکام بنایا۔

بلاول ہاوٴس میں آزاد کشمیر انتخابات کے پارٹی امیدواروں کے اجلاس سے خطاب کرتے ہعئے پیپلزپارٹی کے چیئرمین بلاول بھٹو زرداری نے کہا کہ یہ معمول کے انتخابات نہیں تھے اور ہم جانتے تھے کہ یہ انتخابات ہائی جیک کرنے کے لیے تمام ہتھکنڈے سر عام استعمال کیے جائیں گے لیکن ہم نے انتخابات لڑنے کا فیصلہ کیا اور تاریخ کے درست رخ پر رہے اور کشمیری عوام کے مقدس مقاصد کے لیے بہادری سے لڑے۔

ان کا کہنا تھا کہ پارٹی نے کشمیری عوام کے عظیم مفادات میں آزاد جموں و کشمیر میں انتخابات لڑے کیونکہ مقبوضہ کشمیر میں بھارتی مظالم پر نوازلیگ حکومت کی خاموشی کی وجہ سے مقبوضہ وادی کے عوام کے مفادات کو نقصان ہو رہا تھا، ہمارے کشمیر میں انتخابی مہم سے مسئلہ کشمیر ابھر کر سامنے آیا ہے مودی سے دوستی کی وجہ سے نواز شریف کی جانب سے مسئلہ کشمیر کو عالمی سطح پر سرد خانے حوالے کرنے کی کوششوں کو ناکام بنایا۔

انہوں نے کہا کہ جس طرح قبل از انتخابات دھاندلی، کشمیر کونسل کے فنڈز کا بے دریغ استعمال اور وفاقی وزراء کی مداخلت کی وجہ سے ہمیں پتا تھا کہ نتائج کیا آئیں گے لیکن مجھے فخر ہے کہ ہمارے ساتھی ہمیں چھوڑ کر نہیں گئے۔

پاکستان پیپلزپارٹی آزاد کشمیر کے رہنماوٴں نے کہا کہ نواز لیگ حکومت نے انتقامی کارروایاں شروع کر دی ہیں اور کابینہ کی تقرری سے قبل ہی پیپلزپارٹی کے رہنماوٴں پر جھوٹے مقدمات قائم کیے گئے، یہ عمل نئی آزاد کشمیر حکومت کے مکروہ چہرے کی عکاسی کرتا ہے۔

اس موقع پر بلاول بھٹو زرداری نے کہا کہ وہ آزاد کشمیر انتخابات کے نتائج سے مایوس نہیں ہیں اور انہیں پختہ یقین ہے کہ پاکستان پیپلزپارٹی ملک میں 2018کے عام انتخابات جیتے گی،اجلاس میں پاکستان پیپلزپارٹی خواتین ونگ کی صدر ایم این اے فریال تالپر،پیپلزپارٹی آزاد کشمیر کے رہنماوٴں سابق وزیراعظم چودھری عبدالمجید،چودھری محمد یاسین، لطیف اکبر، سید بازل علی نقوی اور دیگر شریک تھے۔

کراچی: پیپلزپارٹی کے چیئرمین بلاول بھٹو زرداری نے لاہور پولیس کی جانب سے عیسائی برادری سے تعلق رکھنے والے دو نوجوانوں پر وحشیانہ تشدد کی سخت الفاظ میں مذمت کی ہے اور کہا ہے کہ پاکستان پیپلزپارٹی کسی بھی شہری پر کوئی غیر انسانی تشدد کی اجازت نہیں دے گی۔

ایک جاری کردہ بیان میں بلاول بھٹو زرداری نے کہا کہ ہم پاکستان میں انسانی حقوق کی جدوجہد کے مشعل بردار ہیں اور اپنے شہریوں سے کسی بھی غیر انسانی سلوک یا تشدد کی سخت مزاحمت کریں گے۔

میڈیا رپورٹس کے مطابق لاہور کے شالیمار تھانے کی تفتیشی پولیس نے عیسائی برادری کے دو نوجوانوں 30سالہ فراز مسیح اور 40سالہ دویا مسیح کو پکڑ کر انہیں سخت تشدد کا نشانہ بنایا، ایک نوجوان کو الٹا لٹکا کر تشدد کیا گیا اور دوسرے کو برہنہ کرکے اس پر تشدد کیا گیا۔

چیئرمین بلاول بھٹو زرداری نے کہا کہ اس وحشیانہ تشدد میں جو بھی ملوث ہیں ان کو کسی بھی صورت میں قانون کی گرفت میں لایا جائے اور مستقبل میں ایسے واقعات کو روکنے کے لیے بھی اقدامات اٹھائے جائیں۔

انہوں نے واضح کیا کہ عیسائی بھی اس ملک کے مساوی شہری ہیں ان سمیت کسی بھی شہری سے نا انصافی اور ظلم کو کبھی برداشت نہیں کیا جائے گا۔