پشاور : سابق صدر آصف زرداری کہا ہے کہ آئندہ ملک کا وزیراعظم یا تو میں ہوں گا یا بلاول بھٹو زرداری ہوں گے اس کا فیصلہ اسمبلی پہنچنے کے بعد کریں گے۔
وہ پشاور پیپلز اسٹوڈینٹس فیڈریشن کے اجتماع سے خطاب کر رہے تھے انہوں نے فاٹا میں پیپلز پارٹی کا سکرٹیریٹ بنانے کا اعلان کرتے ہوئے کہا ہے کہ موجودہ حکومت نااہل ہے اس سے کوئی امید نہ رکھیں۔
آصف زرداری نے کہا کہ صرف نواز کا نہیں بلکہ سب کا شو مُک گیا ہے بلکہ بلاول اور آصفہ سب میدان میں ہوں گا اور حکومت بنا کر دکھائیں گے اور اگلا وزیراعظم یا تو میں ہوں گا یا بلاول ہوگا۔
انہوں نے کہا کہ پیپلز پارٹی نے پولیٹیکل پارٹیز ایکٹ منظور کیا اور خیبرپختونخواہ کو شناخت دی ساتھ ہی فاٹا کے فنڈز تین ارب سے بڑھا کر 19 ارب کیے اور بینظیر بھٹو انکم سپورٹ پروگرام کے تحت ماں بہنوں کے لیے امدادی کارڈز جاری کیے۔
آصف زرداری نے کہا کہ موجودہ حکومت سے امید مت رکھیں کیوں کہ یہ نا اہل ہیں ہم آ کر فاٹا اصلاحات نافذ کریں گے کیوں کہ فاٹا کو گورنر کا غلام نہیں دیکھنا چاہتے اور یہ خواہش ہے کہ فاٹا میں بھی سپریم کورٹ اور ہائی کورٹ ہو۔
ان کا کہنا تھا کہ مانتا ہوں کہ ہمارا کوئی وزیر غریب کا بیٹا نہیں تھا لیکن اب چاہتا ہوں کہ کسان اور غریب کا بیٹا میرا وزیر ہو اور پارٹی سے اشرافیہ کے بجائے غریب کارکنوں کو ٹکٹ ملیں۔
سابق صدر نے عمران خان ہدف تنقید بناتے ہوئے کہا کہ کپتان ڈرائنگ روم سے نکل کر جلسے کرتا ہے لیکن جیل جانے سے ڈرتا ہے کہ اگر جیل چلا گیا تو کیا ہو گا حالانکہ جیل سیاست دان کی نرسری ہوتی ہے۔
