Tag: پاکستان پیپلز پارٹی

اسلام آباد: سابق صدر آصف علی زرداری نے حکومت مخالف تحریک چلانے کا عندیہ دے دیا، تاہم انھوں نے یہ نہیں بتایا کہ تحریک کب شروع کی جائے گی۔

تفصیلات کے مطابق اسلام آباد میں سابق صدر آصف زرداری نے میڈیا سے گفتگو کرتے ہوئے کہا کہ حکومت کے خلاف سیاسی تحریک تو چلے گی تاہم اصل سوال یہ ہے کہ حکومت کے خلاف تحریک کب چلے گی۔

اسلام آباد ہائی کورٹ میں جعلی ٹھیکوں کے کیس میں عبوری ضمانت حاصل کرنے کے بعد آصف زرداری نے کہا کہ خان صاحب کہیں خود کو این آر او نہ دے دیں۔

سابق صدر کا کہنا تھا کہ آئی ایم ایف کے ملازم کو گورنر اسٹیٹ بینک لگا کر بڑی غلطی کی گئی ہے، پاکستان کی معاشی تاریخ میں یہ بات یاد رکھی جائے گی۔

یہ بھی پڑھیں:  گورنر اسٹیٹ بینک ڈاکٹر رضا باقر نے عہدے کا چارج سنبھال لیا

خیال رہے کہ ڈاکٹر رضا باقر کو تین سال کے لیے گورنر اسٹیٹ بینک مقرر کیا گیا ہے، وہ 18 سال آئی ایم ایف اور 2 سال ورلڈ بینک میں کام کا تجربہ رکھتے ہیں۔

رضا باقر 2017 سے مصر میں آئی ایم ایف آفس سربراہ اور سینئر ریزیڈنٹ نمائندے تھے، رومانیہ اور بلغاریہ میں آئی ایم ایف کے مشن چیف رہ چکے ہیں۔

یاد رہے کہ آج اسلام آباد ہائی کورٹ میں آصف زرداری کے خلاف جعلی ٹھیکوں کے کیس کی سماعت ہوئی جس میں سابق صدر کی عبوری ضمانت 15 مئی تک منظور کر لی گئی۔

عدالت نے حکم دیا کہ آئندہ سماعت تک نیب آصف زرداری کو گرفتار نہ کرے، عدالت نے آصف زرداری کو 5 لاکھ روپے کے مچلکے جمع کرانے کی ہدایت کی۔

اسلام آباد: پاکستان پیپلز پارٹی کی رہنما اور سینیٹر شیری رحمان نے کہا ہے کہ رمضان میں دہشت گردی سر اٹھا رہی ہے، 9 ماہ ہو گئے نیشنل سیکورٹی کا اجلاس نہیں بلایا گیا۔

تفصیلات کے مطابق سینیٹر شیری رحمان نے سینیٹ اجلاس میں قومی سلامتی کی پالیسی کے حوالے سے کہا کہ نیشنل سیکورٹی کی کمیٹی 9 ماہ بعد بنی ہے، نیشنل ایکشن پلان پر عمل درآمد پر ایوان کو اعتماد میں نہیں لیا گیا۔

ان کا کہنا تھا کہ رمضان میں دہشت گردی سر اٹھا رہی ہے، وزیر اعظم کا ایک بیان نہیں آیا، وہ سینیٹ میں کیوں نہیں آ رہے، 9 ماہ ہو گئے نیشنل سیکورٹی کا اجلاس نہیں بلایا گیا۔

یہ بھی پڑھیں:  داتا دربار کے باہردھماکہ، 10 افراد شہید، 25 زخمی

سینیٹر شیری رحمان نے سینیٹ اجلاس میں مطالبہ کیا کہ وزیر اعظم عمران خان کو سینیٹ اجلاس میں آنے کے لیے پابند کیا جائے، ایوان کو کیسے چلایا جا رہا ہے، وزیر اعظم اور وزرا ایوان میں نہیں آتے۔

شیری رحمان نے اجلاس کے بعد میڈیا سے گفتگو کرتے ہوئے کہا کہ وزیر اعظم قومی اسمبلی میں بھی مشکل سے آتے ہیں، سینیٹ میں تو آتے ہی نہیں، وزیر اعظم کو سینیٹ میں آنے کا پابند کیا جائے۔

انھوں نے کہ پاکستان کا مستقبل نیلام ہوتا نظر آ رہا ہے، تبدیلی سرکار کہتی ہے فکر نہ کریں سب ٹھیک ہو جائے گا، سب ٹھیک ہے کہتے کہتے کابینہ میں تبدیلی کر دی گئی، وزیر اعظم ایوان میں آکر بریفنگ دیا کریں۔

کراچی: پاکستان پیپلز پارٹی کے چیئرمین بلاول بھٹو زرداری نے کہا ہے کہ پیٹرول قیمتوں پر احجاج کرنے والوں پر مقدمات نے آمریت کی یاد تازہ کر دی ہے۔

تفصیلات کے مطابق پنجاب میں پیپلز پارٹی ورکرز پر مقدمات پر پارٹی چیئرمین نے رد عمل ظاہر کرتے ہوئے کہا کہ پیٹرول قیمتوں میں اضافے کے خلاف پُر امن مظاہرہ کیا جا رہا تھا۔

بلاول بھٹو نے پنجاب میں جیالوں پر مقدمات درج کیے جانے کی مذمت کرتے ہوئے کہا کہ مظاہرہ پرامن تھا، مظاہرین پر مقدمات نے آمریت کی یاد تازہ کر دی۔

چیئرمین پیپلز پارٹی کا کہنا تھا کہ کٹھ پتلی حکمران عوامی احتجاج دبانے کے لیے تشدد پر اتر آئے ہیں، وزیر اعظم نے عوام سے پر امن احتجاج کا جمہوری حق بھی چھین لیا۔

یہ بھی پڑھیں:  پٹرولیم مصنوعات کی قیمتوں میں اضافہ، پیٹرول 9 روپے 42 پیسے مہنگا

بلاول بھٹو نے کہا کہ ملتان، لودھراں، ڈی جی خان اور بہاولپور میں پی پی کارکنوں پر بنائے جانے والے مقدمات واپس لیے جائیں۔

پی پی رہنما کا کہنا تھا کہ حکومت نے لودھراں کے مرحوم جیالے عاشق کو بھی مقدمے میں نامزد کر دیا ہے۔

خیال رہے کہ آج سے پیٹرول کی قیمت میں 9 روپے 42 پیسے اضافہ کیا گیا ہے جس کے بعد پیٹرول کی نئی قیمت 108 روپے 31 پیسے ہو گئی ہے جب کہ مٹی کا تیل 7 روپے 46 پیسے اضافے کے بعد 96 روپے 77 پیسے فی لیٹر ہو گیا۔

پیٹرول قیمتوں میں اضافے سے اشیاے خورد و نوش کی قیمتوں پر براہ راست اثر پڑے گا اور رمضان المبارک میں عوام کو مزید مہنگائی کا سامنا کرنا پڑے گا۔

اسلام آباد: قومی اسمبلی میں چیئرمین پی اے سی کی تبدیلی پر پاکستان پیپلز پارٹی اور مسلم لیگ ن میں اختلافات سامنے آ گئے۔

ذرایع پی پی کے مطابق چیئرمین پبلک اکاؤنٹس کمیٹی کی تبدیلی کا معاملہ الجھ گیا ہے، دونوں اپوزیشن جماعتوں میں اختلاف پیدا ہو گیا ہے، پیپلز پارٹی نے ن لیگ کو اپنے تحفظات سے آگاہ کر دیا۔

پیپلز پارٹی کی رکن قومی اسمبلی شازیہ مری کا کہنا ہے کہ ن لیگ کا چیئرمین کی تبدیلی کا فیصلہ یک طرفہ ہے، ن لیگ نے اعتماد میں لیے بغیر رانا تنویر کو چیئرمین نامزد کیا۔

شازیہ مری نے کہا کہ بلاول بھٹو پارلیمنٹ میں موجود تھے، انھیں پیغام تک نہیں بھیجا گیا، ن لیگ کے یک طرفہ فیصلے سے ہم حیران ہیں۔

یہ بھی پڑھیں:  اپوزیشن لیڈر کی تبدیلی کی خبریں بے بنیاد ہیں، مریم اورنگزیب

پی پی رہنما کا کہنا تھا کہ ن لیگ نے فیصلے سے متعلق پی اے سی ارکان تک کو آگاہ نہیں کیا، ہم نے شہباز شریف کو چیئرمین پی اے سی بنانے کے لیے ہر قسم کا تعاون کیا تھا۔

ادھر ن لیگ نے قائد حزب اختلاف کی تبدیلی کی خبروں کی تردید کر دی ہے، ترجمان مسلم لیگ ن مریم اورنگ زیب نے نے کہا کہ اپوزیشن لیڈر شہباز شریف کی تبدیلی کی خبریں بے بنیاد ہیں۔

مریم اورنگ زیب نے کہا کہ قائد حزب اختلاف شہباز شریف ہی ہیں، متحدہ اپوزیشن حکومتی نا اہلی کو اجاگر کرنے کے لیے کردار ادا کرتی رہے گی۔

اسلام آباد: پاکستان پیپلز پارٹی کے مرکزی رہنما خورشید شاہ نے حکومت سے مطالبہ کیا ہے کہ مزدوروں کے لیے ماہانہ اُجرت 28 سے 30 ہزار مقرر کی جائے۔

تفصیلات کے مطابق آج یوم مزدور پر پی پی رہنما خورشید شاہ نے حکومت سے مزدوروں کی ماہانہ اجرت تیس ہزار تک لے جانے کا مطالبہ کر دیا ہے۔

خورشید شاہ نے اسلام آباد میں میڈیا سے گفتگو کرتے ہوئے کہا کہ ملک میں ڈالر 150 کا ہو گیا ہے، محنت کش کی کم سے کم تنخواہ 28 سے 30 ہزار کی جائے۔

ان کا کہنا تھا کہ پیپلز پارٹی کی پالیسی مزدور دوست رہی ہے، پیپلز پارٹی نے مزدور کی اجرت 15 ہزار کی تھی، جو دوبارہ نہیں بڑھائی گئی۔

یہ بھی پڑھیں:  ماہ رمضان سے پہلے ہی مہنگائی نے عوام کی چیخیں نکال دیں، قیمتوں میں ہوشربا اضافہ

خورشید شاہ نے بتایا کہ پیپلز پارٹی نے منشور پیش کیا تھا تو اس میں مزدور کی تنخواہ کم سے کم 22 ہزار مقرر کی گئی تھی۔

یاد رہے کہ آج پاکستان سمیت دنیا بھر میں مزدوروں کے حقوق کا عالمی دن منایا گیا، یہ دن شکاگو میں مزدوروں کی جانب سے کیے جانے والے احتجاج پر امریکی حکومت کی جانب سے تشدد کے نتیجے میں جاں بحق اور زخمی ہونے والے مزدوروں کی یاد میں منایا جاتا ہے۔

خیال رہے کہ ملک میں ایک عام آدمی کے لیے مہنگائی میں پریشان کن حد تک اضافہ ہو گیا ہے، ادھر رمضان کی بھی آمد ہے، جس کے ساتھ ہی اشیاے خورد و نوش کی قیمتیں مزید بڑھ گئی ہیں، اس تناظر میں مزدوروں کی اجرت میں اضافہ ناگزیر ہو چکا ہے۔